Niveroù 8 - Bibl Koad 21: Ar Bibl e Brezhoneg evit ar Vretoned

Pennad 8 Al lampoù war ar c'hantolor. Gouestladur al Levited

¹ An AOTROU a gomzas da Voizez o lavarout:

² Komz da Aaron ha lavar: Pa enaoui al lampoù, ar seizh lamp a sklêrijenno dirak ar c'hantolor.

³ Aaron a reas evel-se, enaouiñ a reas al lampoù tuet dirak ar c'hantolor, evel m'en doa gourc'hemennet an AOTROU da Voizez.

⁴ Setu penaos e oa graet ar c'hantolor: en aour e oa, graet gant ar morzhol, betek e droad, betek e vleunioù, e oa graet gant ar morzhol; graet e voe ar c'hantolor hervez ar skouer en doa diskouezet an AOTROU da Voizez.

⁵ An AOTROU a gomzas da Voizez o lavarout:

⁶ Kemer al Levited a-douez mibien Israel ha glana anezho.

⁷ Evel-henn e ri dezho evit o glanaat: gra warno sparfadur an dour-dic'haouiñ, hag e raint d'an aotenn tremen war o c'horf, e walc'hint o dilhad hag en em c'hlanaint.

⁸ Kemer a raint ur c'hole yaouank gant an donezon a flour bleud mezet gant eoul, hag e kemeri un eil kole yaouank evit an aberzh-dic'haouiñ.

⁹ Te a lakaio al Levited da dostaat dirak teltenn an engalv, hag e tastumi holl vodadenn mibien Israel.

¹⁰ Lakaat a ri al Levited da dostaat dirak an AOTROU, ha mibien Israel a lakaio o daouarn war al Levited.

¹¹ Aaron a lakaio al Levited da dreiñ tu-pe-du dirak an AOTROU evel ur prof a-berzh mibien Israel, evit ma raint servij an AOTROU.

¹² Al Levited a lakaio o daouarn war benn ar c'holeoù, hag e kinnigi unan evel aberzh-dic'haouiñ hag egile evel loskaberzh, evit ober dic'haou evit al Levited.

¹³ Lakaat a ri al Levited d'en em zerc'hel dirak Aaron ha dirak e vibien, hag e lakai anezho da dreiñ tu-pe-du evel ur prof d'an AOTROU.

¹⁴ Lakaat a ri al Levited a-du a-douez mibien Israel, hag al Levited a vo din.

¹⁵ Goude-se e teuio al Levited d'ober servij teltenn an engalv. O glanaat a ri eta hag e lakai anezho da dreiñ tu-pe-du evel ur prof.

¹⁶ Rak holl int roet din a-douez mibien Israel, o c'hemeret em eus evidon e-lec'h ar re o deus digoret ar mammog, ar re gentañ-ganet eus mibien Israel.

¹⁷ Pep kentañ-ganet eus mibien Israel a zo din, e-touez an dud hag e-touez al loened. D'an deiz em eus skoet pep kentañ-ganet e bro Ejipt, em eus santelaet anezho.

¹⁸ Kemeret em eus al Levited e-lec'h an holl gentañ-ganet eus mibien Israel.

¹⁹ Roet em eus al Levited da Aaron ha d'e vibien, evel ur roadenn a-douez mibien Israel, evit ober servij mibien Israel e teltenn an engalv hag evit ober dic'haou evit mibien Israel, ma ne vo gouli ebet e-touez mibien Israel pa dostaint ouzh ar santual.

²⁰ Moizez, Aaron hag holl vodadenn mibien Israel a reas e-keñver al Levited hervez kement en doa gourc'hemennet an AOTROU da Voizez diwar-benn al Levited; evel-se e reas mibien Israel.

²¹ Al Levited en em c'hlanaas hag a walc'has o dilhad; Aaron a lakaas anezho da dreiñ tu-pe-du evel ur prof dirak an AOTROU, hag e reas dic'haou evito Aaron, evit o glanaat.

²² Goude-se e teuas al Levited d'ober ar servij e teltenn an engalv dirak Aaron ha dirak e vibien, hervez kement en doa gourc'hemennet an AOTROU da Voizez diwar-benn al Levited; evel-se e voe graet en o c'heñver.

²³ An AOTROU a gomzas da Voizez o lavarout:

²⁴ Diwar-benn al Levited, adalek an oad a bemp bloaz warn-ugent hag ouzhpenn, pep hini a zeuio d'ober ar servij e teltenn an engalv.

²⁵ Adalek an oad a hanter-kant vloaz, e yelo er-maez eus ar servij, ha ne servijo ken,

²⁶ hag e sikouro e vreudeur e teltenn an engalv, o tiwall ar pezh a vo fiziet enno, met ne raio ken ar servij. Evel-se e ri diwar-benn al Levited, e-keñver o c'harg.