Niveroù 28 - Bibl Koad 21: Ar Bibl e Brezhoneg evit ar Vretoned

Pennad 28 Diwar-benn al loskaberzhoù

¹ An AOTROU a gomzas da Voizez o lavarout:

² Ro urzhioù da vibien Israel ha lavar: Ret e vo deoc'h eveshaat ma vo kinniget din en amzer dereat an donezon hag ar boued evit va frofoù graet dre an tan, ur c'hwezh dudius din.

³ Lavarout a ri: Setu ar prof graet dre an tan a ginnigot d'an AOTROU: Daou oan disi eus ur bloaz, bemdez, evit loskaberzh peurbadus.

⁴ Un oan a ginnigi diouzh ar beure, hag an oan all etre an daou abardaez,

⁵ gant un dekvedenn efa (1/10 efa   3 l) flour bleud evel donezon, mezet gant ur c'hard hin eoul friket.

⁶ Al loskaberzh peurbadus eo, kinniget eo bet e Menez Sinai, ur prof graet dre an tan, ur c'hwezh dudius d'an AOTROU.

⁷ An evadkinnig a vo eus ur c'hard hin evit pep oan; el lec'h santel e vo graet an evadkinnig a win kreñv d'an AOTROU.

⁸ Kinnig a ri an oan all etre an daou abardaez; kinnig a ri an hevelep donezon gant hini ar beure hag an hevelep evadkinnig, ur prof graet dre an tan, ur c'hwezh dudius d'an AOTROU.

⁹ D'an deiz sabad, e kinnigot daou oan disi eus ur bloaz, gant div zekvedenn flour bleud mezet gant eoul evel donezon, ha gant an evadkinnig.

¹⁰ Loskaberzh ar sabad e vo, evit pep sabad, ouzhpenn al loskaberzh peurbadus gant e evadkinnig.

¹¹ E penn-kentañ ho mizioù, e kinnigot ul loskaberzh d'an AOTROU: daou gole yaouank, un tourz, seizh oan disi eus ur bloaz,

¹² gant teir dekvedenn flour bleud mezet gant eoul evel donezon evit pep kole, div zekvedenn flour bleud mezet gant eoul evel donezon evit an tourz,

¹³ un dekvedenn flour bleud mezet gant eoul evel donezon evit pep oan. Ul loskaberzh e vo, ur prof graet dre an tan, ur c'hwezh dudius d'an AOTROU.

¹⁴ An evadkinnigoù a vo un hanter hin gwin evit ur c'hole, un drederenn hin evit un tourz, ur c'hard hin evit un oan. Loskaberzh penn ar miz e vo, evit holl vizioù ar bloaz.

¹⁵ Kinniget e vo ur bouc'h evit an aberzh-dic'haouiñ, ouzhpenn al loskaberzh peurbadus gant e evadkinnig.

¹⁶ D'ar miz kentañ, d'ar pevarzekvet deiz eus ar miz, e vo Pask an AOTROU.

¹⁷ D'ar pemzekvet deiz eus ar miz e vo ur gouel; debriñ a reot bara hep goell e-pad seizh devezh.

¹⁸ D'an deiz kentañ e vo ur c'hengalv santel, ne reot labour-mevel ebet.

¹⁹ Kinnig a reot ur prof graet dre an tan evel loskaberzh d'an AOTROU: daou gole yaouank, un tourz, seizh oan disi eus ur bloaz,

²⁰ hag o donezonoù a vo flour bleud mezet gant eoul, teir dekvedenn evit ur c'hole, div zekvedenn evit an tourz,

²¹ hag e kinnigi un dekvedenn evit pep oan eus ar seizh oan.

²² Kinnig a reot ur bouc'h evel aberzh-dic'haouiñ, evit ober dic'haou evidoc'h.

²³ Kinnig a reot an traoù-se ouzhpenn loskaberzh ar beure, a zo ul loskaberzh peurbadus.

²⁴ Kinnig a reot anezho bemdez e-pad seizh devezh, ar boued eus ur prof graet dre an tan e vo, ur c'hwezh dudius d'an AOTROU. Kinnig a reot an traoù-se ouzhpenn al loskaberzh peurbadus gant e evadkinnig.

²⁵ D'ar seizhvet deiz e vo ur c'hengalv santel, ne reot labour-mevel ebet.

²⁶ Da zeiz ar frouezh kentañ, pa ginnigot un donezon nevez d'an AOTROU, da c'houel ar sizhunioù, e vo ur c'hengalv santel, ne reot labour-mevel ebet.

²⁷ Kinnig a reot ul loskaberzh e c'hwezh dudius d'an AOTROU: daou gole yaouank, un tourz, seizh oan eus ur bloaz,

²⁸ hag o donezonoù a vo flour bleud mezet gant eoul, teir dekvedenn evit ur c'hole, div zekvedenn evit an tourz,

²⁹ un dekvedenn evit pep oan eus ar seizh oan.

³⁰ Kinnig a reot ur bouc'h evit ober dic'haou evidoc'h.

³¹ Kinnig a reot an traoù-se ouzhpenn al loskaberzh peurbadus gant e zonezon; disi e vint, gant o evadkinnigoù.