Levr Job 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Galv bremañ! Hag e vefe unan bennak da respont dit? Etrezek pehini eus ar sent e troi?

² Ar vuanegezh a lazh an diskiant, an desped a laka ar sod da vervel.

³ Gwelet em eus an diskiant o wriziennañ, met milliget em eus buan e chomlec'h.

⁴ E vibien a zo pell eus pep sikour, friket int e-kichen an nor, ha den n'o dieub.

⁵ E eost a zo debret gant an ezhommeg, a-dreuz ar spern zoken eo tapet, al laer a lonk e vadoù.

⁶ An enkrez ne zeu ket eus ar boultrenn, hag ar boan ne ziwan ket eus an douar,

⁷ met an den a zo ganet evit ar boan, evel ar fulennoù evit nijal d'an nec'h.

⁸ Me a bedfe Doue, hag e tisplegfen va c'haoz da Zoue.

⁹ Eñ a ra traoù bras na c'heller ket furchal, burzhudoù na c'heller ket niveriñ.

¹⁰ Eñ a ro ar glav war-c'horre an douar, hag a gas an doureier war ar parkoù.

¹¹ Eñ a laka uhel ar re uvel, hag a sav e krec'h an eürusted ar re c'hlac'haret.

¹² Eñ a gas da netra divizoù an dud fall, hag o daouarn ne zeuont a-benn da netra.

¹³ Eñ a dap ar re fur en o gwidre, ha c'hoantoù ar re zrouk a zo diskaret,

¹⁴ war an deiz e kavont an deñvalijenn, hag e kerzhont a-dastorn da greisteiz evel da noz.

¹⁵ Eñ a savete ar paour eus ar c'hleze, hag eus o genoù, hag eus dorn an hini galloudek.

¹⁶ Bez' ez eus esperañs evit ar reuzeudig, hag an direizhder a zo serret e c'henoù.

¹⁷ Setu, eürus an den kastizet gant Doue! Na zispriz ket kastiz an Holl-C'halloudeg.

¹⁸ Rak eñ a ra ar gouli, hag a lien; gloazañ a ra hag e zaouarn a bare.

¹⁹ Eus c'hwec'h anken e tieubo ac'hanout, ha d'ar seizhvet an droug ne stoko ket ouzhit.

²⁰ En amzer an naonegezh e warezo ac'hanout diouzh ar marv, en amzer ar brezel diouzh lavnenn ar c'hleze.

²¹ Kuzhet e vi diouzh gwalenn an teod, ne'z po ket aon rak ar glac'har pa zeuio.

²² C’hoarzhin a ri e-pad an distruj hag an naonegezh, ha ne'z po ket aon rak loened an douar.

²³ Rak ez po un emglev gant mein ar parkeier, ha loened ar parkeier a vo e peoc'h ganit.

²⁴ Hag e weli da deltenn e peoc'h, gweladenniñ a ri da beurvanoù ha netra ne vanko dit.

²⁵ Hag e weli da lignez o kreskiñ, ha da ziskennidi o liesaat evel geot an douar.

²⁶ Mont a ri darev er bez, evel ur malan ed a zouger en e amzer.

²⁷ Setu, eveshaet hon eus ouzh an dra: evel-se emañ. Selaou ha tenn da vad.