Niveroù 4 - Bibl Koad 21: Ar Bibl e Brezhoneg evit ar Vretoned

Pennad 4 Kargoù tiegezhioù al Levited

¹ An AOTROU a gomzas da Voizez ha da Aaron o lavarout:

² Gra an niveradeg eus mibien Kehad a-douez mibien Levi, hervez o ziegezhioù, hervez tiez o zadoù,

³ adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ e teltenn an engalv.

⁴ Setu servij mibien Kehad e teltenn an engalv, e sant ar sent.

⁵ Pa yelo ar c'hamp kuit, Aaron hag e vibien a zeuio da ziskenn ar ouel-warez, hag e c'holoint ganti arc'h an Testeni;

⁶ warni e lakaint ur golo krec'hin a liv hiasint hag ec'h astennint dreist ul liñsel, en he fezh gant limestra, ha neuze e lakaint ar barrennoù.

⁷ Astenn a raint ul liñsel limestra war daol ar baraoù a ginnig hag e lakaint warni ar pladoù, an tasoù, al listri hag an hanafoù evit an evajoù-kinnig; ar bara peurbad a vo warni,

⁸ hag ec'h astennint war an traoù-se ul liñsel ruz-mouk, e c'holoint anezhi gant ur golo e krec'hin a liv hiasint, ha neuze e lakaint ar barrennoù.

⁹ Kemer a raint ul liñsel limestra hag e c'holoint ganti ar c'hantolor, e lampoù, e c'hevelioù, e bodoù-ludu hag e listri-eoul evit ober ar servij,

¹⁰ hag e lakaint anezhañ gant e holl draoù en ur golo krec'hin a liv hiasint, ha neuze e lakaint anezho war ur c'hravazh.

¹¹ Astenn a raint ul liñsel limestra war an aoter aour hag e c'holoint anezhi gant ur golo krec'hin a liv hiasint, ha neuze e lakaint ar barrennoù.

¹² Kemer a raint holl draoù ar servij a vez implijet er santual hag e lakaint anezho en ul liñsel limestra, e c'holoint anezho gant ur golo krec'hin a liv hiasint, ha neuze e lakaint anezho war ur c'hravazh.

¹³ Lemel a raint al ludu eus an aoter hag ec'h astennint warni ul liñsel tane;

¹⁴ warni e lakaint an holl draoù implijet en he servij, ar podoù-glaou-bev, ar fourchetezioù, ar palioù, an hanafoù, holl draoù an aoter, ec'h astennint dreist ur golo krec'hin a liv hiasint, ha neuze e lakaint ar barrennoù.

¹⁵ Goude m'o devo echuet Aaron hag e vibien da c’holeiñ ar santual ha traoù ar santual, pa'z aio ar c'hamp kuit, mibien Kehad a zeuio evit o dougen. Met ne stokint ket ouzh an traoù santel gant aon na varvfent. Setu karg mibien Kehad e-keñver teltenn an engalv.

¹⁶ Eleazar, mab Aaron an aberzhour, en devo da eveshaat ouzh eoul al lampoù, ouzh an ezañs a c'hwezh-vat, ouzh ar prof peurbad hag ouzh eoul an oleviadur. Eñ en devo da eveshaat ouzh an holl dabernakl hag ouzh an holl bezh a vo e-barzh, ar santual hag e draoù.

¹⁷ An AOTROU a gomzas da Voizez ha da Aaron o lavarout:

¹⁸ Na zilamit ket meuriad tiegezhioù ar C'heatited a-douez al Levited.

¹⁹ Kement-mañ a reot evit ma vevint ha na varvint ket pa dostaint ouzh sant ar sent: Ra zeuio Aaron hag e vibien evit lakaat pep hini d'e servij ha d'e garg,

²⁰ met ned aint ket e-barzh da welout pa vo goloet an traoù santel, gant aon na varvfent.

²¹ An AOTROU a gomzas da Voizez o lavarout:

²² Gra an niveradeg eus mibien Gershon, hervez tiez o zadoù, hervez o ziegezhioù,

²³ kont anezho adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ e teltenn an engalv.

²⁴ Setu servij tiegezhioù ar C'hershonited, o servij hag o c'harg.

²⁵ Dougen a raint pallennoù an tabernakl ha teltenn an engalv, he golo hag ar golo krec'hin a liv hiasint a vez lakaet dreist, ar rideoz evit digor teltenn an engalv,

²⁶ lienoù al leurenn, ar rideoz evit dor al leurenn en-dro d'an tabernakl ha d'an aoter, ar c'herdin hag an holl draoù a vez implijet. Ober a raint ar servij a sell outo.

²⁷ Dindan urzhioù Aaron hag e vibien e vo graet ar servij gant mibien Gershon, e kement ha ma tleint dougen hag e kement ha ma tleint ober; roet e vo dezho ar garg eus kement o devo da zougen.

²⁸ Setu servij tiegezhioù mibien Gershon e teltenn an engalv; o labour a vo dindan urzh Itamar, mab an aberzhour Aaron.

²⁹ Niveriñ a ri mibien Merari, hervez o ziegezhioù, hervez tiez o zadoù,

³⁰ kont anezho adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ e teltenn an engalv.

³¹ Setu ar servij fiziet enno ha kement o devo da zougen evit o servij e teltenn an engalv: plenk an tabernakl, e varrennoù, e golonennoù, e sichennoù,

³² kolonennoù al leurenn tro-dro, o sichennoù, o feulioù, o c'herdin hag an holl draoù a vez implijet; hag e niverot dre o anvioù an holl draoù bet roet ar garg dezho hag o devo da zougen.

³³ Setu servij tiegezhioù mibien Merari e teltenn an engalv, o holl servij dindan urzh Itamar, mab an aberzhour Aaron.

³⁴ Moizez, Aaron ha priñsed ar vodadenn a niveras mibien Kehad, hervez o ziegezhioù, hervez tiez o zadoù,

³⁵ adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ e teltenn an engalv.

³⁶ Ar re niveret hervez o ziegezhioù a voe daou vil seizh kant hag hanter-kant.

³⁷ Setu ar re niveret eus tiegezhioù ar Gehatited, an holl re a servij e teltenn an engalv, niveret gant Moizez hag Aaron evel m'en doa gourc'hemennet an AOTROU da Voizez.

³⁸ Ar re niveret eus mibien Gershon, hervez o ziegezhioù, hervez tiez o zadoù,

³⁹ adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ e teltenn an engalv,

⁴⁰ ar re niveret, hervez o ziegezhioù, hervez tiez o zadoù, a voe daou vil c'hwec'h kant tregont.

⁴¹ Setu ar re niveret eus tiegezhioù mibien Gershon, an holl re a servij e teltenn an engalv, niveret gant Moizez hag Aaron evel m'en doa gourc'hemennet an AOTROU.

⁴² Ar re niveret eus tiegezhioù mibien Merari, hervez o ziegezhioù, hervez tiez o zadoù,

⁴³ adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijout e teltenn an engalv,

⁴⁴ ar re niveret, hervez o ziegezhioù, a voe tri mil daou c'hant.

⁴⁵ Setu ar re niveret eus tiegezhioù mibien Merari, niveret gant Moizez hag Aaron evel m'en doa gourc'hemennet an AOTROU da Voizez.

⁴⁶ Ar re niveret eus al Levited gant Moizez, Aaron ha priñsed ar vodadenn, hervez o ziegezhioù, hervez tiez o zadoù,

⁴⁷ adalek an oad a dregont vloaz hag ouzhpenn betek an oad a hanter-kant vloaz, an holl re a ya er rumm evit servijañ hag evit dougen e teltenn an engalv,

⁴⁸ ar re niveret a voe eizh mil pemp kant ha pevar-ugent.

⁴⁹ Niveret int bet hervez an urzh en doa roet an AOTROU da Voizez, pep hini hervez e servij hag hervez e garg; niveret int bet evel m'en doa gourc'hemennet an AOTROU da Voizez.