Levr Job 41 - Bibl Koad 21: Ar Bibl e Brezhoneg evit ar Vretoned

Pennad 41

¹ Hag e tenni al leviatan gant un higenn? Hag e krogi en e deod gant ur gordenn?

² Hag e lakai ur vroenenn en e zivfron? Hag e toulli e javed gant ur c'hrog?

³ Hag e kaso dit kalz a aspedennoù? Hag e lavaro dit komzoù dous?

⁴ Hag e raio un emglev ganit? Hag e kemeri anezhañ evel servijer da viken?

⁵ Hag e c'hoarii gantañ evel gant ul labous? Hag e stagi anezhañ evit da verc'hed?

⁶ Hag e chervado da genseurted gant e c'hig? Hag e rannint anezhañ etre marc'hadourien?

⁷ Hag e toulli e groc'hen gant biroù, hag e benn gant un treant?

⁸ Laka warnañ da zorn, soñj en emgann, ha ne zistroi ket.

⁹ Setu, pep esperañs d'e zapout a vefe touellet. Ha n'omp ket taolet d'an douar o welout anezhañ?

¹⁰ N'eus den kalonek a-walc'h evit e zihuniñ. Piv neuze en em zalc'hfe en e sav dirazon?

¹¹ Piv en deus roet din en a-raok, ma roan dezhañ en-dro? Kement a zo dindan an neñvoù a zo din.

¹² Ne davin ket diwar-benn e izili, diwar-benn e nerzh bras, diwar-benn kaerder e framm.

¹³ Piv a c'hell dizoleiñ gorre e c'holoenn? Piv a c'hell mont etre e ziv javed?

¹⁴ Piv a c'hell digeriñ dorojoù e c'henoù? Ar spont en em zalc'h en-dro d'e zent.

¹⁵ E skoedoù galloudus a zo e lorc'h, kloz int ha siellet mat,

¹⁶ stekiñ a reont unan ouzh egile, an avel ne dremen ket etrezo,

¹⁷ stag int an eil ouzh egile, en em zerc'hel a reont, ne c'hellont ket bezañ dispartiet.

¹⁸ E streviadennoù a daol ur sked a sklêrijenn, e zaoulagad a zo evel malvennoù ar gouloù-deiz.

¹⁹ Flammennoù a zeu eus e c'henoù, fulennoù a dec'h dioutañ.

²⁰ Eus e zivfron e teu ur vogedenn, evel eus ul lestr o verviñ pe eus ur gaoter.

²¹ E anal a enaou glaouennoù, ur flamm a zeu er-maez eus e c'henoù.

²² En e c'houzoug emañ an nerzh, ar spont a gerzh a-raok dezhañ.

²³ Plegoù e gig a zo stag an eil ouzh egile, frammet start warnañ ha divrall.

²⁴ E galon a zo kalet evel ur maen, kalet evel ar maen-milin a-zindan.

²⁵ Pa sav, e kren ar re greñvañ, dinerzhañ a reont gant ar spouron.

²⁶ Pa dostaer outañ, ar c'hleze ne servij da netra, nag ar goaf, nag ar speg, nag an hobregon.

²⁷ Sellout a ra ouzh an houarn evel ouzh ar plouz, hag ouzh an arem evel ouzh koad brein.

²⁸ Ar bir ne laka ket anezhañ da dec'hout, mein ar vatalm a zo evel plouz evitañ,

²⁹ horzh a zo evel ur c'heotenn, c'hoarzhin a ra gant trouz ar c'hlezeier.

³⁰ E gof en deus darbodoù lemm, pa c'hourvez ec'h astenn evel ogedoù war al lec'hid.

³¹ Lakaat a ra an donder da verviñ evel ur gaoter, hag e ra d'ar mor bezañ evel lestr ur porfumer.

³² Lezel a ra war e lerc'h un hent skedus, en doare ma vefe kemeret an donder evel blev gwenn.

³³ N'eus ket e bar war an douar, graet eo bet evit n'en defe aon rak netra.

³⁴ Gwelout a ra dindanañ kement en em sav. Roue eo war holl loened lorc'hus