Niveroù 29 - Bibl Koad 21: Ar Bibl e Brezhoneg evit ar Vretoned

Pennad 29 Diwar-benn an aberzhoù

¹ D'ar seizhvet miz, d'an deiz kentañ eus ar miz, ho po ur c'hengalv santel, ne reot labour-mevel ebet. Bez' e vo sonet an trompilhoù d'an deiz-se.

² Kinnig a reot ul loskaberzh e c'hwezh dudius d'an AOTROU: ur c'hole yaouank, un tourz, seizh oan disi eus ur bloaz,

³ hag o donezonoù a vo flour bleud mezet gant eoul, teir dekvedenn evit ar c'hole, div zekvedenn evit an tourz,

⁴ hag un dekvedenn evit pep oan eus ar seizh oan,

⁵ hag ur bouc'h evel aberzh-dic'haouiñ, evit ober dic'haou evidoc'h,

⁶ ouzhpenn loskaberzh ar miz gant e zonezon, al loskaberzh peurbadus gant e zonezon, hag o evadkinnigoù, hervez ar reolennoù. Bez' e vint ur c'hwezh dudius, profoù graet dre an tan d'an AOTROU.

⁷ D'an dekvet deiz eus ar seizhvet miz-se, ho po ur c'hengalv santel, ec'h izelaiot hoc'h eneoù ha ne reot labour ebet.

⁸ Kinnig a reot ul loskaberzh d'an AOTROU, ur c'hwezh dudius: ur c'hole yaouank, un tourz, seizh oan disi eus ur bloaz,

⁹ hag o donezonoù a vo flour bleud mezet gant eoul, teir dekvedenn evit ar c'hole,

¹⁰ div zekvedenn evit an tourz, hag un dekvedenn evit pep oan eus ar seizh oan.

¹¹ Kinnig a reot ur bouc'h evel aberzh-dic'haouiñ, ouzhpenn an aberzh evit ober dic'haou kinniget en deiz-pardon, al loskaberzh peurbadus gant e zonezon, hag o evadkinnigoù.

¹² D'ar pemzekvet deiz eus ar seizhvet miz, ho po ur c'hengalv santel, ne reot labour-mevel ebet, hag e reot ur gouel evit an AOTROU e-pad seizh devezh.

¹³ Kinnig a reot ul loskaberzh, ur prof graet dre an tan e c'hwezh dudius d'an AOTROU: trizek kole yaouank, daou dourz, pevarzek oan disi eus ar bloaz,

¹⁴ hag o donezonoù a vo flour bleud mezet gant eoul, teir dekvedenn evit pep kole eus an trizek kole, div zekvedenn evit pep tourz eus an daou dourz,

¹⁵ hag un dekvedenn evit pep oan eus ar pevarzek oan,

¹⁶ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

¹⁷ D'an eil deiz, e kinnigot daouzek kole yaouank, daou dourz, pevarzek oan disi eus ar bloaz,

¹⁸ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

¹⁹ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag o evadkinnigoù.

²⁰ D'an trede deiz, e kinnigot unnek kole, daou dourz, pevarzek oan disi eus ar bloaz,

²¹ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

²² hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

²³ D'ar pevare deiz, e kinnigot dek kole, daou dourz, pevarzek oan disi eus ar bloaz,

²⁴ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

²⁵ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

²⁶ D'ar pempvet deiz, e kinnigot nav c'hole, daou dourz, pevarzek oan disi eus ar bloaz,

²⁷ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

²⁸ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

²⁹ D'ar c'hwec'hvet deiz, e kinnigot eizh kole, daou dourz, pevarzek oan disi eus ar bloaz,

³⁰ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

³¹ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

³² D'ar seizhvet deiz, e kinnigot seizh kole, daou dourz, pevarzek oan disi eus ar bloaz,

³³ hag an donezonoù hag an evadkinnigoù evit ar c'holeoù, evit an tourzed hag evit an oaned, diouzh o niver, hervez ar reolennoù,

³⁴ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

³⁵ D'an eizhvet deiz, ho po ur vodadeg veur, ne reot labour-mevel ebet.

³⁶ Kinnig a reot ul loskaberzh, ur prof graet dre an tan e c'hwezh dudius d'an AOTROU: ur c'hole, un tourz, seizh oan disi eus ar bloaz,

³⁷ hag an donezonoù hag an evadkinnigoù evit ar c'hole, evit an tourz hag evit an oaned, diouzh o niver, hervez ar reolennoù,

³⁸ hag ur bouc'h evel aberzh-dic'haouiñ, ouzhpenn al loskaberzh peurbadus gant e zonezon hag e evadkinnig.

³⁹ Setu an traoù a reot evit an AOTROU e-pad ho kouelioù engalvadeg, en tu all d'ho kouestloù ha d'ho profoù a-youl-vat, evit ho loskaberzhoù, evit ho tonezonoù, evit hoc'h evadkinnigoù hag evit hoc'h aberzhoù a drugarekadennoù.