Niveroù 22 - Bibl Koad 21: Ar Bibl e Brezhoneg evit ar Vretoned

Pennad 22 Balag a c'houlenn sikour Balaam

¹ Mont a reas kuit mibien Israel hag e kampjont e plaenennoù Moab, en tu-mañ d'ar Jordan, a-dal da Jeriko.

² Balag mab Zippor a welas kement en doa graet Israel d'an Amoreaned.

³ Moab en doe un aon bras dirak ar bobl-se, dre ma oa niverus; Moab a voe spouronet rak mibien Israel.

⁴ Moab a lavaras da henaourien Madian: Emañ an engroez-mañ o vont da beuriñ holl en-dro deomp evel ma peur an ejen geot ar parkeier. Balag mab Zippor a oa roue Moab d'ar mare-se.

⁵ Hag e kasas kannaded da Valaam mab Beor, da Betor war ar stêr, e bro mibien e bobl, evit gervel anezhañ o lavarout: Setu, ur bobl a zo deuet kuit eus an Ejipt, setu e c'holo gorre an douar hag eo en em ziazezet a-dal din.

⁶ Deus bremañ, millig ar bobl-se rak galloudusoc'h eo egedon; marteze e c'hellin trec'hiñ anezho hag o c'has kuit eus ar vro, rak gouzout a ran penaos an hini a vennigez a zo benniget hag an hini a villigez a zo milliget.

⁷ Henaourien Moab hag henaourien Madian a yeas, o kaout en o daouarn profoù evit an divinour, hag e teujont da gavout Balaam hag e lavarjont dezhañ komzoù Balag.

⁸ Balaam a lavaras: Chomit amañ fenoz hag e respontin deoc'h hervez ar pezh a lavaro an AOTROU din. Priñsed Moab a chomas e ti Balaam.

⁹ Doue a zeuas da gavout Balaam hag a lavaras: Piv eo an dud-se a zo ez ti?

¹⁰ Balaam a respontas da Zoue: Balag mab Zippor, roue Moab, en deus kaset anezho da'm c'havout evit lavarout din:

¹¹ Setu, ur bobl a zo deuet kuit eus an Ejipt, setu e c'holo gorre an douar. Deus bremañ, millig anezho, marteze e c’hellin trec'hiñ anezho hag o c'has kuit.

¹² Doue a lavaras da Valaam: N'i ket ganto, ne villigi ket ar bobl-mañ rak benniget eo.

¹³ Balaam a savas d'ar beure hag a lavaras da briñsed Balag: Distroit d'ho pro, nac'het en deus an AOTROU va lezel da vont ganeoc'h.

¹⁴ Priñsed Moab a savas hag a zistroas da gavout Balag, hag e lavarjont: Nac'het en deus Balaam dont ganeomp.

¹⁵ Balag a gasas adarre priñsed, niverusoc'h hag enorusoc'h eget ar re gentañ.

¹⁶ Dont a rejont da gavout Balaam hag e lavarjont: Evel-henn en deus lavaret Balag mab Zippor: Ra ne viro netra ouzhit dont da'm c'havout,

¹⁷ rak enoret-meurbet e vi ganin, hag e rin kement a lavari din; deus eta, millig ar bobl-se.

¹⁸ Balaam a respontas o lavarout da servijerien Balag: Pa rofe Balag din e di leun a arc'hant hag a aour, ne c'hellin ket terriñ urzh an AOTROU va Doue evit ober un dra vihan pe vras.

¹⁹ Bremañ, chomit amañ fenoz hag e ouezin ar pezh a gendalc'ho an AOTROU da lavarout din.

²⁰ Doue a zeuas da gavout Balaam e-pad an noz hag a lavaras: Mard eo deuet an dud-se evit da c'hervel, sav, kae ganto, met ober a ri hervez ar c'homzoù a lavarin dit.

²¹ Balaam a savas d'ar beure, a zibras e azenez hag a yeas gant priñsed Moab.

²² Fulor Doue en em danas abalamour ma'z oa aet kuit. Ael an AOTROU en em zalc'has war an hent evit enebiñ outañ. Pignet e oa war e azenez, e zaou vevel a oa gantañ.

²³ An azenez a welas ael an AOTROU en em zalc'he war an hent, e gleze dic'houinet en e zorn. An azenez a zistroas eus an hent hag a yeas er parkeier. Balaam a skoas gant an azenez evit he lakaat da zistreiñ war an hent.

²⁴ Ael an AOTROU en em zalc'has war ur wenodenn er gwini, gant ur voger en un tu hag ur voger en tu all.

²⁵ An azenez a welas ael an AOTROU, en em vac'has ouzh ar voger hag a waskas troad Balaam ouzh ar voger; skeiñ a reas ganti adarre.

²⁶ Ael an AOTROU a yeas pelloc'h hag en em zalc'has en ul lec'h enk, ma ne oa hent ebet da zistreiñ a-zehou nag a-gleiz.

²⁷ An azenez a welas ael an AOTROU hag a c'hourvezas dindan Balaam. Fulor Balaam en em danas hag e skoas war an azenez gant ur vazh.

²⁸ An AOTROU a zigoras genoù an azenez, a lavaras da Valaam: Petra am eus graet di, ma ec'h eus skoet ganin teir gwech?

²⁹ Balaam a lavaras d'an azenez: Graet ec'h eus goap ac'hanon! Ma vefe ur c'hleze em dorn, e lazhfen ac'hanout.

³⁰ An azenez a lavaras da Valaam: Ha n'on ket da azenez, ac'h eus marc'hekaet warnon a-viskoazh betek hiziv? Hag em eus ar c'hiz d'ober evel-se ez keñver? Hag e lavaras: Nann.

³¹ An AOTROU a zigoras daoulagad Balaam, ha Balaam a welas ael an AOTROU en em zalc'he war an hent, e gleze dic'houinet en e zorn. Hag e soublas hag e stouas war e zremm.

³² Ael an AOTROU a lavaras: Perak ec'h eus skoet gant da azenez teir gwech? Setu ez on deuet evit enebiñ ouzhit, rak un hent fall dirazon a heuliez.

³³ An azenez he deus va gwelet hag eo en em zistroet diouzhin teir gwech. Ma ne vije ket distroet a-zirazon, em bije da lazhet hag he lezet bev.

³⁴ Balaam a lavaras da ael an AOTROU: Pec'het em eus rak ne ouien ket en em zalc'hes a-enep din war an hent. Ha bremañ, mar displij kement-se dit, e tistroin.

³⁵ Ael an AOTROU a lavaras da Valaam: Kae gant an dud-se, met ne lavari nemet ar c'homzoù a lavarin dit. Ha Balaam a yeas gant priñsed Balag.

³⁶ Pa glevas Balag e teue Balaam, ez eas a-ziarbenn dezhañ en ur gêr eus Moab a zo war harz an Arnon, e dibenn an tiriad.

³⁷ Balag a lavaras da Valaam: Ha ne'm eus ket kaset kannaded da'z kavout evit da c'hervel? Perak n'out ket deuet da'm c'havout? Ha ne c'hellen ket da zegemer gant enor?

³⁸ Balaam a lavaras da Valag: Setu ez on deuet da'z kavout. Ha gallout a rin bremañ lavarout un dra bennak? Me a lavaro ar gomz a lakaio Doue em genoù.

³⁹ Balaam a yeas gant Balag hag ec'h errujont e Kirjad-Huzod.

⁴⁰ Balag a ginnigas ejened ha deñved hag a gasas lod da Valaam ha d'ar briñsed a oa gantañ.

⁴¹ D'ar beure, Balag a gemeras Balaam hag a lakaas anezhañ da bignat da uhellec'h Baal, hag alese e welas al lod brasañ eus ar bobl.