Ozea 12 - Bibl Koad 21: Ar Bibl e Brezhoneg evit ar Vretoned

Pennad 12

¹ Efraim en deus enkelc'hiet ac'hanon a c'hevier, ha ti Israel a douellerezh. Juda a zo c'hoazh o ren gant Doue hag a zo feal ouzh ar sent.

² Efraim a beur avel hag a red war-lerc'h avel ar sav-heol. Bemdez e lieskement ar gaou hag an taerder. Ober a ra emglev gant Asiria, hag e kas eoul d'an Ejipt.

³ An AOTROU en deus ivez ur prosez gant Juda. Kastizañ a raio Jakob evit e hentoù, hag e taskoro dezhañ hervez e oberoù

⁴ Adalek kof e vamm e touellas e vreur, hag en e nerzh-gour e c'hourenas gant Doue.

⁵ Gouren a reas gant an ael, hag e oa an hini kreñvañ; gouelañ a reas hag e c'houlennas trugarez. E Betel en kavas, hag eno e komzas ouzhimp.

⁶ An AOTROU eo Doue an armeoù. E anv eo an AOTROU.

⁷ Te eta, distro da'z Toue, mir an drugarez hag ar reizhder, esper dalc'hmat ez Toue.

⁸ Efraim a zo ur marc’hadour en deus balañsoù faos en e zaouarn. Plijout a ra dezhañ touellañ.

⁹ Ha lavaret en deus Efraim: Ya, deuet on da vezañ pinvidik, prenet em eus traoù prizius, em holl labourioù ne vo kavet direizhder ebet, netra hag a vefe ur pec'hed.

¹⁰ Ha me eo an AOTROU da Zoue adalek bro Ejipt, me a raio dit chom c'hoazh dindan teltennoù, evel da zeizioù ar gouelioù.

¹¹ Komzet em eus dre ar brofeded, liesaet gweledigezhioù ha kinniget parabolennoù dre zorn ar brofeded.

¹² Ma n'eo Galaad nemet direizhder, a-dra-sur e vint kaset da netra. Aberzhet o deus oc'hen e Gilgal, o aoterioù a zo evel bernioù mein war irvi ar parkeier.

¹³ Jakob a dec'has da vro Siria, Israel a servijas evit ur vaouez, hag evit ur vaouez e vêsaas loened.

¹⁴ Dre ur profed, an AOTROU a reas da Israel pignat eus an Ejipt, dre ur profed e voe mêsaet.

¹⁵ Efraim en deus va daeet betek ur gounnar c'hwerv, setu perak e pouezo warnañ ar gwad en deus skuilhet, hag e Aotrou a zaskoro dezhañ e zismegañs.