Niveroù 9 - Bibl Koad 21: Ar Bibl e Brezhoneg evit ar Vretoned

Pennad 9 Ar Pask lidet e gouelec'h Sinai. Ar goabrenn war an tabernakl

¹ An AOTROU a gomzas da Voizez e gouelec'h Sinai, d'an eil bloaz goude ma oant aet kuit eus bro Ejipt, er miz kentañ, o lavarout:

² Ra raio mibien Israel ar Pask en e amzer.

³ D'ar pevarzekvet deiz eus ar miz-se, etre an daou abardaez, e lidot anezhañ d'an amzer dereat; e lidañ a reot hervez e holl reolennoù hag e holl lezennoù.

⁴ Moizez a gomzas da vibien Israel evit ma rafent ar Pask.

⁵ Hag e rejont ar Pask er miz kentañ, d'ar pevarzekvet deiz eus ar miz, etre an daou abardaez, e gouelec'h Sinai. Mibien Israel a reas hervez kement en doa gourc'hemennet an AOTROU da Voizez.

⁶ Bez' e voe tud na c'hellent ket ober ar Pask en deiz-se, o vezañ dic'hlan abalamour d'un den marv. Dont a rejont da gavout Moizez hag Aaron en deiz-se,

⁷ hag e lavarjont: Dic'hlan omp abalamour d'un den marv, perak e vimp dioueret eus kinnig ar prof d'an AOTROU en amzer dereat e-touez mibien Israel?

⁸ Moizez a lavaras: Gortozit hag e selaouin ar pezh a lavaro an AOTROU evidoc'h.

⁹ An AOTROU a gomzas da Voizez o lavarout:

¹⁰ Komz da vibien Israel ha lavar: Mard eo unan bennak ac'hanoc'h pe eus ho lignez dic'hlan abalamour d'un den marv, pe en beaj pell, e raio ar Pask d'an AOTROU;

¹¹ d'an eil miz, d'ar pevarzekvet deiz, etre an daou abardaez, e tebrint anezhañ gant bara hep goell ha louzoù c'hwerv,

¹² ne lezint mann dioutañ betek ar beure ha ne dorrint askorn ebet dezhañ; e lidañ a raint hervez holl reolennoù ar Pask.

¹³ Diwar-benn an den glan ha n'emañ ket en beaj, mar tremen hep ober ar Pask, lamet e vo eus e bobl rak n'en deus ket kinniget ar prof d'an AOTROU en amzer dereat; an den-se a zougo e bec'hed.

¹⁴ Mar gra ar Pask d'an AOTROU un diavaeziad a zo o chom en ho touez, e raio anezhañ hervez reolennoù ha lezennoù ar Pask. An hevelep reolennoù ho po, an diavaeziad evel an henvroad.

¹⁵ D'an deiz ma voe savet an tabernakl, ar goabrenn a c'holoas an tabernakl, teltenn an Testeni; d'abardaez e voe war an tabernakl evel un neuz a dan, betek ar beure.

¹⁶ Evel-se e veze dalc'hmat: ar goabrenn a c'holoe anezhañ, hag e oa en noz un neuz a dan.

¹⁷ Pa save ar goabrenn a-ziwar an deltenn, mibien Israel a yae kuit; e-lec'h ma chome ar goabrenn, eno e kampe mibien Israel.

¹⁸ Mibien Israel a yae kuit war c'hourc'hemenn an AOTROU, hag e kampent war c'hourc'hemenn an AOTROU; e-keit ha ma chome ar goabrenn war an tabernakl, e kampent.

¹⁹ Pa chome ar goabrenn kalz deizioù war an tabernakl, mibien Israel a vire urzh an AOTROU ha n'aent ket kuit.

²⁰ Pa veze ar goabrenn nebeut deizioù war an tabernakl, war c'hourc'hemenn an AOTROU e kampent ha war c'hourc'hemenn an AOTROU ez aent kuit.

²¹ Pa veze eno ar goabrenn adalek an abardaez betek ar beure hag e save ar goabrenn diouzh ar beure, ez aent kuit; deiz pe noz, pa save ar goabrenn, ez aent kuit.

²² Pe daou zevezh pe ur miz pe ur bloaz, e-keit ha ma chome difiñv ar goabrenn war an tabernakl, mibien Israel a gampe ha n'aent ket kuit; pa save, ez aent kuit.

²³ War c'hourc'hemenn an AOTROU e kampent, ha war c'hourc'hemenn an AOTROU ez aent kuit. Mirout a raent urzh an AOTROU, war c'hourc'hemenn an AOTROU dre Voizez.