Levr Job 32 - Bibl Koad 21: Ar Bibl e Brezhoneg evit ar Vretoned

Pennad 32 Prezegenn Elihu

¹ Neuze an tri den-mañ a baouezas da respont da Job, dre ma oa reizh ouzh e daoulagad e-unan.

² Hag ec'h entanas kounnar Elihu mab Barakeel, eus Buz, eus tiegezh Ram. E gounnar a entanas a-enep Job dre ma en em reishae e-unan dirak Doue.

³ E gounnar a entanas ivez a-enep e dri mignon, dre n'o doa kavet netra da respont, ha koulskoude o doa kondaonet Job.

⁴ Elihu en doa gortozet, evit komz da Job, ma o defe int komzet, dre ma oant koshoc'h egetañ.

⁵ Elihu a welas n'o doa an tri den-mañ netra da respont, ha neuze e gounnar a entanas.

⁶ Elihu mab Barakeel, eus Buz, a gomzas o lavarout: Me a zo yaouank ha c'hwi a zo kozh, setu perak em eus doujet, ha n'em eus ket kredet reiñ va ali.

⁷ Lavarout a raen: An deizioù a gomzo, niver bras ar bloavezhioù a roio da anavezout ar furnez.

⁸ Met ar spered a zo en den, hag awen an Holl-C'halloudeg eo a ro poell.

⁹ N'eo ket ar re henañ a zo fur, n'eo ket ar re gozh a gompren ar varnedigezh.

¹⁰ Setu perak e lavaran: Selaou ouzhin, hag e tisklêrin va ali, me ivez.

¹¹ Gortozet em eus diwezh ho prezegennoù, selaouet em eus ho poellataerezhioù ha penaos hoc'h eus aozet ho frazennoù.

¹² Taolet em eus evezh ouzhoc'h, ha setu, nikun ac'hanoc'h n'en deus kendrec'het Job, na respontet d'e gomzoù.

¹³ Ha na lavarit ket: Kavet hon eus ar furnez! Doue eo a c'hell e abafiñ, n'eo ket un den.

¹⁴ N'en deus ket kaset e gomzoù a-enep din, ha ne respontin ket dezhañ gant ho kerioù.

¹⁵ Sabatuet int! Ne respontont ken, lamet eo bet o mouezh diganto!

¹⁶ Gortozet em eus, ha ne gomzont ken, en em zerc'hel a reont aze hep respont.

¹⁷ Me a responto da'm zro, hag e lavarin va ali, me ivez.

¹⁸ Rak leuniet on a gomzoù, ar spered a zo em c'hreiz am gwask.

¹⁹ Va bruched a zo evel gwin na vefe ket avelet, mont a ra da freuzañ evel seier-lêr nevez.

²⁰ Komz a rin evit bezañ disammet, digeriñ a rin va muzelloù hag e respontin.

²¹ Ne rin van eus diavaez an dud, ha ne loavin den ebet.

²² Rak n'ouzon ket loavañ, va c'hrouer am savfe kuit prestik!