Levr Job 7 - Bibl Koad 21: Ar Bibl e Brezhoneg evit ar Vretoned

Pennad 7

¹ An den, ha ne ra ket ur servij-soudard war an douar? E zeizioù, ha n'int ket evel re ur goprad?

² Evel ar sklav a hiraezh d'ar skeud, evel ar goprad a c'hortoz e bae,

³ evel-se em eus bet da hêrezh mizioù aner, hag eo roet din nozvezhioù a boan.

⁴ Mard on gourvezet e lavaran: Pegoulz e savin? Pegoulz e vo echuet an noz? Hag em eus va gwalc'h a nec'hamantoù betek ar gouloù-deiz.

⁵ Va c'hig a zo goloet a breñved hag a drouskenn boultr, va c'hroc'hen a skalf hag a ziskarg.

⁶ Va deizioù o deus tremenet skañvoc'h eget ar vulzun eus ur gwiader, hag a zo echu hep esperañs.

⁷ Dalc'h soñj n'eo va buhez nemet ur c'hwezhadenn, ha n'adwelo ken va lagad an eürusted.

⁸ Al lagad am gwele ne sello ken ouzhin. Da zaoulagad a zo warnon, ha ne vin ken.

⁹ Ar goabrenn a steuz hag a ya kuit, evel-se an hini a ziskenn da lec'h ar marv ne adsavo ken.

¹⁰ Ne zistroio ken d'e di, hag e gêr n'anavezo ken anezhañ.

¹¹ Setu perak ne zalc'hin ken va genoù, komz a rin en anken va spered, klemm a rin e c'hwervded va ene.

¹² Daoust hag ez on ur mor, pe ur balum, ma lakaez en-dro din ur gward?

¹³ Pa lavaran: Va gwele am dic'hlac'haro, va gwelead am diboanio eus va c'hlemm,

¹⁴ neuze e spontez ac'hanon dre huñvreoù, hag e spouronez ac'hanon dre weledigezhioù.

¹⁵ Setu perak e vefe gwelloc'h da'm ene tagañ, ha mervel kentoc'h eget mirout va eskern.

¹⁶ Skuizh on... Ne vevin ket da viken. Pella diouzhin, rak n'eo nemet ur c'hwezhadenn va deizioù.

¹⁷ Petra eo an den evit ma rafes kement a van outañ, evit ma taolfes evezh outañ,

¹⁸ evit m'en gweladennfes bep mintin, evit m'en amproufes hep paouez?

¹⁹ Betek pegoulz e talc'hi da sellout ouzhin? Ha na'm lezi ket da lonkañ va halv?

²⁰ Pec'het em eus, petra a rin dit, o gedour an dud? Perak ec'h eus va lakaet da wenn evit da viroù? Perak ez on ur samm din va-unan?

²¹ Perak ne zilamez ket va fazi ha ne dremenfes ket a-us da'm direizhder? Rak ez an bremañ da c'hourvez er poultr; va c'hlask a ri ha ne vin ken.