Salmoù 103 - Bibl Koad 21: Ar Bibl e Brezhoneg evit ar Vretoned

Salm 103

¹ Salm David. Va ene, bennig an AOTROU, ha ra vennigo kement a zo ennon e anv santel!

² Va ene, bennig an AOTROU, ha n'ankounac'ha hini eus e vadoberoù!

³ Eñ eo a bardon dit da holl zireizhder, a bare da holl gleñvedoù,

⁴ a denn da vuhez eus ar poull, a gurun ac'hanout a vadelezh hag a druez,

⁵ a leugn da c'henoù a vadoù, ma'z eo da yaouankiz adnevezet evel hini un erer.

⁶ An AOTROU a ro o gwir hag o reizh d'an holl re a zo gwasket.

⁷ Roet en deus da anavezout e hentoù da Voizez, hag e vurzhudoù da vibien Israel.

⁸ An AOTROU a zo truezus ha trugarezus, gorrek da gounnariñ, fonnus e madelezh.

⁹ Ne c'hourdrouz ket da viken, ne zalc'h ket e gounnar bepred,

¹⁰ ne ra ket deomp hervez hor pec'hedoù, ne rent ket deomp hervez hon direizhder.

¹¹ Rak kement emañ an neñvoù savet dreist an douar, kement eo e vadelezh bras e-keñver ar re a zouj anezhañ.

¹² Pellaet en deus diouzhimp hon direizhder, kement ha ma emañ ar sav-heol pell diouzh ar c'huzh-heol.

¹³ Evel m'en deus un tad truez ouzh e vibien, en deus an AOTROU truez ouzh ar re a zouj anezhañ,

¹⁴ rak gouzout a ra eus petra ez omp graet, soñj en deus n'omp nemet poultrenn.

¹⁵ Deizioù an den a zo evel ar geot. Bleuniañ a ra evel bleuñv ar parkeier,

¹⁶ an avel o vezañ tremenet warnañ, n'emañ ken, ha n'eo ken anavezet gant al lec'h m'edo.

¹⁷ Met madelezh an AOTROU a zo a bep amzer ha da viken evit ar re a zouj anezhañ, hag e reizhder evit mibien o mibien,

¹⁸ evit a re a vir e emglev, hag o devez soñj eus e c'hourc'hemennoù evit sentiñ outo.

¹⁹ An AOTROU en deus lakaet e dron en neñvoù, e ren en deus ar galloud war bep tra.

²⁰ Bennigit an AOTROU, c'hwi e aeled, c'hwi hag a zo galloudek e nerzh hag a seven e c'hourc'hemennoù o sentiñ ouzh mouezh e gomz!

²¹ Bennigit an AOTROU, c'hwi e holl armeoù, c'hwi hag a zo e servijerien hag a ra e volontez!

²² Bennigit an AOTROU, c'hwi e holl oberennoù, e pep lec'h e aotrouniezh! Va ene, bennig an AOTROU!