Salmoù 102 - Bibl Koad 21: Ar Bibl e Brezhoneg evit ar Vretoned

Salm 102

¹ Pedenn an den glac'haret, pa'z eo diskaret ha ma skuilh e glemm dirak an AOTROU.

² AOTROU, selaou va fedenn, ha ma'z aio va c'hriadenn betek ennout!

³ Na guzh ket da zremm ouzhin, en deiz va estrenvan, stou da skouarn war-zu ennon, en deiz ma c'halvin ac'hanout, hast buan, respont din!

⁴ Rak va deizioù a ya evel ar moged, ha va eskern a zo devet evel un oaled.

⁵ Va c'halon a zo bet skoet hag he deus disec'het evel ar geot, kement ma em eus ankounac'haet debriñ va bara.

⁶ Dre forzh krial en ur glemm, va eskern a zo staget ouzh va c'hig.

⁷ Heñvel on ouzh pilikant ar gouelec'h, hag ez on evel kaouenn ar mogerioù.

⁸ Beilhañ a ran, hag on heñvel ouzh ur golvan e-unan-penn war un doenn.

⁹ Bemdez ez on tamallet gant va enebourien, ha va heskinerien gounnaret a dou dre va anv.

¹⁰ Rak debret em eus al ludu evel bara, ha mesket em eus va evaj gant daeroù,

¹¹ en abeg da'z kounnar ha da'z fulor. Rak va c'hemeret ha taolet pell ec'h eus.

¹² Va deizioù a zo evel ar skeudenn en he diskar, ha sec'h e teuan evel ar geot.

¹³ Met te, AOTROU, te a ren da viken, ha da vemor a bad a oad da oad.

¹⁴ Sevel a ri, truez az po ouzh Sion, rak poent eo kaout truez outi, an amzer a zo deuet.

¹⁵ Rak da servijerien a gar he mein, hag o deus truez ouzh he foultrenn.

¹⁶ Neuze ar pobloù a zoujo anv an AOTROU, hag holl rouaned an douar da c'hloar,

¹⁷ pa en devo an AOTROU adsavet Sion, pa vo en em ziskouezet en e c'hloar,

¹⁸ pa en devo selaouet goulenn ar re c'hlac'haret, pa n'en devo ket disprizet o goulenn.

¹⁹ Kement-se a vo skrivet evit ar rummad da zont, hag ar bobl a vo krouet a veulo an AOTROU,

²⁰ rak en devo sellet eus lec'h uhel e santelezh, hag en devo eus an neñvoù taolet e zaoulagad war an douar,

²¹ evit klevout garmoù ar sklaved, evit dieubiñ ar re a zo gouestlet d'ar marv,

²² evit ma vo lidet anv an AOTROU e Sion, hag e veuleudi e Jeruzalem,

²³ pa vo dastumet ar pobloù hag an holl rouantelezhioù, evit servijañ an AOTROU.

²⁴ Diskaret en deus va nerzh en hent, berraet en deus va deizioù.

²⁵ Lavaret em eus: Va Doue, na'm dilam ket e-kreiz va deizioù. Da vloavezhioù a bad a oad da oad.

²⁶ Gwechall ec'h eus diazezet an douar, hag an neñvoù a zo labour da zaouarn.

²⁷ Da netra e teuint met e chomi, koshaat a raint holl evel ur gwiskamant, hag e cheñchi anezho evel ur vantell hag e vint cheñchet,

²⁸ met te a zo bepred an hevelep hini, ha da vloavezhioù n'echuint ket.

²⁹ Mibien da servijerien a vo o chom en diskuizh, hag o lignez a vo startaet dirazout.