Romaned 2 - Bibl Koad 21: Ar Bibl e Brezhoneg evit ar Vretoned

Pennad 2 Barnedigezh Doue a zo reizh

¹ Te eta, o den, piv bennak ez out pa varnez, te a zo dibardon, rak, o varn ar re all, e varnez da-unan, peogwir te a varn hag a ra an hevelep traoù.

² Hogen gouzout a reomp penaos barnedigezh Doue a-enep ar re a ra ar seurt traoù-se a zo hervez ar wirionez.

³ Ha te a soñj dit eta, o den hag a varn ar re a ra ar seurt traoù-se hag o gra da-unan, e c’helli tec’hout diouzh barnedigezh Doue?

⁴ Pe disprizañ a rez pinvidigezhioù e vadelezh, e basianted hag e hir gortozidigezh, hep anavezout e c’halv madelezh Doue ac’hanout d’ar geuzidigezh?

⁵ Met dre da galeted ha da galon dibened, e tastumez un teñzor a fulor evit deiz fulor ha diskuliadur barnedigezh reizh Doue,

⁶ pa roio en-dro da bep hini hervez e oberoù,

⁷ ar vuhez peurbadus d’ar re a gendalc’h en oberoù mat, a glask ar gloar, an enor hag an divreinadurezh,

⁸ met droukc’hras ha fulor d’an dabuterien, d’ar re a stourm ouzh ar wirionez hag a sent ouzh an direizhder,

⁹ glac’har hag anken war bep ene den a ra an droug, war ar Yuzev da gentañ, ha goude war ar Gresian,

¹⁰ met gloar, enor ha peoc’h da bep den a ra ar mad, d’ar Yuzev da gentañ, ha goude d’ar Gresian.

¹¹ Rak Doue ne ra van ebet eus diavaezioù an dud.

¹² Ar re holl o devo pec’het hep al lezenn, a varvo ivez hep al lezenn, hag ar re holl o devo pec’het o kaout al lezenn, a vo barnet dre al lezenn.

¹³ Rak n’eo ket ar re a selaou al lezenn a zo reizh dirak Doue, met ar re a vir al lezenn eo ar re a vo reishaet.

¹⁴ Pa zeu ar baganed, int ha n’o deus ket al lezenn, da ober dre natur ar pezh a zo el lezenn, ez int ul lezenn dezho o-unan, o vezañ n’o deus ket al lezenn,

¹⁵ diskouez a reont penaos oberenn al lezenn a zo skrivet en o c’halonoù, o c’houstiañs a ro testeni dezho hag o soñjoù en em damall pe en em zigarez etrezo,

¹⁶ en deiz ma varno Doue oberoù kuzhet an dud dre Jezuz-Krist, hervez va Aviel.

Ar Yuzevien hag al lezenn

¹⁷ Setu, te a zo anvet Yuzev, en em harp war al lezenn, a denn gloar eus Doue,

¹⁸ a anavez e volontez, a gav mat ar pezh a zo dispar, o vezañ desket dre al lezenn,

¹⁹ a gred bezañ rener ar re dall, sklêrijenn ar re a zo en deñvalijenn,

²⁰ doktor ar re ziouiziek, mestr ar re hegredik, o kaout el lezenn reolenn ar c’houiziegezh hag ar wirionez.

²¹ Te eta, a gelenn ar re all, ha n’en em gelennez ket da-unan? Te a brezeg na dleer ket laerezh, hag e laerez?

²² Te a lavar na dleer ket ober avoultriezh, hag e rez avoultriezh? Te a gasa an idoloù, hag e laerez temploù?

²³ Te a denn gloar eus al lezenn, hag e tizenor Doue o terriñ al lezenn?

²⁴ Rak anv Doue a zo mezhekaet e-touez ar baganed en abeg deoc’h, evel ma’z eo kement-se skrivet.

²⁵ Gwir eo ez eo an amdroc’h talvoudek mar virez al lezenn, met mar d-out un torrer eus al lezenn, da amdroc’h a zeu da vezañ diamdroc’h.

²⁶ Mar mir eta an hini n’eo ket amdroc’het gourc’hemennoù al lezenn, e ziamdroc’h ha ne vo ket kontet evel amdroc’h?

²⁷ Ha mar mir al lezenn an hini n’eo ket amdroc’het dre natur, ha ne varno ket ac’hanout, te hag a dorr al lezenn gant da lizherenn ha da amdroc’h?

²⁸ Rak n’eo ket Yuzev an neb n’eo nemet en diavaez, ha n’eo ket an amdroc’h an hini a zo graet en diavaez er c’hig,

²⁹ met eus an diabarzh eo e vezer Yuzev, hag an amdroc’h a zo hini ar galon, hervez ar spered ha nann hervez al lizherenn. E veuleudi ne zeu ket eus an dud, met eus Doue.