Levr Job 31 - Bibl Koad 21: Ar Bibl e Brezhoneg evit ar Vretoned

Pennad 31

¹ Graet em boa un emglev gant va daoulagad; penaos em befe sellet ouzh ur werc'hez?

² Peseurt lod en defe Doue lakaet a-du din eus krec'h? Peseurt hêrezh en defe an Holl-C'halloudeg kaset din eus al lec'hioù uhel?

³ Ar rivin, ha n'eo ket evit an den drouk? Ar gwalleur, ha n'eo ket evit ar vicherourien a zireizhder?

⁴ Ha ne wel ket va hentoù? Ha ne niver ket va holl gammedoù?

⁵ Mar em eus kerzhet er gevier, mar en deus va zroad hastet etrezek an touell,

⁶ ra bouezo Doue ac'hanon gant ur valañs just, hag ec'h anavezo va eeunder.

⁷ Mar o deus distroet va c'hammedoù diouzh an hent, mar he deus va c'halon heuliet va daoulagad, mar ez eus ur saotr bennak staget ouzh va daouarn,

⁸ ra zebro unan all ar pezh am eus hadet, ra vo diwriziennet va eost!

⁹ Mard eo bet va c'halon touellet gant ur vaouez, mard on bet o c'hedal e-kichen dor va nesañ,

¹⁰ ra valo va gwreg evit unan all, ra vo dizenoret gant reoù all!

¹¹ Rak kement-se a zo un drougiezh rakprederiet, un direizhder kastizet gant ar varnerien,

¹² un tan eo hag a lonk betek an distruj leun, hag en defe distrujet va holl c'hounid.

¹³ Mar em eus disprizet gwir va servijer pe va matezh pa oant o taelañ ganin,

¹⁴ petra a rin pa savo Doue? petra a respontin pa c'houlenno kont ouzhin?

¹⁵ An hini en deus graet ac'hanon er c'hof, ha n'en deus ket graet anezho? An hevelep Hini en deus stummet ac'hanomp er mammog.

¹⁶ Mar em eus tremenet hep reiñ d'ar beorien o goulenn, mar em eus lezet daoulagad an intañvez da langisañ,

¹⁷ mar em eus debret va-unan va bara, hep m'en defe debret an emzivad dioutañ,

¹⁸ adalek va yaouankiz eo bet savet em c'hichen evel e-kichen un tad, adalek kof va mamm em eus renet an intañvez,

¹⁹ mar em eus gwelet un den o vervel hep dilhad, hag ar paour hep pallenn,

²⁰ ha n'o deus ket va benniget e lounezhi, ha n'en deus ket en em dommet gant kreoñ va oaned,

²¹ mar em eus savet va dorn a-enep an emzivad, pa em eus e welet ouzh an nor ha ma c'hellen e skoazell,

²² ra gouezho va skoaz diouzh va c'hil, ra vo torret va brec'h ha pellaet diouzh an ilin,

²³ rak glac'har Doue en deus va spouronet, ne c'hellin ket padout dirak e veurded.

²⁴ Mar em eus lakaet en aour va esperañs, mar em eus lavaret d'an aour glan: Va fiziañs ez out,

²⁵ mard on bet laouenaet gant va gounid bras ha gant an holl bezh en doa va dorn dastumet,

²⁶ mar em eus sellet ouzh an heol o lugerniñ hag ouzh al loar o vont a-raok kaer,

²⁷ hag em eus lezet da douellañ e kuzh va c'halon, hag en deus va dorn kaset pokoù,

²⁸ un direizhder kastizet gant ar varnerien, rak dianzav Doue an krec'h e vefe,

²⁹ mard on bet laouenaet gant gwalleur va enebour, mar em eus tridet a levenez p'en deus an droug e dapet,

³⁰ met ne'm eus ket lezet da bec'hiñ va zeod o c'houlenn e varv gant mallozhioù,

³¹ mar n'o deus ket lavaret tud va zi: Pelec'h ez eus unan bennak ha na vefe ket bet gwalc'het a gig?,

³² mar en deus tremenet an diavaeziad an noz er-maez, mar n'em eus ket digoret va dor d'ar beajour,

³³ mar em eus goloet, evel Adam, va fec'hedoù, mar em eus kuzhet em bruched va direizhder,

³⁴ rak em eus bet aon rak an engroez bras, em eus bet aon rak dispriz an tiegezhioù, en doare ma chomen sioul ha na greden ket mont e-maez an nor,

³⁵ o, ra gavin unan bennak am selaouo! Setu va arouez: Ra responto an Holl-C'halloudeg din, ra skrivo va zamaller e glemm.

³⁶ A-dra-sur en dougin war va skoaz, hag en stagin warnon evel ur gurunenn.

³⁷ Disklêriañ a rin dezhañ niver va c'hammedoù, tostaat a rin outañ evel ouzh ur priñs.

³⁸ Mar kri va douar em enep, mar gouel e irvi gantañ,

³⁹ mar em eus debret e frouezh hep arc'hant, mar em eus glac'haret o ene d'ar re o doa e berc'hennet,

⁴⁰ ra roio draen e-lec'h gwinizh, ha dreog e-lec'h heiz! Setu diwezh komzoù Job.