Niveroù 5 - Bibl Koad 21: Ar Bibl e Brezhoneg evit ar Vretoned

Pennad 5 Lezennoù war an dic'hlanded, al laeroñsi, ar warizi

¹ An AOTROU a gomzas da Voizez o lavarout:

² Gourc'hemenn da vibien Israel kas kuit eus ar c'hamp kement hini lovr, kement hini en deus ur berad ha kement hini saotret dre ur marv.

³ O c'has a reot kuit, gwaz pe gwreg, o c'has a reot er-maez eus ar c'hamp, evit na saotrint ket ar c'hamp m'emaon o chom ennañ.

⁴ Mibien Israel a reas evel-se hag e kasjont anezho er-maez eus ar c'hamp, evel m'en doa gourc'hemennet an AOTROU da Voizez; evel-se e reas mibien Israel.

⁵ An AOTROU a gomzas da Voizez o lavarout:

⁶ Komz da vibien Israel: Pa o devo graet ur gwaz pe ur wreg ur pec'hed bennak evel ar re a reer e-keñver an dud, o tismegañsiñ an AOTROU, ha ma vo evel-se en em lakaet kablus,

⁷ ec'h anzavo ar pec'hed en devo graet, e tic'haouo an dismegañs en ur lakaat ouzhpenn ar bempvedenn, hag e roio anezhañ d'an hini eo en em lakaet kablus en e geñver.

⁸ Ma n'eus den ebet evit dic'haouiñ an dismegañs en e geñver, dic'haouet e vo an dismegañs e-keñver an AOTROU, e-keñver an aberzhour, ouzhpenn an tourz-dic'haouiñ da brofañ.

⁹ Pep prof savet eus an holl draoù santelaet a ginnigo mibien Israel d'an aberzhour a vo dezhañ.

¹⁰ An traoù santelaet a ginnigo pep hini, ar pezh a roio pep hini d'an aberzhour, a vo dezhañ.

¹¹ An AOTROU a gomzas da Voizez o lavarout:

¹² Komz da vibien Israel ha lavar: Mard eo distroet gwreg unan bennak diouzh he fried ha mar gra un dismegañs en e geñver,

¹³ mar en deus bet ur gwaz darempred reizhel ganti ha ma vefe an dra kuzhet da zaoulagad he fried, mard eo en em saotret e kuzh, hep test en hec'h enep hag hep bezañ souprenet,

¹⁴ ha mar krog ennañ ur spered a warizi ha ma en defe oaz eus e wreg a zo en em saotret, pe mar krog ennañ ur spered a warizi ha ma en defe oaz eus e wreg ha n'eo ket en em saotret,

¹⁵ an den-se a zegaso e wreg dirak an aberzhour hag a zezougo eviti e brof, un dekvedenn efa (1/10 efa   3 l) bleud heiz; ne skuilho ket warnañ eoul, ne lakaio ket ezañs ennañ, rak ur prof a warizi eo, ur prof-eñvor evit kounaat un direizhder.

¹⁶ An aberzhour a lakaio anezhi da dostaat ha d'en em zerc'hel dirak an AOTROU.

¹⁷ An aberzhour a gemero dour santel en ul lestr-pri; an aberzhour a gemero poultr diwar leur an tabernakl hag en lakaio en dour.

¹⁸ An aberzhour a lakaio ar wreg d'en em zerc'hel dirak an AOTROU; dizoleiñ a raio penn ar wreg hag e lakaio en he daouarn ar prof-eñvor, da lavarout eo ar prof a warizi; an aberzhour en devo en e zaouarn an dour c'hwerv a zoug ar vallozh.

¹⁹ An aberzhour a raio d'ar wreg touiñ, hag e lavaro dezhi: Ma n'en deus kousket den ganit, ma n'out ket distroet diouzh da ozhac'h hag en em saotret, na'z pez droug ebet eus an dour c'hwerv-se a zoug ar vallozh.

²⁰ Met mard out distroet diouzh da ozhac'h hag out en em saotret, ha mar en deus kousket ganit un den estreget da ozhac'h,

²¹ neuze an aberzhour a raio d'ar wreg touiñ gant ul le a vallozh, hag an aberzhour a lavaro dezhi: Ra daolo an AOTROU ac'hanout da vallozh ha da zroukskouer e-touez da bobl, o lakaat da vorzhed da vreinañ ha da gof da goeñviñ,

²² hag an dour-se a zoug ar vallozh a yelo ez pouzelloù evit lakaat da gof da goeñviñ ha da vorzhed da vreinañ. Hag ar wreg a lavaro: Amen! Amen!

²³ An aberzhour a skrivo ar mallozhioù-mañ en ul levr, hag e tiverko anezho en dour c'hwerv.

²⁴ Hag e lakaio ar wreg da evañ an dour c'hwerv a zoug ar vallozh, hag an dour a zoug ar vallozh a yelo enni hag a vo c'hwerv dezhi.

²⁵ An aberzhour a gemero eus dorn ar wreg ar prof a warizi a hejo evel ur prof dirak an AOTROU, hag en kinnigo war an aoter.

²⁶ An aberzhour a gemero un dornad eus ar prof, an eñvor a lakaio da vogediñ war an aoter. Ha goude e raio d'ar wreg evañ an dour.

²⁷ P'en devo graet dezhi evañ an dour, mard eo gwir eo en em saotret hag he deus graet un dismegañs e-keñver hec'h ozhac'h, an dour a zoug ar vallozh a yelo enni hag a vo c'hwerv dezhi, he c'hof a goeñvo, he morzhed a vreino, hag ar wreg a vo ur vallozh e-touez he fobl.

²⁸ Met ma n'eo ket ar wreg en em saotret ha mard eo glan, n'he devo droug ebet hag e c'hano bugale.

²⁹ Setu al lezenn diwar-benn ar warizi, p'he devo distroet ur wreg diouzh hec'h ozhac'h hag en em saotret,

³⁰ pe pa grog en hec'h ozhac'h ur spered a warizi ha ma en deus hemañ oaz eus e wreg; degas a raio ar wreg dirak an AOTROU, hag an aberzhour a raio eviti hervez al lezenn.

³¹ An ozhac'h a vo kuit a zireizhder, met ar wreg a zougo he direizhder.