Niveroù 15 - Bibl Koad 21: Ar Bibl e Brezhoneg evit ar Vretoned

Pennad 15 Reolennoù diwar-benn an aberzhoù hag ar sabad

¹ An AOTROU a gomzas da Voizez o lavarout:

² Komz da vibien Israel ha lavar: Pa viot aet er vro a roan deoc'h evit chom enni,

³ ha pa reot ur prof dre an tan d'an AOTROU, ul loskaberzh, un aberzh evit seveniñ ur gouestl pe ur prof a-youl-vat, pe en ho kouelioù, evit leuskel ur c'hwezh dudius d'an AOTROU gant loened bras pe gant loened bihan,

⁴ an hini a ginnigo e brof d'an AOTROU, a ginnigo un donezon eus un dekvedenn flour bleud mezet gant ur c'hard hin eoul,

⁵ hag ec'h aozi un evadkinnig eus ur c'hard hin gwin gant al loskaberzh pe an aberzh, evit pep oan.

⁶ Evit un tourz, ec'h aozi un donezon gant div zekvedenn flour bleud mezet gant un drederenn hin eoul,

⁷ hag un evadkinnig eus un drederenn hin gwin a ginnigi e c'hwezh dudius d'an AOTROU.

⁸ Pa aozi ur c'hole e loskaberzh, en aberzh evit seveniñ ur gouestl pe en aberzh a drugarekadennoù d'an AOTROU,

⁹ e kinnigi gant ar c'hole un donezon eus teir dekvedenn flour bleud mezet gant un hanter hin eoul,

¹⁰ hag un evadkinnig eus un hanter hin gwin a ginnigi e prof graet dre an tan, ur c'hwezh dudius d'an AOTROU.

¹¹ Evel-se e vo graet evit un ejen, un tourz, un oan pe ur c'havrig.

¹² Hervez niver ar re a vo aozet, evel-se e reot evit pep hini, hervez o niver.

¹³ Pep henvroad a raio an traoù evel-se pa ginnigo ur prof graet dre an tan, ur c'hwezh dudius d'an AOTROU.

¹⁴ An diavaeziad a zo o chom en ho touez pe e-touez ho tiskennidi, hag a aozfe ur prof graet dre an tan, ur c'hwezh dudius d'an AOTROU, a aozo anezhañ evel ma profot.

¹⁵ Bez' e vo ur reolenn hepken evit ar vodadenn hag evit an diavaeziad a zo o chom en ho touez, ur reolenn beurbadus a rummadoù da rummadoù, bez' e vo evidoc'h evel evit an diavaeziad dirak an AOTROU.

¹⁶ Bez' e vo ul lezenn hepken hag ur varnedigezh hepken evidoc'h hag evit an diavaeziad a zo o chom en ho touez.

¹⁷ An AOTROU a gomzas da Voizez o lavarout:

¹⁸ Komz da vibien Israel ha lavar: Pa viot aet er vro a lakaan ac'hanoc'h da vont enni,

¹⁹ hag e tebrot bara eus ar vro-se, e savot ur prof d'an AOTROU.

²⁰ Sevel a reot ur wastell, kentañ lodenn ho toaz, evel ur prof savet; hag he savot evel ma reot evit prof savet al leur.

²¹ Eus kentañ lodenn ho toaz e roiot d'an AOTROU ur prof savet a rummadoù da rummadoù.

²² Pa n'ho po ket graet diratozh an holl c'hourc'hemennoù-se en deus roet an AOTROU da Voizez,

²³ kement en deus urzhiet an AOTROU deoc'h dre Voizez, adalek an deiz m'en deus urzhiet an AOTROU ha diwezhatoc'h a rummadoù da rummadoù,

²⁴ mard eo an dra graet diratozh, hep m'he defe e welet ar vodadenn, an holl vodadenn a ginnigo ur c'hole evel loskaberzh a c'hwezh dudius, gant an donezon hag an evadkinnig hervez ar reolennoù, hag ur bouc'h evel aberzh-dic'haouiñ.

²⁵ An aberzhour a raio an dic'haou evit holl vodadenn mibien Israel, hag e vo pardonet dezho, rak diratozh e vo bet graet hag o devo degaset dirak an AOTROU o frof, ur prof graet dre an tan d'an AOTROU hag un aberzh-dic'haou dirak an AOTROU, abalamour d'an dra graet diratozh.

²⁶ Pardonet e vo da holl vodadenn mibien Israel ha d'an diavaeziad a zo o chom en o zouez, rak ar bobl a-bezh en devo graet an dra diratozh.

²⁷ Mar pec'h un den hepken diratozh, e kinnigo ur c'havrig eus ur bloaz evel aberzh-dic’haou.

²⁸ An aberzhour a raio an dic'haou evit an den en devo graet an dra diratozh dirak an AOTROU; p'en devo graet an dic'haou, e vo pardonet.

²⁹ Bez' e vo evidoc'h ul lezenn hepken diwar-benn an hini en devo pec'het diratozh, evit an henvroad a-douez mibien Israel hag evit an diavaeziad a zo o chom en ho touez.

³⁰ Met an hini a raio-se a zorn savet pe henvroad pe diavaeziad, e tismegañso an AOTROU; an den-se a vo lamet a-douez e bobl.

³¹ Disprizet en devo komz an AOTROU, torret en devo e c'hourc'hemenn, ret e vo lemel an den-se; hag e tougo e zireizhder.

³² Mibien Israel a oa er gouelec'h hag e kavjont un den a zastume koad un deiz sabad.

³³ Ar re a gavas anezhañ o tastum koad e zegasas da Voizez ha da Aaron, ha d'an holl vodadenn.

³⁴ Lakaet e voe dindan gward, rak ne oa ket bet disklêriet ar pezh a zleed ober dezhañ.

³⁵ An AOTROU a lavaras da Voizez: An den-se a vo lakaet d'ar marv; ra veinataio anezhañ an holl vodadenn er-maez eus ar c'hamp.

³⁶ An holl vodadenn a reas dezhañ mont er-maez eus ar c'hamp hag a veinataas anezhañ, hag e varvas, evel m'en doa gourc'hemennet an AOTROU da Voizez.

³⁷ An AOTROU a gomzas da Voizez o lavarout:

³⁸ Komz da vibien Israel ha lavar dezho ober ur pempilh ouzh bevenn o dilhad a rummadoù da rummadoù, ha lakaat war ar pempilh-se eus ar vevenn ur gordennig limestra.

³⁹ O kaout ar pempilh, o welout anezhañ, ho po soñj eus holl c'hourc'hemennoù an AOTROU hag e heuliot anezho, ha ne heuliot ket ho kalonoù hag ho taoulagad evit kouezhañ er gasterezh.

⁴⁰ Soñj ho po eus va holl c'hourc'hemennoù hag e heuliot anezho, hag e viot santel d'ho Toue.

⁴¹ Me eo an AOTROU ho Toue, en deus ho lakaet da vont kuit eus bro Ejipt evit bezañ ho Toue. Me eo an AOTROU ho Toue.