Levr Job 33 - Bibl Koad 21: Ar Bibl e Brezhoneg evit ar Vretoned

Pennad 33

¹ Ha bremañ, Job, selaou va c'homzoù, ro da skouarn da'm holl c'herioù.

² Setu e tigoran va genoù, va zeod a gomz em staoñ.

³ Va c'homzoù a zeuio eus eeunder va c'halon, va muzelloù a lavaro gant frankiz ar pezh a ouzon.

⁴ Spered Doue eo en deus graet ac'hanon, c'hwezh an Holl-C'halloudeg eo a ro din buhez.

⁵ Mar gellez, respont din, stourm ouzhin a-dal, en em zalc'h.

⁶ Setu ez on eveldout dirak Doue, tennet on bet eus ar fank, me ivez.

⁷ Va spouron ne raio ket aon dit, va dorn ne bouezo ket warnout.

⁸ Met lavaret ec'h eus da'm divskouarn, hag em eus klevet mouezh da gomzoù:

⁹ Glan on, hep disentidigezh, naet on ha n'eus drougiezh ebet ennon.

¹⁰ Doue a glask digarezioù ennon, sellout a ra ouzhin evel e enebour.

¹¹ Lakaat a ra va zreid en hualoù, hag e spi va holl fiñvadennoù.

¹² Setu e kement-se n'emañ ket ar gwir ganit, a respontin dit, rak brasoc'h eo Doue eget an den.

¹³ Perak e taelez gantañ? Ne rent ket kont eus ar pezh a ra.

¹⁴ Doue a gomz ur wech, ha div wech, met ne daoler ket evezh,

¹⁵ dre huñvre, dre weledigezh noz, pa gouezh ur c'housk war an dud, e-pad ma kouskont war o gwele.

¹⁶ Neuze e tigor skouarn an den, ha e laka ur siell war e c'hourc'hemennoù,

¹⁷ evit distreiñ an den diouzh e oberoù fall, evit pellaat dioutañ al lorc'h,

¹⁸ evit diwall e ene diouzh ar poull, hag e vuhez diouzh ar c'hleze.

¹⁹ An den a zo kastizet ivez gant poanioù war e wele, pa vez hejet e eskern.

²⁰ Neuze e vuhez a heug ouzh ar bara, hag e ene ouzh ar gwellañ meuzioù.

²¹ En em wastañ a ra e gig hag ez a diwar wel, e eskern na weler ket a zo lakaet en noazh.

²² E ene a dosta ouzh ar poull, hag e vuhez ouzh treuzoù ar marv.

²³ Mar ez eus evitañ un ael hanterour, unan a-douez mil, evit reiñ da anavezout d'an den-se ar pezh a zo ret ober,

²⁴ neuze Doue en deus truez outañ hag a lavar: Daspren anezhañ, ma ne ziskenno ket er poull, kavet em eus un dic'haou.

²⁵ E gig a zeuio freskoc'h eget en e vugaleaj, hag e tistroio da zeizioù e yaouankiz.

²⁶ Pediñ a raio Doue hag e vo selaouet, gwelout a raio gant levenez e zremm, eñ a rento d'an den-se e reizhder.

²⁷ Kanañ a raio dirak an dud o lavarout: Pec'het em boa, diskaret em boa ar gwir, ha n'eo ket bet va foan kevatal,

²⁸ Doue en deus dasprenet va ene evit na gouezfe ket er poull, ha va buhez a wel c'hoazh ar sklêrijenn.

²⁹ Setu ar pezh a ra Doue div pe teir gwech e-keñver un den,

³⁰ evit tennañ e ene eus ar poull, hag evit e sklaeriañ gant sklêrijenn ar re vev.

³¹ Bez evezhiek, Job, selaou ouzhin, tav hag e komzin.

³² Mar ec'h eus un dra da lavarout, respont din, komz, rak e fell din da reishaat.

³³ Anez, selaou ouzhin, tav, hag e kelennin dit ar furnez.