Levr Job 29 - Bibl Koad 21: Ar Bibl e Brezhoneg evit ar Vretoned

Pennad 29

¹ Job a gendalc'has d'ober e brezegenn o lavarout:

² O! Perak n'on ken evel er mizioù a-wechall, evel en deiz ma tiwalle Doue ac'hanon,

³ pa lugerne e c'houlaouen war va fenn, pa gerzhen ouzh e sklêrijenn en deñvalijenn,

⁴ evel en deizioù va diskar-amzer, pa veze sekred Doue em zeltenn,

⁵ pa oa an Holl-C'halloudeg c'hoazh ganin, ha va re yaouank en-dro din,

⁶ pa walc'hen va zreid el laezh, pa zevere ar roc'h din froudoù eoul!

⁷ Pa'z aen er-maez etrezek dor kêr, e lakaen kempenn din ur gador war al leurenn.

⁸ Ar re yaouank a yae da guzh o welout ac'hanon, ar re gozh a save hag en em zalc'he en o sav.

⁹ Ar briñsed a baoueze da gomz hag a lakae o dorn war o genoù.

¹⁰ Mouezh ar pennoù bras a dave, o zeod a stage ouzh o staoñ.

¹¹ Ar skouarn am c'hleve am disklêrie eürus, al lagad am gwele a roe testeni din.

¹² Rak e tieuben an ezhommeg a azgoulenne, hag an emzivad n'en doa den d'e skoazellañ.

¹³ Bennozh an hini a yae da vervel a gouezhe warnon, hag e leunien a levenez kalon an intañvezed.

¹⁴ Gwiskañ a raen ar reizhder, va dilhad e oa, va eeunder a oa va mantell ha va zog.

¹⁵ Daoulagad an dall e oan, ha treid ar c'hamm.

¹⁶ Tad ar beorien e oan, hag ec'h enklasken gwir an hini dianav.

¹⁷ Bruzunañ a raen javed an hini direizh, hag e lamen diouzh e zent e breizh.

¹⁸ Hag e lavaren: Mervel a rin em neizh, hag e liesain va deizioù evel an traezh.

¹⁹ Va gwrizienn a oa digor d'an dour, ar glizh a dremene an noz war va skourroù.

²⁰ Va gloar a nevesae ennon, va gwareg a greñvae em dorn.

²¹ Va selaou a raed, hag e c'hortozed, hag e taved pa roen va alioù.

²² Goude ma em beze komzet ne respontent ket, va lavarioù a zevere warno.

²³ Va gortoz a raent evel ar glav, hag e tigorent o genoù evel evit glav an diwezhañ amzer.

²⁴ Mousc’hoarzhin a raen pa ne gredent ket, ne c'hellent ket kas diwar wel sederoni va dremm.

²⁵ Karout a raen mont ganto hag ec'h azezen evel o fenn, evel ur roue e-kreiz e arme, evel ur frealzer e-kreiz ezhommeien.