Niveroù 34 - Bibl Koad 21: Ar Bibl e Brezhoneg evit ar Vretoned

Pennad 34 Harzoù ha rannadur bro Ganaan

¹ An AOTROU a gomzas da Voizez o lavarout:

² Ro urzhioù da vibien Israel ha lavar: Pa viot aet e bro Ganaan, degouezhet e vo ar vro-se deoc'h evel hêrezh, ar vro Ganaan hervez an harzoù-mañ:

³ Ho pevennoù kreisteiz a vo adalek gouelec'h Zin a-hed Edom; evel-se hoc'h harz kreisteiz a yelo adalek Mor an Holen er reter,

⁴ an harz kreisteiz-se a droio da grec'hienn Akrabim, a dreuzo Zin, a yelo betek kreisteiz Kadesh-Barnea, a yelo da Hazar-Adar hag a dremeno dre Azmon;

⁵ eus Azmon, an harz a droio war-zu froud an Ejipt, hag a yelo d'ar mor.

⁶ Diwar-benn harz ar c'huzh-heol, ar Mor Bras a vo an harz evidoc'h, hoc'h harz kornog e vo.

⁷ Diwar-benn harz an hanternoz, e verkot anezhañ adalek ar Mor Bras betek Menez Hor;

⁸ eus Menez e verkot anezhañ etrezek penn Hamad, goude e yelo betek Zedad,

⁹ an harz a yelo betek Zifron da echuiñ en Hazar-Enan; hoc'h harz hanternoz e vo.

¹⁰ Diwar-benn harz ar sav-heol, ho po ur vevenn eus Hazar-Enan da Shefam,

¹¹ an harz a ziskenno eus Shefam da Ribla, ouzh ar reter eus Ain; neuze an harz a ziskenno hag a dizho aodoù ar Mor Kinnered war-zu ar sav-heol;

¹² an harz a ziskenno da gavout ar Jordan hag a dapo Mor an Holen. Evel-se e vo ho pro gant hec'h harzoù tro-war-dro.

¹³ Moizez a roas an urzhioù-se da vibien Israel o lavarout: Setu ar vro a lodennot dre ar sord evel hêrezh, en deus gourc'hemennet an AOTROU reiñ d'an nav meuriad ha d'an hanter-veuriad.

¹⁴ Rak meuriad mibien Ruben hervez tiez o zadoù, meuriad mibien Gad hervez tiez o zadoù, hag hanter-veuriad Manase, o deus bet o hêrezh.

¹⁵ An daou veuriad hag an hanter-veuriad-se o deus bet o hêrezh en tu-mañ d'ar Jordan, e kostezioù Jeriko, ouzh ar reter, war-zu ar sav-heol.

¹⁶ An AOTROU a gomzas da Voizez o lavarout:

¹⁷ Setu anvioù an dud a lodenno deoc'h ar vro: Eleazar an aberzhour ha Jozue mab Nun.

¹⁸ Kemer a reot ivez ur priñs dre veuriad evit lodennañ ar vro dre hêrezh.

¹⁹ Setu anvioù an dud-se: evit meuriad Juda, Kaleb mab Jefune,

²⁰ evit meuriad mibien Simeon, Samuel mab Amihud,

²¹ evit meuriad Benjamin, Elidad mab Kislon,

²² evit meuriad mibien Dan, ar priñs Buki mab Jogli,

²³ evit mibien Jozef, evit meuriad mibien Manase, ar priñs Haniel mab Efod,

²⁴ hag evit meuriad mibien Efraim, ar priñs Kemuel mab Shiftan,

²⁵ evit meuriad mibien Zabulon, ar priñs Elizafan mab Parnak,

²⁶ evit meuriad mibien Isakar, ar priñs Paltiel mab Azan,

²⁷ evit meuriad mibien Aser, ar priñs Ahihud mab Shelomi,

²⁸ evit meuriad mibien Neftali, ar priñs Padahel mab Amihud.

²⁹ D'ar re-se eo e c'hourc'hemennas an AOTROU lodennañ an hêrezh etre mibien Israel e bro Ganaan.