Salmoù 107 - Bibl Koad 21: Ar Bibl e Brezhoneg evit ar Vretoned

Salm 107

¹ Meulit an AOTROU rak mat eo, rak e drugarez a bad da viken!

² Ra lavaro evel-se dasprenidi an AOTROU, ar re en deus dasprenet eus dorn ar gwasker,

³ hag en deus dastumet eus broioù ar sav-heol hag ar c'huzh-heol, eus an hanternoz hag eus ar c'hreisteiz.

⁴ Kantren a raent er gouelec'h, en un hent digenvez, ha ne gavent ket ur gêr da chom enni.

⁵ Naon ha sec'hed o doa, o ene a semple enno.

⁶ Neuze o deus kriet d'an AOTROU en o estrenvan, hag o dieubet en deus eus o enkrezioù.

⁷ O renet en deus dre an hent eeun, da gavout ur gêr da chom enni.

⁸ Ra veulint an AOTROU evit e vadelezh, evit e vurzhudoù e-keñver mibien an dud!

⁹ Rak roet en deus e walc'h d'an ene en doa sec'hed, ha leuniet en deus a vadoù an ene en doa naon.

¹⁰ Ar re a oa o chom en deñvalijenn hag e skeud ar marv, a oa dalc'het en glac'har hag en hern,

¹¹ dre ma oant bet disent ouzh gerioù Doue, hag o deus disprizet kuzul an Uhel-Meurbet.

¹² Izelaat a reas o c'halon dre ar boan, hag e kouezhjont pell eus pep sikour.

¹³ Neuze o deus kriet d'an AOTROU en o glac'har, hag eñ en deus o dieubet eus o enkrezioù.

¹⁴ Tennet en deus anezho eus an deñvalijenn hag eus skeud ar marv, torret en deus o ereoù.

¹⁵ Ra veulint an AOTROU evit e vadelezh, evit e vurzhudoù e-keñver mibien an dud!

¹⁶ Rak bruzunet en deus an dorojoù arem, ha torret ar barrennoù houarn.

¹⁷ Ar re ziskiant a oa glac'haret, en abeg da hent o disentidigezh hag o direizhder;

¹⁸ o ene en doa euzh ouzh pep boued, stekiñ a raent ouzh dorioù ar marv.

¹⁹ Neuze o deus kriet d'an AOTROU en o estrenvan, hag eñ en deus o dieubet eus o enkrez.

²⁰ Kaset en deus e gomz, o yac'haet en deus, hag o zennet en deus eus ar bezioù.

²¹ Ra veulint an AOTROU evit e vadelezh, evit e vurzhudoù e-keñver mibien an dud!

²² Ra ginnigint aberzhoù a drugarekadennoù, ha ma tisklêrint e oberennoù o kanañ gant levenez.

²³ Ar re a ziskenn war ar mor el listri, hag a genwerzh war an doureier bras,

²⁴ ar re-se o deus gwelet oberennoù an AOTROU hag e vurzhudoù el lec'hioù don.

²⁵ Komz a reas hag e lakaas ur barr-avel da c'hwezhañ, a savas koummoù ar mor.

²⁶ Pignat a reont war-zu an neñv, diskenn a reont en donder, o ene a deuz gant an enkrez.

²⁷ Evel un den mezv e troidellont hag e vrañsellont, o holl furnez a vank dezho.

²⁸ Neuze o deus kriet d'an AOTROU en o estrenvan, hag eñ en deus o zennet eus o enkrez.

²⁹ Herzel a ra ar barrad gwallamzer, e dro e sioulder, hag an doureier a dav.

³⁰ Laouenaat a reont dre ma'z int sioulaet. Hag e ren anezho d'ar porzh a c'hoantaent.

³¹ Ra veulint madelezh an AOTROU, hag e vurzhudoù e-keñver mibien an dud!

³² Ra uhelaint anezhañ e bodadeg ar bobl, ra veulint anezhañ e kuzul an henaourien!

³³ Treiñ a ra ar stêrioù er gouelec'h, ar mammennoù dour en un douar sec'h,

³⁴ ar vro strujus en ul lanneg sall, abalamour da fallentez e annezerien.

³⁵ Treiñ a ra ar gouelec'h e stank, hag an douar sec'h e mammennoù dour,

³⁶ da lakaat ar re naonek da chom eno. Sevel a reont ur gêr da chom enni,

³⁷ hadañ a reont parkeier ha platañ gwini, a ro frouezh pep bloaz.

³⁸ Bennigañ a ra anezho hag e kreskont kalz, ne lez ket o loened da nebeutaat.

³⁹ Neuze e tigreskont hag ez int izelaet dre ar gwaskerezh, ar gwalleur hag ar boan.

⁴⁰ Skuilhañ a ra an dispriz war ar re vras, hag e laka anezho da gerzhout en ur gouelec'h hep hent.

⁴¹ Sevel a ra ar paour eus ar glac'har, hag e laka da greskiñ an tiegezhioù evel tropelloù.

⁴² An dud reizh a wel kement-se hag a laouena, met genoù ar re zireizh a chom serret.

⁴³ Ra vo aketus ouzh kement-se an hini a zo fur, ha ra vo evezhius ouzh madelezhioù an AOTROU.