Niveroù 3 - Bibl Koad 21: Ar Bibl e Brezhoneg evit ar Vretoned

Pennad 3 Niveradeg al Levited ha daspren ar re gentañ-ganet

¹ Setu lignez Aaron ha Moizez e deiz ma komzas an AOTROU da Voizez war Venez Sinai.

² Setu anvioù mibien Aaron: Nadab, ar c'hentañ-ganet, Abihu, Eleazar, Itamar.

³ Ar re-se eo mibien Aaron, an aberzhourien a voe olevet; gouestlet int bet evit ar servij evel aberzhourien.

⁴ Nadab hag Abihu a varvas dirak an AOTROU pa ginnigjont un tan estren dirak an AOTROU e gouelec'h Sinai; n'o doa ket a vibien. Eleazar hag Itamar a servijas evel aberzhourien gant Aaron o zad.

⁵ An AOTROU a gomzas da Voizez o lavarout:

⁶ Laka meuriad Levi da dostaat ha degas anezho dirak Aaron an aberzhour, evit ma servijint anezhañ.

⁷ Hag ec'h eveshaint war gement a zo roet d'e ziwall ha da ziwall an holl vodadenn, dirak teltenn an engalv, en ur ober servij an tabernakl.

⁸ Hag ec'h eveshaint war holl draoù teltenn an engalv ha war gement a zo roet da ziwall mibien Israel, en ur ober servij an tabernakl.

⁹ Evel-se e roi al Levited da Aaron ha d'e vibien; roet e vint dezhañ a-berzh mibien Israel.

¹⁰ Lakaat a ri en o c'harg Aaron hag e vibien evit ma virint o servij a aberzhourien. Mar tosta un diavaeziad, e vo lakaet d'ar marv.

¹¹ An AOTROU a gomzas da Voizez o lavarout:

¹² Setu, kemeret em eus al Levited a-douez mibien Israel e-lec'h an holl re gentañ-ganet eus mibien Israel o deus digoret ar mammog; al Levited a zo din-me.

¹³ Pep kentañ-ganet a zo din. D'an deiz em eus skoet pep kentañ-ganet e bro Ejipt, em eus santelaet evidon pep kentañ-ganet en Israel, e-touez an dud hag e-touez al loened, din e vint. Me eo an AOTROU.

¹⁴ An AOTROU a gomzas da Voizez e gouelec'h Sinai o lavarout:

¹⁵ Gra an niveradeg eus mibien Levi, hervez tiez o zadoù, hervez o ziegezhioù, gra an niveradeg eus an holl baotred adalek an oad a ur miz hag ouzhpenn.

¹⁶ Moizez a niveras anezho hervez urzh an AOTROU, evel ma oa bet gourc'hemennet dezhañ.

¹⁷ Setu mibien Levi dre o anvioù: Gershon, Kehad ha Merari.

¹⁸ Setu anvioù mibien Gershon dre o ziegezhioù: Libni ha Shimei.

¹⁹ Setu mibien Kehad dre o ziegezhioù: Amram, Jizehar, Hebron hag Uziel.

²⁰ Setu mibien Merari dre o ziegezhioù: Makli ha Mushi. Setu kerentiezhioù Levi hervez tiez o zadoù.

²¹ Diouzh Gershon e tiskenn tiegezh al Libnited ha tiegezh ar Shimited; ar re-se eo tiegezh ar C'hershonited.

²² Ar re anezho a voe niveret, o kontañ an holl baotred adalek an oad a ur miz hag ouzhpenn; bez' e voent seizh mil pemp kant.

²³ Tiegezhioù ar C'hershonited a gampe a-dreñv an tabernakl, war-zu ar c'huzh-heol.

²⁴ Penn ti tadel ar C'hershonited a oa Eliasaf mab Lael.

²⁵ Ar garg roet da vibien Gershon e-keñver teltenn an engalv a voe an tabernakl, an deltenn, ar golo, ar rideoz evit digor teltenn an engalv,

²⁶ lienoù al leurenn, ar rideoz evit dor al leurenn en-dro d'an tabernakl ha d'an aoter, hag an holl gerdin evit ar servij.

²⁷ Diouzh Kehad e tiskenn tiegezh an Amramited, tiegezh ar Jizeharited, tiegezh an Hebronited ha tiegezh an Uzielited; ar re-se eo tiegezh ar C'heatited.

²⁸ O kontañ an holl baotred adalek an oad a ur miz hag ouzhpenn, e voent eizh mil c'hwec'h kant, a voe roet dezho ur garg evit ar santual.

²⁹ Tiegezhioù mibien Kehad a gampe war gostez an tabernakl war-zu ar c'hreisteiz.

³⁰ Penn ti tadel ar C'heatited a oa Elizafan mab Uziel.

³¹ Ar garg roet dezho a voe an arc'h, an daol, ar c'hantolor, an aoterioù, traoù ar santual evit ober ar servij, ar ouel ha kement a zo talvoudus dezhi.

³² Eleazar, mab an aberzhour Aaron, a voe penn pennoù al Levited; lakaet eo bet war ar re a voe roet dezho karg ar santual.

³³ Diouzh Merari e tiskenn tiegezh ar Vaklited ha tiegezh ar Vushited; ar re-se eo tiegezh ar Verarited.

³⁴ Ar re anezho a voe niveret o kontañ an holl baotred adalek an oad a ur miz hag ouzhpenn; bez' e voent c’hwec'h mil daou c'hant.

³⁵ Penn ti tadel ar Verarited a oa Zuriel mab Abihail. Kampañ a raent war gostez an tabernakl war-zu an hanternoz.

³⁶ Ar garg hag an diwall roet da vibien Merari a voe plenk an tabernakl, e varrennoù, e golonennoù hag o sichennoù, e holl draoù ha kement a zo talvoudus dezho,

³⁷ kolonennoù al leurenn tro-dro, o sichennoù, o feulioù hag o c'herdin.

³⁸ Ar re a gampe dirak an tabernakl, ouzh ar reter, dirak teltenn an engalv, war-zu ar sav-heol, a oa Moizez, Aaron hag e vibien, a voe roet dezho karg ar santual, karg evit mibien Israel. Mar tosta un diavaeziad, e vo lakaet d'ar marv.

³⁹ An holl Levited a voe niveret; niveret int bet gant Moizez hag Aaron hervez urzh an AOTROU, hervez o ziegezhioù. An holl baotred adalek an oad a ur miz hag ouzhpenn a voe daou vil warn-ugent.

⁴⁰ An AOTROU a lavaras da Voizez: Niver an holl re gentañ-ganet-paotr eus mibien Israel, adalek an oad a ur miz hag ouzhpenn, ha gra o niveradeg dre o anvioù.

⁴¹ Kemer a ri al Levited evidon-me an AOTROU e-lec'h an holl re gentañ-ganet eus mibien Israel, ha loened al Levited e-lec'h an holl re-gentañ-ganet eus loened mibien Israel.

⁴² Moizez a niveras an holl re gentañ-ganet eus mibien Israel, evel m'en doa gourc'hemennet an AOTROU dezhañ.

⁴³ An holl re gentañ-ganet-paotr a voe niveret o kontañ dre o anvioù, adalek an oad a ur miz hag ouzhpenn; bez' e voent daou vil warn-ugent daou c'hant trizek ha tri-ugent.

⁴⁴ An AOTROU a gomzas da Voizez o lavarout:

⁴⁵ Kemer al Levited e-lec'h an holl re gentañ-ganet eus mibien Israel, ha loened al Levited e-lec'h o loened; al Levited a vo din. Me eo an AOTROU.

⁴⁶ Evit daspren an daou c'hant trizek ha tri-ugent e-touez ar c'hentañ-ganet eus mibien Israel a zo dreist niver al Levited,

⁴⁷ e kemeri pemp sikl dre benn; o c'hemer a ri hervez sikl ar santual; ur sikl a dalvez ugent gera (1 gera   0,5 g).

⁴⁸ An arc'hant a roi da Aaron ha d'e vibien evit daspren ar re a zo ouzhpenn.

⁴⁹ Moizez a gemeras an arc'hant evit daspren ar re a zo ouzhpenn, en tu all d'ar re zasprenet gant al Levited;

⁵⁰ kemer a reas arc'hant ar re gentañ-ganet eus mibien Israel, mil tri c'hant pemp sikl ha tri-ugent, hervez sikl ar santual.

⁵¹ Moizez a roas arc'hant an daspren da Aaron ha d'e vibien, hervez urzh an AOTROU, evel m'en doa gourc'hemennet an AOTROU da Voizez.