Niveroù 10 - Bibl Koad 21: Ar Bibl e Brezhoneg evit ar Vretoned

Pennad 10 An div drompilh arc'hant. Pedenn Moizez

¹ An AOTROU a gomzas da Voizez o lavarout:

² Gra dit div drompilh arc'hant. O ober a ri gant ar morzhol, hag e servijont dit evit dastum ar vodadenn hag evit dilec'hiañ ar c'hampoù.

³ Pa vo sonet ganto, an holl vodadenn a zeuio da'z kavout ouzh digor teltenn an engalv.

⁴ Pa vo sonet gant unan hepken, ar briñsed, pennoù milieroù Israel, a zeuio da'z kavout.

⁵ Pa vo sonet a-strak, ar re a gamp er sav-heol a yelo kuit.

⁶ Pa vo sonet a-strak un eil gwech, ar re a gamp er c'hreisteiz a yelo kuit; sonet e vo a-strak evit o dilec'h.

⁷ Sonet e vo evit dastum ar vodadenn, met ne vo ket a-strak.

⁸ Mibien Aaron, an aberzhourien, a sono an trompilhoù. Ur reolenn beurbadus e vo a rummadoù da rummadoù.

⁹ Pa'z eot d'ar brezel en ho pro a-enep an enebourien a stourmo ouzhoc'h, e sonot a-strak an trompilhoù hag e vo soñj ac'hanoc'h dirak an AOTROU ho Toue, hag e viot dieubet eus hoc'h enebourien.

¹⁰ En ho tevezhioù a levenez, en ho kouelioù, e penn-kentañ ho mizioù, e sonot gant an trompilhoù war ho loskaberzhoù ha war hoc'h aberzhoù a drugarekadennoù, hag e lakaint ac'hanoc'h da vezañ eñvoret en ho Toue. Me eo an AOTROU ho Toue.

¹¹ D'an eil bloaz, d'an eil miz, d'an ugentvet deiz eus ar miz, ar goabrenn a savas a-ziwar tabernakl an Testeni.

¹² Mibien Israel a yeas kuit eus gouelec'h Sinai evit o c'herzhadeg. Ar c'hoabrenn a chomas a-sav e gouelec'h Paran.

¹³ Mont a rejont evit ar wech kentañ war c'hourc'hemenn an AOTROU dre Voizez.

¹⁴ Banniel kamp mibien Juda a yeas kuit da gentañ gant e strolladoù. Nahashon mab Aminadab a rene strollad Juda,

¹⁵ Netaneel mab Zuar a rene strollad meuriad mibien Isakar,

¹⁶ Eliab mab Helon a rene strollad meuriad mibien Zabulon.

¹⁷ An tabernakl a voe disavet, ha mibien Gershon ha mibien Merari a yeas kuit en ur zougen an tabernakl.

¹⁸ Banniel kamp mibien Ruben a yeas kuit gant e strolladoù. Elizur mab Shedeur a rene strollad Ruben,

¹⁹ Shelumiel mab Zurishaddai a rene strollad meuriad mibien Simeon,

²⁰ Eliasaf mab Deuel a rene strollad meuriad mibien Gad.

²¹ Ar Gehatited a yeas kuit en ur zougen ar santual, hag e voe savet an tabernakl ouzh o gortoz.

²² Banniel kamp mibien Efraim a yeas kuit gant e strolladoù. Elishama mab Amihud a rene strollad Efraim,

²³ Gamaliel mab Pedazur a rene strollad meuriad mibien Manase,

²⁴ Abidan mab Gideoni a rene strollad meuriad mibien Benjamin.

²⁵ Banniel kamp mibien Dan a yeas kuit gant e strolladoù; gward-adreñv an holl gampoù e oa. Ahiezer mab Amishaddai a rene strollad Dan,

²⁶ Pagiel mab Okran a rene strollad meuriad mibien Aser,

²⁷ Ahira mab Enan a rene strollad meuriad mibien Neftali.

²⁸ Evel-se e voe kerzhadeg mibien Israel hervez o strolladoù, pa'z ejont kuit.

²⁹ Moizez a lavaras da Hobab mab Reuel ar Madianad, tad-kaer Moizez: Mont a reomp d'al lec'h m'en deus lavaret an AOTROU diwar e benn: E reiñ a rin deoc'h; deus ganeomp hag e raimp vad dit, rak an AOTROU en deus prometet ober vad da Israel.

³⁰ Eñ a respontas: Ned in ket, met mont a rin da'm bro, d'al lec'h on bet ganet ennañ.

³¹ Moizez a lavaras: Na lez ket ac'hanomp rak ec'h anavezez al lec'hioù ma c'hellomp kampañ enno er gouelec'h, bez' e vi evel daoulagad deomp.

³² Mar deuez ganeomp, ar mad a dle an AOTROU ober deomp, a raimp ivez dit.

³³ Mont a rejont kuit eus menez an AOTROU evit un hent a dri devezh; arc'h emglev an AOTROU a yae a-raok dezho, oc'h ober an hent a dri devezh evit kavout ul lec'h diskuizh.

³⁴ Koabrenn an AOTROU a oa a-us dezho e-pad an deiz, pa'z ejont kuit eus ar c'hamp.

³⁵ Pa'z ae an arc'h kuit, Moizez a lavare: Sav, AOTROU! Ra vo da enebourien stlabezet! Ra dec'ho ar re a gasa ac'hanout azirazout!

³⁶ Ha pa chome a-sav, e lavare: Distro, AOTROU, da zekviliadoù a vilieroù Israel!