Levr Job 38 - Bibl Koad 21: Ar Bibl e Brezhoneg evit ar Vretoned

Pennad 38 Respont an AOTROU da Job

¹ Hag an AOTROU a respontas da Job eus kreiz ar gorventenn o lavarout:

² Piv eo an hini a deñvala an ali dre gomzoù diskiant?

³ Gouriz da lounezhi bremañ evel un den kalonek, rak da c'houlennata a rin hag am c'helenni.

⁴ Pelec'h e oas pa daolen diazezoù an douar? Lavar eta, ma ec'h eus poell.

⁵ Piv en deus reizhet e vuzulioù dezhañ, mar henn anavez? Piv en deus astennet ar gordenn warnañ?

⁶ War betra eo sanket e sichennoù? Piv en deus lakaet e vaen-korn,

⁷ pa gane a-unvan stered ar mintin hag e laoske kriadennoù a levenez holl vibien Doue?

⁸ Piv en deus endalc'het ar mor gant dorojoù, p'en deus strinket er-maez eus ar mammog,

⁹ pa em eus lakaet dezhañ ar goabrenn evit gwiskamant hag an deñvalijenn evit mailhuroù,

¹⁰ pa em eus urzhiet va reolenn warnañ ha lakaet morailhoù ha dorojoù dezhañ,

¹¹ ha pa em eus lavaret dezhañ: Betek amañ e teui ha ned i ket pelloc'h, amañ e paouezo lorc'h da goummoù?

¹² Abaoe ma'z out er bed, ha gourc'hemennet ec'h eus d'ar mintin ha merket da c'houloù-deiz e lec'h,

¹³ evit ma krogo e pennoù pellañ an douar ha ma vo ar re fallakr kaset kuit,

¹⁴ evit ma kemmo a zoare an douar evel pri dindan ar siell, evit ma savo pep tra evel evit gwiskañ un dilhad,

¹⁵ evit ma vo lamet diganto sklêrijenn ar re zrouk ha ma vo torret ar vrec'h a sav?

¹⁶ Hag aet out betek mammennoù ar mor, ha kerzhet ec'h eus war foñs an donder?

¹⁷ Ha dizoloet eo bet dit dorojoù ar marv? Ha gwelet ec'h eus dorojoù skeud ar marv?

¹⁸ Ha komprenet ec'h eus ledennad an douar? Mar anavezez kement-se, disklêr!

¹⁹ Pelec'h emañ hent chomlec'h ar gouloù? Pelec'h emañ chomlec'h an deñvalijenn,

²⁰ ma'z i da dapout anezhi d'he harzoù ha ma'c'h anavezi hent he zi.

²¹ Gouzout a rez kement-se, rak e voes ganet neuze, ha niver da zeizioù a zo bras!

²² Hag aet out betek teñzorioù an erc'h? Ha gwelet ec'h eus teñzorioù ar grizilh,

²³ a zalc'han evit amzer an enkrez, evit deiz ar brezel hag an emgann?

²⁴ Dre betore hent en em lodenn ar sklêrijenn, hag en em skuilh avel ar sav-heol war an douar?

²⁵ Piv en deus digoret un dreuzenn d'an dour-beuz, hag un hent da luc'hed ar c'hurun,

²⁶ evit lakaat da c'hlaviañ war un douar hep tud, war ur gouelec'h n'eus den ebet ennañ,

²⁷ evit dourañ lec'hioù digenvez ha glac'haret, hag ober diwanañ ha lakaat ar geot da zont er-maez?

²⁸ Hag en deus ar glav un tad? Piv a c'han an takennoù glizh?

²⁹ Eus peseurt kof eo deuet ar skorn? Piv a c'han rev an neñv,

³⁰ evit m'en em stlabez an doureier troet e mein, ha ma kaleta gorre an donder?

³¹ Hag e c'hellez skoulmañ ereoù ar Yarad-poñsined, pe distagañ chadennoù an Orion?

³² Hag e c'hellez kas er-maez ar steredegoù en o amzer, ha ren ar C'harr-kamm gant e re vihan?

³³ Hag ec'h anavezez reolennoù an neñvoù, hag ec'h urzhiez o renadur war an douar?

³⁴ Ha sevel a rez da vouezh etrezek ar c'houmoul evit gervel doureier bras da'z koleiñ?

³⁵ Hag e kasez luc’hed? Hag ez eont o lavarout dit: Setu ni amañ?

³⁶ Piv en deus lakaet ar furnez er c'hreizon, hag ar poell er galon?

³⁷ Piv a c'hell niveriñ ar c'houmoul gant furnez, piv a c'houllonder seier-lêr an neñvoù,

³⁸ pa'z eo mesket ar poultr evit dont fank, pa'z eo berniet ar moudennoù?

³⁹ Hag e hemolc'hez evit al leon e breizh, hag e torrez naon al leonedigoù

⁴⁰ pa'z int gourvezet en o zoulloù, pa chomont war-c'hed en o lec'hioù.

⁴¹ Piv a fich d'ar vran he boued pa gri e re vihan etrezek Doue ha pa nijont amañ hag ahont hep netra da zebriñ?