Niveroù 20 - Bibl Koad 21: Ar Bibl e Brezhoneg evit ar Vretoned

Pennad 20 Marv Mari. Doureier Meriba. Marv Aaron

¹ Mibien Israel, an holl vodadenn, a erruas da c'houelec'h Zin d'ar miz kentañ, hag ar bobl a chomas e Kadesh. Mari a varvas hag a voe beziet eno.

² Ne oa ket a zour evit ar vodadenn, hag en em savjont a-enep Moizez hag a-enep Aaron.

³ Ar bobl a dabutas gant Moizez, hag e komzjont o lavarout: Perak eta n'omp ket marvet pa varvas hor breudeur dirak an AOTROU?

⁴ Perak hoc'h eus lakaet pobl an AOTROU da zont er gouelec'h-mañ, evit ma varvimp e-barzh, ni hag hol loened?

⁵ Perak hoc'h eus graet deomp pignat eus an Ejipt evit degas ac'hanomp el lec'h fall-mañ? N'eo ket ul lec'h evit hadañ nag evit fiez nag evit gwini nag evit greunaval, ha n'eus ket a zour da evañ.

⁶ Mont a reas Moizez hag Aaron a-zirak ar vodadenn ouzh digor teltenn an engalv, hag e kouezhjont war o dremm; gloar an AOTROU en em ziskouezas dezho.

⁷ An AOTROU a gomzas da Voizez o lavarout:

⁸ Kemer ar wialenn ha dastum ar vodadenn, te hag Aaron da vreur, komzit ouzh ar roc'h dirazo, hag e roio he dour. Ober a ri d'an dour mont er-maez eus ar roc'h evito, hag e roi da evañ d'ar vodadenn ha d'o loened.

⁹ Moizez a gemeras ar wialenn a-zirak an AOTROU, evel m'en doa gourc'hemennet an AOTROU dezhañ.

¹⁰ Moizez hag Aaron a zastumas ar vodadenn dirak ar roc'h. Lavarout a reas: Selaouit eta, emsaverien! Hag e raimp da zour dont er-maez eus ar roc'h?

¹¹ Moizez a savas e zorn hag a skoas war ar roc'h gant e wialenn div wech, hag e teuas dour e-leizh. Ar vodadenn a evas, hag o loened ivez.

¹² An AOTROU a lavaras da Voizez ha da Aaron: Peogwir n'hoc'h eus ket kredet ennon evit va santelaat dirak mibien Israel, ne renot ket ar vodadenn-mañ er vro am eus roet dezho.

¹³ Ar re-se eo doureier Meriba, lec'h ma'c'h enebas mibien Israel ouzh an AOTROU, a voe santelaet enno.

¹⁴ Moizez a gasas kannaded eus Kadesh da roue Edom: Evel-henn e komz da vreur Israel: Anavezout a rez an holl boanioù a zo deuet warnomp,

¹⁵ penaos e tiskennas hon tadoù d'an Ejipt, ha penaos omp bet o chom pell en Ejipt. An Ejipsianed a wallgasas ac'hanomp, ni hag hon tadoù.

¹⁶ Kriet hon eus d'an AOTROU ha klevet en deus hor mouezh. Kaset en deus un ael ha lakaet en deus ac'hanomp da vont kuit eus an Ejipt. Setu, emaomp e Kadesh, kêr e penn da harzoù.

¹⁷ Lez ac'hanomp da dremen dre da vro, ne dremenimp na dre ar parkeier na dre ar gwini, ne evimp ket dour ar puñsoù, mont a raimp dre hent ar roue, ne zistroimp nag a-zehou nag a-gleiz, betek ma hon devo tremenet da harzoù.

¹⁸ Edom a lavaras: Ne dremeni ket, anez da-se ez in a-ziarbenn dit gant ar c'hleze.

¹⁹ Mibien Israel a lavaras dezhañ: Pignat a raimp dre an hent bras, mar evomp eus da zour, ni hag hol loened, me en paeo; war droad e tremenin hepken, netra ouzhpenn.

²⁰ Eñ a lavaras: Ne dremeni ket. Edom a yeas a-ziarbenn dezhañ gant ur vandenn vras a dud hag a zorn armet.

²¹ Edom a nac'has ouzh Israel aotren da dremen dre e harzoù, hag Israel a zistroas ac'hane.

²² Mibien Israel, an holl vodadenn, a yeas kuit eus Kadesh hag a zeuas da Venez Hor.

²³ An AOTROU a gomzas da Voizez ha da Aaron, e Menez Hor, war harzoù Edom, o lavarout:

²⁴ Dastumet e vo Aaron gant e bobl; ned aio ket er vro am eus roet da vibien Israel, dre m'hoc'h eus disentet ouzh va muzelloù e doureier Meriba.

²⁵ Kemer Aaron hag e vab Eleazar ha laka anezho da bignat war Venez Hor.

²⁶ Diwisk Aaron eus e zilhad ha gwisk anezho da Eleazar. Aaron a vo dastumet hag a varvo eno.

²⁷ Moizez a reas evel m'en doa gourc'hemennet an AOTROU. Pignat a rejont war Venez Hor dirak ar vodadenn.

²⁸ Moizez a ziwiskas Aaron eus e zilhad hag a wiskas anezho da Eleazar e vab. Aaron a varvas eno war-lein ar menez. Moizez hag Eleazar a ziskennas eus ar menez.

²⁹ An holl vodadenn a welas e oa marvet Aaron, hag holl di Israel a ouelas Aaron e-pad tregont devezh.