Levr Rud 2 - Bibl Koad 21: Ar Bibl e Brezhoneg evit ar Vretoned

Pennad 2 Rud e parkeier Boaz

¹ Naomi he doa ur c'har a-berzh he gwaz, un den galloudus ha pinvidik eus tiegezh Elimelek, e anv a oa Boaz.

² Rud, ar plac'h eus Moab, a lavaras da Naomi: Lez ac'hanon da vont d'ar parkeier ha da zastum tañvouez war-lerc'h an hini a gavfen trugarez ouzh e zaoulagad. Hi a lavaras: Kae va merc'h!

³ Mont a reas eta hag e teuas da dañvouezañ en ur park war-lerc'h ar vederien. Hag e c'hoarvezas e oa al lodenn bark-se da Voaz, an hini a oa eus tiegezh Elimelek.

⁴ Ha setu Boaz a zeuas eus Betlehem hag a lavaras d'ar vederien: Ra vo an AOTROU ganeoc'h! Int a respontas: Ra'z pennigo an AOTROU!

⁵ Boaz a lavaras d'e servijer karget eus ar vederien: Da biv eo ar plac'h yaouank-se?

⁶ Ar servijer karget eus ar vederien a respontas: Ur vaouez yaouank eus Moab eo, deuet eo gant Naomi eus maezioù Moab.

⁷ Lavaret he deus: Va lezit da dañvouezañ me ho ped, da zastum un tammig e-touez an dremmen war-lerc'h ar vederien. Deuet eo hag eo bet en he sav abaoe beure betek bremañ, ha n'he deus diskuizhet nemet ur pennad en ti.

⁸ Boaz a lavaras da Rud: Selaou va merc'h, n'a ket da dañvouezañ en ur park all, ha na bella ket zoken ac'hann, met chom amañ gant va mitizhien.

⁹ Sell ouzh ar park a vez medet, ha kae war o lerc'h. Difennet em eus ouzh va servijerien da stekiñ ouzhit. Ma ec'h eus sec'hed, kae da evañ d'al listri eus ar pezh o devo tennet ar baotred yaouank.

¹⁰ Neuze e kouezhas war he dremm, e stouas d'an douar hag e lavaras: Penaos em eus kavet trugarez dirak da zaoulagad, ma taolez evezh ouzhin-me, un estrañjourez?

¹¹ Boaz a respontas dezhi: Kement ac'h eus graet da'z mamm-gaer abaoe marv da bried a zo bet disklêriet din, penaos ac'h eus lezet da dad, da vamm ha da vro c'henidik, evit dont war-zu ur bobl n'anavezes ket diagent.

¹² Ra roio an AOTROU dit hervez ar pezh ac'h eus graet, ha ra vo da c'hopr leun a-berzh an AOTROU, Doue Israel, ma'z out deuet da fiziañ dindan e eskell!

¹³ Hi a lavaras: Va aotrou, kavet em eus trugarez dirak da zaoulagad, rak frealzet ec'h eus ac'hanon, ha komzet ec'h eus hervez kalon da servijerez, petra bennak ma n'on ket evel unan eus da servijerezed.

¹⁴ Boaz a lavaras dezhi da vare ar pred: Tosta amañ ha debr bara, ha soub da damm er gwinêgr. Azezañ a reas e-kichen ar vederien, hag eñ a roas dezhi greun rostet. Hi a zebras diouto hag he doe he gwalc'h, hag e viras an nemorant.

¹⁵ Neuze e savas da dañvouezañ. Boaz a roas an urzh-mañ d'ar baotred yaouank: Ra dañvouezo etre an dremmen zoken, ha na zizarbennit ket anezhi,

¹⁶ hag ivez e lezot a-ratozh un nebeud dornadoù eviti, hag hi a c'hello o zañvouezañ ha ne c'hourdrouzot ket anezhi. 17 Tañvouezañ a reas eta er park betek an abardaez, hag e tornas ar pezh he doa dastumet, hag e voe war-dro un efa heiz.

¹⁷ Tañvouezañ a reas eta er park betek an abardaez, hag e tornas ar pezh he doa dastumet, hag e voe war-dro un efa heiz.

¹⁸ Hag en kasas ganti hag ez eas da gêr; he mamm-gaer a welas ar pezh he doa tañvouezet. Tennañ a reas ivez ar pezh he doa miret eus an nemorant goude bezañ bet he gwalc'h, evit reiñ dezhi.

¹⁹ Neuze he mamm-gaer a lavaras dezhi: Pelec'h ec'h eus tañvouezet hiziv, ha pelec'h ec'h eus labouret? Ra vo benniget an hini en deus taolet evezh ouzhit! Hag e tisklêrias d'he mamm-gaer e ti piv he doa labouret, hag e lavaras: An den e ti piv em eus labouret hiziv a zo anvet Boaz.

²⁰ Naomi a lavaras d'he merc'h-kaer: Ra vo benniget gant an AOTROU, a ziskouez an hevelep trugarez e-keñver ar re vev hag e-keñver ar re varv! Naomi a lavaras ivez: An den-mañ a zo kar deomp, hag emañ eus ar re o deus warnomp an droed a zaspren.

²¹ Ha Rud, ar plac'h eus Moab, a lavaras: Lavaret en deus ivez din: Chom e-kichen va faotred yaouank, betek ma vo echu va holl eost.

²² Naomi a lavaras da Rud he merc'h-kaer: Va merc'h, mat eo dit mont er-maez gant e vitizhien, ha ma ne vi ket kavet en ur park all.

²³ En em stagañ a reas eta ouzh mitizhien Boaz, evit tañvouezañ betek diwezh eost an heiz hag eost ar gwinizh; hag e voe o chom gant he mamm-gaer.