Levr Job 6 - Bibl Koad 21: Ar Bibl e Brezhoneg evit ar Vretoned

Pennad 6 Respont kentañ Job

¹ Job a gomzas o lavarout:

² O! Ma vefe pouezataet va glac'har, ma vefe lakaet va foanioù a-gevret er valañs!

³ Pounneroc'h eget traezh ar mor e vefent! Setu perak eo diskiant va c'homzoù.

⁴ Biroù an Holl-C'halloudeg a zo ennon, va spered a ev o binim, spontoù Doue en em renk a-enep din.

⁵ An azen gouez, ha breugiñ a ra p'en deus geot? An ejen, ha blêjal a ra p'en deus boued?

⁶ Hag e vez debret hep holen ar pezh a zo goular? Ha kavet eo blaz e gwenn ur vi?

⁷ An traoù na fell ket da'm ene stekiñ outo, a zo deuet va boued ken doñjerus.

⁸ Ra vo sevenet va gouestl, ha Doue reiñ din ar pezh a c'hortozan.

⁹ Ra blijo gant Doue va distrujañ, ra lezo e zorn da vont da'm falc'hat!

¹⁰ Hag em bo ur frealz, e-kreiz ar poanioù n'espern ket ac'hanon em bo un abeg a levenez: ne'm eus ket dianzavet komzoù ar Sant.

¹¹ Peseurt nerzh am eus evit esperout? Peseurt diwezh e vo va hini evit pasiantiñ?

¹² Va nerzh, ha bez' eo nerzh ar vein? Va c'hig, ha bez' eo en arem?

¹³ Ha n'on ket hep sikour? Ha n'eo ket lamet diganin pep skoazell?

¹⁴ Ar reuzeudig en deus gwir da druez e vignon, zoken pa en defe dilezet doujañs an Holl-C'halloudeg.

¹⁵ Va breudeur o deus touellet ac'hanon evel ur froud, evel naoz an dourredennoù o tremen;

¹⁶ teñvalaet int gant ar skornennoù, an erc'h oc'h en em verniañ warno;

¹⁷ steuziañ a reont pa zeu da vezañ tomm an amzer, o vont diwar wel dindan ar wrez.

¹⁸ Ar strolladoù a ziank diouzh o hent, pignat a reont er gouelec'h hag en em gollont.

¹⁹ Strolladoù Tema a sell outo, beajourien Seba a zo en gortoz anezho.

²⁰ Mezhek int da vezañ bet fiziañs, droukvesket int pa erruont.

²¹ Evel-se ez oc'h din bremañ, gwelet hoc'h eus va diskar hag hoc'h eus aon razañ.

²² Ha lavaret em eus: Roit din? Eus ho madoù grit profoù din?

²³ Va dieubit eus dorn an enebour? Va dasprenit eus dorn ar re zrouk?

²⁴ Va c'helennit hag e chomin peoc'h. Roit din da anavezout e petra em eus dianket.

²⁵ Pegen nerzhus eo komzoù gwirion! Petra a fell d'ho kroz krozal?

²⁶ Hag e vefe gêrioù a fell deoc'h krozal? Ret eo reiñ d'an avel komzoù un den dizesperet.

²⁷ War un emzivad en em daolfec'h, hag ho mignon a doullfec'h.

²⁸ Met bremañ, mar plij, sellit ouzhin: daoust hag e lavarin gevier dirazoc'h?

²⁹ Distroit, na vezit ket direizh! Distroit, anzavit ez on didamall!

³⁰ Hag ez eus direizhder war va zeod? Ha ne oar ket santout an droug va staoñ?