Salmoù 105 - Bibl Koad 21: Ar Bibl e Brezhoneg evit ar Vretoned

Salm 105

¹ Meulit an AOTROU, pedit e anv, roit da anavezout e-touez ar pobloù e oberoù bras!

² Kanit dezhañ, salmit dezhañ, komzit eus e holl vurzhudoù!

³ Lakait ho kloar en e anv santel! Ra laouenaio kalon ar re a glask an AOTROU!

⁴ Klaskit an AOTROU hag e nerzh, klaskit dalc'hmat e zremm!

⁵ Ho pet soñj eus ar burzhudoù en deus graet, eus e virakloù hag eus barnedigezhioù e c'henoù,

⁶ c'hwi, lignez Abraham e servijer, mibien Jakob e zibabet!

⁷ Eñ eo an AOTROU hon Doue, e varnedigezhioù a zo war an douar holl.

⁸ Soñj en deus da viken eus e emglev, eus e bromesa a reas evit mil rummad,

⁹ eus an emglev a reas gant Abraham, eus al le a reas da Izaak,

¹⁰ hag a startaas e Jakob evit bezañ ur reol, evit bezañ da Israel un emglev peurbadus,

¹¹ o lavarout: Me a roio dit bro Ganaan, lod ho hêrezh eo.

¹² Pa ne oant nemet un dornad tud, nebeut anezho ha diavaezidi er vro,

¹³ o vont a vroad da vroad hag a rouantelezh d'ur rouantelezh all,

¹⁴ ne lezas den d'o gwaskañ, ha e kastizas rouaned abalamour dezho,

¹⁵ o lavarout: Na stokit ket ouzh va olevidi, na rit ket a zroug da'm frofeded!

¹⁶ Galvet en deus ar gernez war an douar, ha torret holl sikour bara.

¹⁷ Kas a reas en o raok un den: Jozef a voe gwerzhet evel sklav.

¹⁸ Stardet e voe e dreid e chadennoù, lakaet e voe an hern ouzh e vuhez,

¹⁹ betek an amzer ma en em gavas ar pezh en doa lavaret, ha ma en roas da anavezout ger an AOTROU.

²⁰ Ar roue a gasas d'e zieubiñ, mestronier ar pobloù en divac'has.

²¹ E lakaat a reas da aotrou en e di, ha da c'houarnour eus e holl vadoù,

²² evit chadennañ diouzh e ziviz e briñsed, ha kelenn ar furnez d'e henaourien.

²³ Neuze Israel a zeuas d'an Ejipt, Jakob a zeuas da chom e bro Cham.

²⁴ Doue a lakaas e bobl da greskiñ kalz-meurbet, da vezañ galloudusoc'h eget o enebourien.

²⁵ Goude e cheñchas o c'halon, kement ken e kasajont e bobl, hag e rejont gaou bras d'e servijerien.

²⁶ Kas a reas Moizez e servijer, hag Aaron en doa dibabet.

²⁷ Ober a rejont burzhudoù en o c'hreiz, ha mirakloù e bro Cham.

²⁸ Kas a reas an deñvalijenn hag e reas an dic'houloù, ha ne voent ket disent ouzh e gomz.

²⁹ Treiñ a reas o doureier e gwad, hag e reas mervel o fesked.

³⁰ An douar a vervas a raned, betek e kambroù o rouaned.

³¹ Komz a reas hag e teuas kelien, ha laou en o holl vro.

³² E-lec'h glav e roas dezho grizilh, ha flammoù-tan war o bro.

³³ Skeiñ a reas gant o gwiniegoù hag o gwez-fiez, hag e torras gwez o douar.

³⁴ Komz a reas hag e teuas kilheien-raden, amprevaned debrus diniver,

³⁵ a lonkas holl c'heot o bro, hag a lonkas frouezh o farkeier.

³⁶ Skeiñ a reas gant an holl re gentañ-ganet en o bro, holl frouezh kentañ o nerzh.

³⁷ Neuze e lakaas anezho da vont er-maez gant arc'hant hag aour, hag en o meuriadoù ne oa den o vrañsellat.

³⁸ An Ejipt a laouenaas pa'z ejont kuit, rak an aon dirak Israel a oa kroget enno.

³⁹ Astenn a reas ar goabrenn d'o goleiñ, hag an tan d'o sklêrijennañ en noz.

⁴⁰ Pa c'houlennjont e kasas koailhed dezho, hag o gwalc'h a roas dezho eus bara an neñv.

⁴¹ Digeriñ a reas ar roc'h hag an doureier a redas, mont a rejont dre al lec'hioù sec'h evel ur stêr.

⁴² Rak soñj en doe eus e gomz santel, hag eus Abraham e servijer.

⁴³ Hag e lakaas e bobl da vont er-maez gant laouenidigezh, e re zibabet gant kanaouennoù a levenez.

⁴⁴ Reiñ a reas dezho douaroù ar broadoù, hag e perc'hennjont labour ar pobloù,

⁴⁵ evit ma virjent e reolennoù, ha ma heuilhjent e lezennoù. Meulit an AOTROU!