Levr Job 37 - Bibl Koad 21: Ar Bibl e Brezhoneg evit ar Vretoned

Pennad 37

¹ Va c'halon a gren a gement-se, hag e lamm er-maez eus e lec'h.

² Selaouit, selaouit trouz e vouezh ha ar soroc'herezh o tont eus e c'henoù.

³ E gas a ra dindan an holl neñvoù, e luc'hed a ya betek pennoù pellañ an douar.

⁴ War e lerc'h e kroz ur vouezh, kuruniñ a ra gant e vouezh meurdezus, n'espern ket e luc'hed pa strak e vouezh.

⁵ Doue a gurun gant e vouezh en un doare burzhudus, ober a ra traoù bras na gomprenomp ket.

⁶ Lavarout a ra d'an erc'h: Kouezh war an douar, hag ivez d'ar barrad-glav, zoken d'ar pilad-dour.

⁷ Lakaat a ra ur siell war zorn an holl dud, en doare ma ouezo an holl dud ez int e grouadurien.

⁸ Al loened en em denn d'o zoulloù, hag e chomont en o lec'hioù.

⁹ Ar barrad-avel a zeu eus donder ar c'hreisteiz, ar yenijenn a zeu eus avel an hanternoz.

¹⁰ Gant e c'hwezh Doue a ra ar skorn, hag an dour en em astenne a zo strishaet.

¹¹ Kargañ a ra ar c'hoabr eus glebor, hag e stlabez ar c'houmoul gant e sklaerder.

¹² Ober a ra dezho treiñ a bep tu hervez e renadur, evit ma raint ar pezh a c'hourc'hemenno dezho war-c'horre an douar poblet.

¹³ Pe evit kastizañ, pe evit lakaat an douar frouezhus, pe evit bezañ trugarezus, o laka da zont.

¹⁴ Ro da skouarn da gement-se, Job, chom peoc'h hag evesha ouzh burzhudoù Doue.

¹⁵ Ha gouzout a rez pa en deus o fichet Doue, ha graet d'al luc'hed lugerniñ en e c'hoabr?

¹⁶ Hag anavezout a rez kempouez ar c'houmoul, burzhudoù an hini a zo peurvat en anaoudegezh?

¹⁷ Perak e teu da zilhad da vezañ tomm pa ro diskuizh d'an douar gant avel ar c'hreisteiz?

¹⁸ Hag astennet ec'h eus gantañ an neñvoù, start evel ur melezour metal teuzet?

¹⁹ Desk deomp ar pezh a lavarimp dezhañ, rak n'oufemp ket komz en abeg d'hon teñvalijenn.

²⁰ Hag e vez lavaret dezhañ pa gomzan? Biskoazh den a felle dezhañ bezañ lonket!

²¹ Ha bremañ den ne c'hell sellout ouzh an heol o skediñ e-kreiz ar c'houmoul, p'en deus an avel tremenet hag o c'haset kuit,

²² pa deu evel aour splann eus an hanternoz. Bez' ez eus e Doue ur veurded spontus!

²³ An Holl-C'halloudeg, ne c'hellomp ket e dapout; uhelaet eo e galloud, e barnedigezh, e reizhder, ha ne wask den.

²⁴ Setu perak an dud a zouj anezhañ. Ne sell ket ouzh ar re a zo fur a galon.