Levr Job 40 - Bibl Koad 21: Ar Bibl e Brezhoneg evit ar Vretoned

Pennad 40

¹ An AOTROU a gendalc'has da respont da Job o lavarout:

² Ar rendaeler, daoust hag e vreutaio gant an Holl-C'halloudeg? An hini a dabut gant Doue, daoust hag e responto da gement-se?

Respont Job d'an AOTROU

³ Job a respontas d'an AOTROU o lavarout:

⁴ Setu, displed on, petra a respontin dit? Lakaat a rin va dorn war va genoù.

⁵ Komzet em eus ur wech, ha ne respontin ken. Komzet em eus div wech, ha ne lavarin netra ouzhpenn.

Respont an AOTROU da Job

⁶ Hag an AOTROU a respontas da Job eus kreiz ar gorventenn o lavarout:

⁷ Gouriz da lounezhi bremañ evel un den kalonek, rak da c'houlennata a rin hag am c'helenni.

⁸ Hag e kasi da netra va barnedigezh? Hag e kondaoni ac'hanon evit ma vi reishaet?

⁹ Hag ec'h eus ur vrec'h evel hini Doue? Ha kuruniñ a rez gant da vouezh eveltañ?

¹⁰ Ha bremañ, en em fich gant kaerder ha braster, gwisk meurdez ha splannder,

¹¹ skuilh koummoù da gounnar, izela gant da sell an holl re lorc'hus,

¹² taol d'an traoñ gant da sell an holl re lorc'hus, bruzun an holl re fallakr war al leurenn,

¹³ skoach anezho holl a-gevret er poultr, dastum o dremm en deñvalijenn!

¹⁴ Neuze me ivez az meulo, rak e vi bet dieubet gant da zorn dehou.

¹⁵ Sell ouzh ar Behemod, am eus graet koulz ha te, debriñ a ra geot evel an ejen.

¹⁶ Sell, emañ e nerzh en e lounezhi, hag e greñvder e kigennoù e gof.

¹⁷ Sevel a ra e lost evel ur sedrezenn, nervennoù e zivorzhed a zo kenweet.

¹⁸ E eskern a zo korzennoù arem, e izili a zo barennoù houarn.

¹⁹ Pennoberenn hentoù Doue eo, e grouer en deus roet e gleze dezhañ.

²⁰ Ar menezioù a zoug evitañ o geot, e-lec'h m'emañ o c'hoari holl loened ar parkeier.

²¹ Gourvezet eo dindan al lotuz, kuzhet gant ar c'horz hag ar c'heun.

²² Al lotuz e c'holo gant o skeud, haleg ar froud a zo en-dro dezhañ.

²³ Pa zic'hlann ar stêr ned a ket kuit, n'en defe ket nec'h pa savfe ar Jordan betek e c'henoù.

²⁴ Hag e vo kemeret dre e zaoulagad? Hag e vo toullet e zivfron gant ur stign?