Niveroù 32 - Bibl Koad 21: Ar Bibl e Brezhoneg evit ar Vretoned

Pennad 32 Hêrezh Ruben ha Gad

¹ Mibien Ruben ha mibien Gad o doa un niver dreistkont a dropelloù, hag e weljont e oa bro Jaezer ha bro C'halaad ul lec'h dereat evit al loened.

² Mibien Gad ha mibien Ruben a zeuas da gomz ouzh Moizez, ouzh Eleazar an aberzhour hag ouzh priñsed ar vodadenn o lavarout:

³ Atarod, Dibon, Jaezer, Nimra, Hesbon, Eleale, Sebam, Nebo, Beon,

⁴ ar vro-se bet skoet gant an AOTROU dirak bodadenn Israel, a zo ur vro evit al loened, ha da servijerien o deus loened.

⁵ Hag e lavarjont: Mar hon eus kavet trugarez dirak da zaoulagad, ra vo ar vro-mañ roet en dalc'h da'z servijerien, na zegas ket ac'hanomp en tu all d'ar Jordan.

⁶ Moizez a lavaras da vibien Gad ha da vibien Ruben: Ho preudeur, ha mont a raint d'ar brezel, ha c'hwi a chomo amañ?

⁷ Perak e tigalonekait mibien Israel evit na dremenint ket d'ar vro en deus roet dezho an AOTROU?

⁸ Evel-se eo e reas ho tadoù pa gasis anezho eus Kadesh-Barnea da welout ar vro.

⁹ Pignat a rejont betek gwazh Eshkol hag e weljont ar vro, hag e tigalonekajont mibien Israel evit ma n'ajent ket d'ar vro en deus roet dezho an AOTROU.

¹⁰ Fulor an AOTROU en em danas d'an deiz-se hag e touas o lavarout:

¹¹ An dud a zo pignet eus an Ejipt, adalek an oad a ugent vloaz hag ouzhpenn, ne welint ket ar vro am boa touet reiñ da Abraham, da Izaak ha da Jakob, rak n'o deus ket kerzhet gant leunder war va lerc'h,

¹² nemet Kaleb mab Jefune ar C'henizian ha Jozue mab Nun, rak kerzhet o deus gant leunder war-lerc'h an AOTROU.

¹³ Fulor an AOTROU en em danas a-enep Israel, hag e lakaas anezho da gantren er gouelec'h daou-ugent vloaz, betek ma voe kuzumet an holl rummad en doa graet ar pezh a oa fall dirak an AOTROU.

¹⁴ Ha setu e savit war-lerc'h ho tadoù evel broustennoù tud pec'herien, evit kreskiñ c'hoazh gwrez kounnar an AOTROU a-enep Israel.

¹⁵ Rak ma en em zistroit diwar e lerc'h, e kendalc'ho da lezel ar bobl-mañ er gouelec'h, hag ho po kaset an holl da get.

¹⁶ Tostaat a rejont outañ hag e lavarjont: Ni a savo amañ klozioù evit hon tropelloù ha kêrioù evit hor bugaligoù,

¹⁷ ha goude en em harnezimp buan dirak mibien Israel, betek ma hor bo o lakaet da vont d'o chomlec'h; met hor bugaligoù a vo o chom e kêrioù kreñv, abalamour da dud ar vro.

¹⁸ Ne zistroimp ket d'hon tiez ken n'o devo resevet mibien Israel pep hini anezho e hêrezh,

¹⁹ ha n'hon bo netra ganto en tu all d'ar Jordan na pelloc'h, peogwir e vo degouezhet deomp hon hêrezh-ni en tu-mañ d'ar Jordan, er sav-heol.

²⁰ Moizez a lavaras: Ma rit kement-se, ma en em harnezit da vont d'ar brezel dirak an AOTROU,

²¹ ma tremen pep hini ac'hanoc'h harnezet ar Jordan dirak an AOTROU betek ma en devo kaset kuit e enebourien a-zirazañ,

²² ma vo ar vro sujet dirak an AOTROU, ma tistroit goude-se, neuze e viot didamall e-keñver an AOTROU hag e-keñver Israel, hag ar vro-se a vo deoc'h, evel ho talc'h dirak an AOTROU.

²³ Ma ne rit ket evel-se, ho po pec'het a-enep an AOTROU, hag ho pec'hed a gavo ac'hanoc'h.

²⁴ Savit kêrioù evit ho pugaligoù ha klozioù evit ho tropelloù, ha grit ar pezh a zo bet lavaret gant ho kenoù.

²⁵ Mibien Gad ha mibien Ruben a gomzas da Voizez o lavarout: Da servijerien a raio evel m'en deus gourc'hemennet va aotrou.

²⁶ Hor bugaligoù, hor gwragez, hon tropelloù hag hon holl loened a chomo e kêrioù Galaad,

²⁷ ha da servijerien a dremeno, pep hini harnezet evit ar brezel, dirak an AOTROU, evit an emgann, evel m'en deus lavaret va aotrou.

²⁸ Moizez a roas urzhioù en o c'heñver da Eleazar an aberzhour, da Jozue mab Nun ha da bennoù tadel meuriadoù Israel.

²⁹ Moizez a lavaras: Mar tremen mibien Gad ha mibien Ruben ganeoc'h ar Jordan, harnezet holl evit ar brezel dirak an AOTROU, ha ma vo ar vro sujet dirazoc'h, e roiot dezho bro C'halaad da zalc'h.

³⁰ Met ma ne dremenont ket harnezet ganeoc'h, o devo o lod en ho touez e bro Ganaan.

³¹ Mibien Gad ha mibien Ruben a respontas o lavarout: Ober a raimp ar pezh en deus lavaret an AOTROU da'z servijerien.

³² Ni a dremeno harnezet dirak an AOTROU da vro Ganaan, ha ra vo deomp hon hêrezh en tu-mañ d'ar Jordan.

³³ Moizez a roas da vibien Gad, da vibien Ruben ha da hanter-veuriad Manase mab Jozef, rouantelezh Sihon roue an Amoreaned, rouantelezh Og roue Basan, ar vro gant he c'hêrioù en e harzoù ha douaroù kêrioù ar vro tro-war-dro.

³⁴ Mibien Gad a savas Dibon, Atarod, Aroer,

³⁵ Atrod-Shofan, Jaezer, Jogbeha,

³⁶ Bet-Nimra ha Bet-Haran, kêrioù kreñv, hag e kempennjont klozioù evit an tropelloù.

³⁷ Mibien Ruben a savas Hesbon, Eleale, Kirjataim,

³⁸ Nebo, Baal-Meon, a voe cheñchet o anv, Sibma; hag e rojont anvioù d'ar c'hêrioù a savjont.

³⁹ Mibien Makir mab Manase a yeas da C'halaad hag a gemeras anezhi; kas a rejont kuit an Amoreaned a oa o chom enni.

⁴⁰ Moizez a roas Galaad da Vakir mab Manase, a chomas enni.

⁴¹ Jair mab Manase a yeas da gemer ar bourc'hioù; o galvas Bourc'hioù Jair.

⁴² Nobak a yeas da gemer Kenad gant ar c'hêriadennoù war he zro, hag o galvas Nobak, diwar e anv e-unan.