Niveroù 19 - Bibl Koad 21: Ar Bibl e Brezhoneg evit ar Vretoned

Pennad 19 Ar vuoc'h rous

¹ An AOTROU a gomzas da Voizez ha da Aaron o lavarout:

² Setu ur reolenn eus al lezenn en deus gourc'hemennet an AOTROU o lavarout: Komz da vibien Israel, ma tegasint dit ur vuoc'h rous, didarch ha disi, ha n'he defe ket douget ar yev.

³ He reiñ a reot da Eleazar an aberzhour, a gaso anezhi er-maez eus ar c'hamp, hag e vo lazhet dirazañ.

⁴ Eleazar an aberzhour a gemero eus he gwad gant e viz, hag e raio sparfadur eus he gwad seizh gwech war diaraog teltenn an engalv.

⁵ Devet e vo ar vuoc'h dirak e zaoulagad, devet e vo he c'hroc'hen, he c'hig, he gwad, he fank.

⁶ An aberzhour a gemero koad sedrez, sikadez ha ruz-moug, hag o zaolo e-kreiz an tan a zev ar vuoc'h.

⁷ An aberzhour a ganno e zilhad hag a walc'ho e gorf en dour. Goude-se e tistroio d'ar c'hamp, hag e vo dic'hlan an aberzhour betek an noz.

⁸ An hini en devo he devet a ganno e zilhad en dour hag a walc'ho e gorf en dour, dic'hlan e vo betek an noz.

⁹ Un den glan a zastumo ludu ar vuoc'h hag en taolo er-maez eus ar c'hamp en ul lec'h glan. Miret e vo evit bodadenn mibien Israel, evit ober dour a zisparti. Ur c’hlanidigezh eus ar pec'hed e vo.

¹⁰ An hini en devo dastumet ludu ar vuoc'h a ganno e zilhad, ha dic'hlan e vo betek an noz. Ur reolenn beurbadus e vo evit mibien Israel hag evit an diavaeziad a vo o chom en o zouez.

¹¹ An hini a stoko ouzh ar c'horf marv eus un den bennak a vo dic'hlan e-pad seizh devezh.

¹² En em c'hlanaat a raio gant an dour-se d'an trede deiz ha d'ar seizhvet deiz, hag e vo glan. Ma n'en em c'hlana ket d'an trede deiz ha d'ar seizhvet deiz, ne vo ket glan.

¹³ Piv bennak en devo stoket ouzh ar c'horf marv eus un den bennak marvet, ha ne vo ket en em c'hlanaet, a saotro tabernakl an AOTROU. An den-se a vo lamet eus Israel. Pa ne vo ket bet skuilhet warnañ an dour a zisparti, dic'hlan e vo, e zic'hlanded a vo c'hoazh warnañ.

¹⁴ Setu al lezenn: Pa varvo un den en un deltenn, piv bennak a yelo en deltenn ha piv bennak en em gavo en deltenn a vo dic'hlan e-pad seizh devezh.

¹⁵ Pep lestr digor, hep golo stag ebet, a vo dic'hlan.

¹⁶ Piv bennak a stoko er parkeier ouzh un den lazhet gant ar c'hleze, pe ouzh ar c'horf eus un den, pe ouzh un askorn den, pe ouzh ur bez, a vo dic'hlan e-pad seizh devezh.

¹⁷ Evit un den a vo dic'hlan, e vo kemeret eus ludu an hini a zo bet devet evit ar pec'hed, hag e vo lakaet warnañ dour bev en ul lestr.

¹⁸ Un den glan a gemero sikadez, a soubo anezhañ en dour hag a raio sparfadur war an deltenn, war an holl draoù ha war an holl dud a vo bet e-barzh, ha war an hini en devo stoket ouzh eskern pe ouzh un den lazhet pe ouzh unan marv pe ouzh ur bez.

¹⁹ An den glan a raio sparfadur war an hini dic'hlan d'an trede deiz ha d'ar seizhvet deiz, hag e c'hlanaat a raio d'ar seizhvet deiz. Hag e kanno e zilhad hag en em walc'ho en dour, glan e vo d'an noz.

²⁰ Un den hag a vo dic'hlan ha n'en em c'hlanaio ket, an den-se a vo lamet a-douez ar vodadenn, rak saotret en devo santual an AOTROU. Pa ne vo ket bet skuilhet warnañ an dour a zisparti, dic'hlan e vo.

²¹ Ur reolenn beurbadus e vo evito. An hini a raio sparfadur eus an dour a zisparti a ganno e zilhad, hag an hini a stoko ouzh an dour a zisparti a vo dic'hlan betek an noz.

²² Kement tra a vo stoket gant un den dic'hlan a vo dic'hlan, hag an hini a stoko outañ a vo dic'hlan betek an noz.