Romaned 14 - Bibl Koad 21: Ar Bibl e Brezhoneg evit ar Vretoned

Pennad 14 Lezenn ar frankiz ha lezenn ar garantez

¹ Degemerit an hini a zo dinerzh er feiz hep tabut diwar-benn e soñjoù.

² Unan a gred gallout debriñ a bep tra, met an hini a zo dinerzh ne zebr nemet legumaj.

³ An hini a zebr, ra ne zisprizo ket an hini na zebr ket, hag an hini na zebr ket, ra ne varno ket an hini a zebr, rak Doue en deus e degemeret.

⁴ Piv out-te evit barn servijer unan all? Mar dalc’h en e sav pe mar kouezh, d’e vestr eo da varn anezhañ. Met e chomo e en sav rak Doue a zo galloudus evit e lakaat da chom en e sav.

⁵ Unan a gav un deiz dreist un deiz all, unan all a gav an holl zeizioù heñvel. Ra vo pep hini kendrec’het en e soñjoù e-unan.

⁶ An hini a laka kemm etre an deizioù, a laka kemm abalamour d’an Aotrou, hag an hini na laka kemm etrezo, na laka kemm abalamour d’an Aotrou. An hini a zebr, a zebr abalamour d’an Aotrou, rak trugarekaat a ra Doue, hag an hini na zebr ket, na zebr ket abalamour d’an Aotrou, ha trugarekaat a ra Doue.

⁷ Rak hini ac’hanomp ne vev evitañ e-unan hag hini ne varv evitañ e-unan.

⁸ Mar bevomp, e vevomp evit an Aotrou, ha mar marvomp, e varvomp evit an Aotrou. Pe eta e vevomp, pe e varvomp, ez omp d’an Aotrou.

⁹ Rak evit-se eo Krist marvet, eo adsavet a-varv hag en deus adkemeret ar vuhez, evit ma reno war ar re vev ha war ar re varv.

¹⁰ Met te, perak e varnez da vreur? Pe te, perak e tisprizez da vreur? Pa’z eo gwir ez aimp holl dirak lez-varn Krist.

¹¹ Rak skrivet eo: Me a zo bev, eme an Aotrou, pep glin a blego dirazon ha pep teod a roio gloar da Zoue.

¹² Evel-se pep hini ac’hanomp a rento kont da Zoue evitañ e-unan.

¹³ N’en em varnomp mui eta an eil egile, met kentoc’h barnit penaos na dleit ket lakaat un maen-kouezh pe reiñ un abeg a wallskouer d’ho preur.

¹⁴ Gouzout a ran, ha sur mat on dre an Aotrou Jezuz n’eus netra dic’hlan anezhañ e-unan, koulskoude, an hini a gred ez eo un dra dic’hlan, an dra-se a zo dic’hlan evitañ.

¹⁵ Met mar d-eo da vreur glac’haret diwar-benn ur boued, ne gerzh ken hervez ar garantez. Na laka ket da vont da goll dre da voued an hini hag a zo Krist marvet evitañ.

¹⁶ Ra ne vo ket droukkomzet eus ho treistelezh,

¹⁷ rak rouantelezh Doue n’emañ ket an debriñ pe an evañ, met reizhder, peoc’h ha levenez er Spered-Santel.

¹⁸ An hini a servij Krist en doare-se a blij da Zoue hag a vez kavet mat gant an dud.

¹⁹ Klaskomp eta an traoù a gas d’ar peoc’h hag a c’hell kenteliañ an eil egile.

²⁰ Na zistruj ket oberenn Doue evit ur boued. Gwir eo ez eo glan an holl draoù, met fall eo d’an den debriñ anezho en ur zont ur maen-kouezh.

²¹ Mat eo tremen hep debriñ kig, nag evañ gwin ha kemer netra eus ar pezh a c’hell lakaat da vreur da strebotiñ pe e lakaat da gouezhañ pe e zinerzhañ.

²² Ha te ac’h eus ar feiz? Mir anezhi ennout da-unan dirak Doue. Eürus eo an hini n’en em goñdaon ket e-unan er pezh a gav mat.

²³ Met an hini en deus douetañs a zo koñdaonet mar debr, rak n’en gra ket gant feiz. Ha kement tra na reer ket gant feiz a zo ur pec’hed.