Salmoù 104 - Bibl Koad 21: Ar Bibl e Brezhoneg evit ar Vretoned

Salm 104

¹ Va ene, bennig an AOTROU! AOTROU va Doue, bras-meurbet out, gwisket a splannder hag a veurded.

² En em baket er sklêrijenn evel un dilhad, ec'h astenn an neñvoù evel un deltenn,

³ sevel a ra e chomlec'h uhel war an doureier, eus ar goabrenn e ra e garr, emañ o pourmen war eskell an avel,

⁴ ober a ra eus e aeled speredoù, eus e servijerien ur flamm-tan.

⁵ Lakaet en deus an douar war e ziazezoù, divrall eo da viken.

⁶ E c'holoet ez poa gant an donder evel gant ur gwiskamant, an doureier en em zalc'he war ar menezioù.

⁷ Da'z kourdrouz, en em dennjont, ouzh trouz da gurun, e tec'hjont.

⁸ Ar menezioù a savas, an traoniennoù a izelaas, el lec'h ma ez poa merket dezho.

⁹ Un harz ec'h eus lakaet d'an doureier ha ne dremenint ket pelloc'h, ne zistroint ket da c'holeiñ an douar.

¹⁰ Kas a ra mammennoù en traoniennoù, hag e redont etre ar menezioù.

¹¹ Holl loened ar parkeier a ev diouto, an ezen gouez a dorr o sec'hed enno.

¹² Laboused an neñv a zo o chom war o ribloù, o kanañ en o delioù.

¹³ Eus e chomlec'h uhel, e toura ar menezioù. An douar a zo leuniet gant frouezh da oberoù.

¹⁴ Lakaat a ra ar foenn da ziwanañ evit al loened, hag ar geot evit servij an den, o lakaat ar bevañs da zont eus an douar,

¹⁵ hag ar gwin a laouena kalon an den hag a laka e zremm da lugerniñ muioc'h eget an eoul, hag ar bara a ro nerzh da galon an den.

¹⁶ Gwez an AOTROU o deus o gwalc'h, hag ivez sedrez al Liban en deus plantet.

¹⁷ Eno eo e ra al laboused o neizhioù, ar siprez eo chomlec'h ar c'hwibon.

¹⁸ Ar menezioù uhel a zo evit ar c'hragvouc'hed, ar reier a zo ur repu evit ar c'honikled.

¹⁹ Graet en deus al loar evit merkañ an amzerioù, an heol a anavez eur e guzh.

²⁰ Degas a rez an deñvalijenn, hag e teu an noz, ma pourmen enni holl loened ar c'hoadoù.

²¹ Al leoned yaouank a yud war-lerc'h ar preizh, hag a c'houlenn digant Doue o boued.

²² An heol a sav, en em denn a reont, hag e c'hourvezont en o zoulloù.

²³ An den a ya d'e labour, ha d'e drevell betek an abardaez.

²⁴ O AOTROU, pegen niverus eo da oberoù! An holl ac'h eus graet gant furnez. An douar a zo leun eus da binvidigezhioù.

²⁵ Hag ar mor bras ha ledan! Eno ez eus loened hep niver, bras ha bihan.

²⁶ Eno e pourmen al listri, hag al Leviatan-se ac'h eus graet evit c'hoari ennañ.

²⁷ An holl a zo en gortoz ac'hanout, evit ma roi dezho o boued e koulz.

²⁸ Hag e roez dezho hag en dastumont; digeriñ a rez da zaouarn hag o deus o gwalc'h a vadoù.

²⁹ Ha kuzhat a rez da zremm? Int a zo kollet. Ha tennañ a rez da alan diouto? Neuze e varvont hag e tistroont en o foultr.

³⁰ Ha kas a rez da Spered? Krouet int hag e nevesaez dremm an douar.

³¹ Ra bado gloar an AOTROU da viken! Ra laouenaio an AOTROU en e oberennoù!

³² Sellout a ra ouzh an douar hag e kren, stekiñ a ra ouzh ar menezioù hag e tivogedont.

³³ Kanañ a rin d'an AOTROU e-keit ha ma vevin, meuliñ a rin va Doue e-keit ha ma padin.

³⁴ Ra vo plijus dezhañ va fedenn! Laouenaat a rin en AOTROU.

³⁵ Ra vo lamet ar bec'herien a-ziwar an douar, ha ra ne vo ken an dud fall! Va ene, bennig an AOTROU! Meulit an AOTROU!