Levr Job 36 - Bibl Koad 21: Ar Bibl e Brezhoneg evit ar Vretoned

Pennad 36

¹ Elihu a gendalc'has o lavarout:

² Gortoz ur pennad hag e kelennin ac'hanout, rak gerioù am eus c'hoazh evit kaoz Doue.

³ Tennañ a rin a-bell va gouiziegezh, hag e tifennin reizhder va c'hrouer.

⁴ A-dra-sur va lavarioù n'int ket gevier, an den a gomz dit en deus un anaoudegezh peurvat.

⁵ Doue a zo galloudek, met ne zispriz den ebet, galloudek eo dre nerzh e galon.

⁶ Ne lez ket bevañ an den fallakr, hag e ro e wir d'an ezhommeg.

⁷ Ne lam ket e zaoulagad diwar ar re reizh, o lakaat a ra gant ar rouaned war an tron, ober a ra dezho azezañ da viken, hag ez int uhelaet.

⁸ Mard int ereet gant chadennoù, mard int endalc'het gant ar glac'har,

⁹ e ro da anavezout dezho ar pezh o deus graet, o fec'hedoù hag o lorc'h.

¹⁰ Neuze e tigor o divskouarn d'ar gentel, hag e lavar dezho distreiñ diouzh an droug.

¹¹ Mar selaouont ha mar servijont anezhañ, ec'h echuint o deizioù en eurvad, hag o bloavezhioù el levenez.

¹² Ma ne selaouont ket, e vint lazhet gant barvenn ar c'hleze, hag e varvint hep anaoudegezh.

¹³ Ar re zizoue en o c'halon en em laka da gounnariñ, ne griont ket dezhañ pa ere anezho.

¹⁴ O ene a varvo en e yaouankiz, o buhez a echuo evel hini ar c'hastaouerien.

¹⁵ Saveteiñ a ra an ezhommeg eus e c'hlac'har, hag e kelenn anezhañ dre e boan.

¹⁶ Da lamet en defe er-maez eus genoù an anken, er frankiz, pell eus pep enkrez, da daol a vefe bet kempennet, goloet a zruzoni,

¹⁷ met ec'h eus kaset warnout barnioù an den drouk; ar varn hag ar gwir a drec'ho.

¹⁸ Laka evezh na raio ket ar gounnar dit droukpediñ, neuze un dic'haou bras ne c'hello ket da zieubiñ.

¹⁹ Hag e rafe van eus da binvidigezhioù? Nag eus an aour, nag eus da c'halloud bras.

²⁰ Na c'hoanta ket an noz, pa vez tapet ar pobloù en o lec'h.

²¹ Diwall da zistreiñ d'an direizhder, rak gwelloc'h eo ganit ar glac'har egetañ.

²² Setu Doue a zo uhelaet dre e c'halloud, piv a c'hellfe kelenn eveltañ?

²³ Piv a ziskouez dezhañ e hent? Piv a c'hell lavarout dezhañ: Graet ec'h eus un direizhder?

²⁴ Az pez soñj da veuliñ e oberennoù, a zo bet kanet gant an dud;

²⁵ pep den a arvest outo, pep den o gwell a-bell.

²⁶ Setu, Doue a zo uhelaet, ha n'anavezomp ket anezhañ, niver e vloavezhioù... nikun ne c'hell e niveriñ.

²⁷ Tennañ a ra an takennoù dour, hag e c'hlizhennont e glav e-kreiz ar vrumenn,

²⁸ ar c'hoabr a ra dezhañ redek ha strilhañ druz war an dud.

²⁹ Piv a c'hell kompren displeg ar c'hoabr, ha trouz e deltenn?

³⁰ Setu, astenn a ra en-dro dezhañ e sklêrijenn, hag e c'holo donder ar morioù.

³¹ Evel-se eo e varn ar pobloù, hag e ro boued e-leizh.

³² Derc'hel a ra kuzhet en e zorn ar sklêrijenn, hag e c'hourc'hemenn dezhi skeiñ.

³³ E gurun a gas keloù diwar e benn, santout a ra an tropell e zonedigezh.