Salmoù 106 - Bibl Koad 21: Ar Bibl e Brezhoneg evit ar Vretoned

Salm 106

¹ Meulit an AOTROU! Kinnigit trugarekadennoù d'an AOTROU rak mat eo, rak e drugarez a bad da viken!

² Piv a c'hello disklêriañ oberoù bras an AOTROU, ha reiñ da anavezout e holl veuleudioù?

³ Eürus ar re a vir ar pezh a zo reizh, a ra e pep amzer ar pezh a zo eeun!

⁴ AOTROU, az pez soñj ac'hanon ez madelezh e-keñver da bobl, laka da silvidigezh da zont din,

⁵ evit ma welin eurvad da re zibabet, ma laouenain e levenez da bobl, ha ma kavin gloar gant da hêrezh.

⁶ Pec'het hon eus, ni hag hon tadoù. Oberiet hon eus gant fallentez, an droug hon eus graet.

⁷ Hon tadoù en Ejipt ne voent ket evezhius ouzh da vurzhudoù, n'o doe ket soñj eus da vadelezhioù diniver, met disent e voent e-tal ar mor, war-zu ar Mor Ruz.

⁸ Hogen e saveteas anezho dre garantez evit e anv, evit reiñ da anavezout e c'halloud.

⁹ Gourdrouz a reas ar Mor Ruz hag e sec'has, hag e renas anezho dre an donder evel dre ar gouelec'h.

¹⁰ O saveteiñ a reas eus daouarn an heskiner, hag o dieubas eus daouarn an enebour.

¹¹ An doureier a c'holoas o heskinerien, ha ne chomas hini anezho.

¹² Neuze e kredjont en e gomzoù, hag e kanjont e veuleudi.

¹³ Prest ec'h ankounac'hajont e oberennoù, n'esperjont ket en e venozioù.

¹⁴ En em reiñ a rejont d'an droukc'hoant er gouelec'h, hag e temptjont Doue el lec'h digenvez.

¹⁵ Neuze e roas dezho ar pezh o doa goulennet, met kas a reas warno an dizeriañ.

¹⁶ Gwarizi o doe ouzh Moizez er c'hamp, hag ouzh Aaron, sant an AOTROU.

¹⁷ An douar a zigoras, hag a lonkas Datan, hag a c'holoas bagad Abiram.

¹⁸ An tan a grogas en o bodadeg, ar flamm a guzumas ar re zrouk.

¹⁹ Ul leue a rejont en Horeb, hag e stoujont dirak ur skeudenn deuzet,

²⁰ trokañ a rejont o gloar ouzh dremm un ejen a zebr ar geot.

²¹ Ankounac'haat a rejont Doue o dieuber, en doa graet traoù bras en Ejipt,

²² traoù burzhudus e bro Cham, ha traoù spontus war ar Mor Ruz.

²³ Hag e komze eus distrujañ anezho, ma ne vije ket en em lakaet Moizez e zibabet ouzh ar freuz dirazañ, evit distreiñ e fulor, evit n'o dispennje ket.

²⁴ Disprizout a rejont an douar a zudi, ne gredjont ket d'e gomz,

²⁵ grozmolat a rejont en o deltennoù, ne selaoujont ket mouezh an AOTROU.

²⁶ Neuze e touas dezho o lazhañ er gouelec'h,

²⁷ lakaat o lignez da gouezhañ etre ar broadoù, o stlabezañ en holl vroioù.

²⁸ En em stagañ a rejont ouzh Baal-Peor, hag e tebrjont aberzhoù ar re varv.

²⁹ Kounnariñ a rejont Doue dre o oberennoù, kement ma savas ur walenn en o zouez.

³⁰ Met Fineas en em ziskouezas hag a reas reizhder, hag ar walenn a baouezas.

³¹ Kement-se a voe kontet dezhañ da reizhder, a oad da oad, da viken.

³² Kounnariñ a rejont anezhañ ivez tost da zoureier Meriba, hag ec'h erruas droug gant Moizez en abeg dezho.

³³ Rak e stourmjont ouzh e spered, hag e komzas skañvik eus e vuzelloù.

³⁴ Ne voe ket distrujet ganto ar pobloù, evel m'en doa gourc'hemennet an AOTROU dezho.

³⁵ En em veskañ a rejont gant ar broadoù, hag e teskjont o oberennoù,

³⁶ servijañ a rejont o idoloù, ar pezh a voe ur pech evito,

³⁷ hag ec'h aberzhjont o mibien hag o merc'hed d'an diaouled.

³⁸ Skuilhañ a rejont ar gwad didamall, gwad o mibien hag o merc'hed a aberzhjont da idoloù Kanaan; hag ar vro a voe disakret gant ar muntroù-se.

³⁹ Hag en em saotrjont dre o oberoù, hag en em rojont d'ar gasterezh dre o doare.

⁴⁰ Kounnar an AOTROU en em danas a-enep e bobl, euzh en doe ouzh e hêrezh.

⁴¹ O lakaat a reas etre daouarn ar broadoù, ar re o c'hasae a renas warno,

⁴² o enebourien o gwaskas, hag e voent dismegañset didan o dorn.

⁴³ Meur a wech e tieubas anezho, met en em ziskouez a rejont disent en o c'hoantoù, hag en em golljont dre o direizhder.

⁴⁴ Koulskoude e sellas outo en o estrenvan, pa glevas o c'hriadennoù.

⁴⁵ Soñj en deus bet en o c'heñver eus e emglev, hag en deus bet keuz hervez braster e drugarez.

⁴⁶ Lakaet en deus anezho da gavout truez e-kichen an holl re o dalc'he er sklavelezh.

⁴⁷ Hor savete, AOTROU hon Doue, hag hon dastum a-douez ar broadoù, evit ma veulimp da anv santel, ha ma kavimp gloar en da veuleudioù.

⁴⁸ Benniget ra vo an AOTROU, Doue Israel, a gantved da gantved, ha ma lavaro an holl bobl: Amen! Meulit an AOTROU!