Salmoù 101 - Bibl Koad 21: Ar Bibl e Brezhoneg evit ar Vretoned

Salm 101

¹ Salm David. Kanañ a rin an drugarez hag ar reizhder; AOTROU, meuliñ a rin ac'hanout!

² Teurel a rin evezh ouzh hent an eeunder. Pegoulz e teui da'm c'havout? Kerzhout a rin en eeunder va c'halon e-barzh va zi.

³ Ne lakain netra fall dirak va daoulagad. Kasaat a ran kundu an dorrerien, n'en em stago ket ouzhin.

⁴ Ar galon fallakr a bellaio diouzhin. N'anavezin ket an den drouk.

⁵ Lemel a rin kuit an hini a zroukkomz e kuzh diwar-benn e nesañ. Ne c'hellin ket padout gant an hini en deus ar sell faeüs hag ar galon c'hwezet.

⁶ Va daoulagad a vo war dud feal ar vro, evit ma chomint ganin. An hini a gerzh war hent an eeunder am servijo.

⁷ An hini a ra touellerezh ne chomo ket em zi. An hini a lavar gaou ne bado ket dirak va daoulagad.

⁸ Bep mintin e tistrujin holl dud fall ar vro, evit tennañ kuit eus kêr an AOTROU an holl vicherourien a zireizhder.