Levr Job 8 - Bibl Koad 21: Ar Bibl e Brezhoneg evit ar Vretoned

Pennad 8 Prezegenn gentañ Bildad

¹ Neuze, Bildad eus Shuak a gomzas o lavarout:

² Betek pegoulz e komzi evel-se, hag e vo komzoù da c'henoù heñvel ouzh un avel diroll?

³ Doue, hag e tiskarfe ar varnedigezh? An Holl-C'halloudeg, hag e tiskarfe ar reizhder?

⁴ Mar o deus da vibien pec'het a-enep dezhañ, eñ en deus o deroet da c'halloud o zorfed.

⁵ Met mar klaskez Doue, mar goulennez trugarez digant an Holl-C'halloudeg,

⁶ mard out glan ha reizh, a-dra-sur ec'h eveshaio warnout, hag ec'h adsavo ti da reizhder.

⁷ Da zeroù a vo bet nebeut a dra, met da ziwezh a vo bras-meurbet.

⁸ Goulenn digant ar rummadoù a-ziagent, hag en em stag d'ober enklask diwar o zadoù,

⁹ rak ni a zo abaoe dec'h ha n'ouzomp netra, hon deizioù war an douar a zo evel ur skeud.

¹⁰ Int, ha ne gelennint ket ac'hanout? Ha ne gomzint ket ouzhit? Ha ne dennint ket eus o c'halon ar c'homzoù-mañ:

¹¹ Ar c'horz, hag e kresk hep palud? Ar broenn, hag e vount hep dour?

¹² C'hoazh en he glasvez hag hep bezañ kutuilhet, ez eo sec'h a-raok an holl c'heot.

¹³ Evel-se eo hentoù an holl re a ankounac'ha Doue; esperañs an den dizoue a yelo da get.

¹⁴ E fiziañs a vo torret, hag e surentez a vo ur gwiad-kevnid.

¹⁵ Harpañ a raio war e di, ha ne zalc'ho ket, pegañ a raio ennañ, he ne chomo ket en e sav.

¹⁶ Eñ a zo leun a nerzh dirak an heol, e skourroù a vount dreist e liorzh,

¹⁷ e wrizioù a luzi war vernioù mein, mont a ra dre frailh ar voger,

¹⁸ ha ma vez tennet eus e lec'h, hemañ a nac'h anezhañ: Ne'm eus ket da anavezet!

¹⁹ Setu al levenez en deus eus e hent, ha reoù all war e lerc'h a ziwano eus ar poultr.

²⁰ Setu, Doue ne daol ket kuit an den eeun, met ne vo ket dorn-ha-dorn gant ar re zrouk.

²¹ Leuniañ a raio c'hoazh da c'henoù a c'hoarzhoù, ha da vuzelloù a ganaouennoù laouen.

²² Ar re a gasa ac'hanout a vo gwisket a vezh, ha teltenn ar re zrouk ne vo ken.