Levr Job 28 - Bibl Koad 21: Ar Bibl e Brezhoneg evit ar Vretoned

Pennad 28

¹ Bez' ez eus ur vengleuz evit tennañ an arc'hant diouti, hag ul lec'h evit glanaat an aour ennañ.

² An houarn a vez tennet diouzh ar poultr, hag ar maen teuzet a ro an arem.

³ Lakaet eo un dibenn d'an deñvalijenn, hag e vez klasket betek an harzoù pellañ mein kuzhet en deñvalijenn hag e skeud ar marv.

⁴ Kleuzet eo ur puñs pell diouzh al lec'hioù tudet; ennañ ne c'heller ket araokaat gant an treid, hag e vezer ispilhet hag hejet pell diouzh an dud.

⁵ Eus an douar eo e teu ar bara, hag ez eo troc'holiet en e zonderioù evel gant an tan.

⁶ E reier eo chomlec'h ar safir, eno e vez kavet poultr aour.

⁷ Al labous-preizh n'anavez ket an hent di, lagad ar bultur n'en gwel ket.

⁸ Al loened lorc'hus n'o deus ket kerzhet ennañ, al leon n'eo ket tremenet drezañ.

⁹ An dorn a vez lakaet war ar reier, ha troc'holiet eo ar menezioù betek o gwrizioù.

¹⁰ Kleuzet eo gwazhioù er reier, hag al lagad a wel kement a zo prizius.

¹¹ Harzet eo diruilhad an doureier, an traoù kuzhet a zo tennet d'ar gouloù.

¹² Met pelec'h e vo kavet ar furnez? Pelec'h emañ ar poell o chom?

¹³ An den n'anavez ket he friz, n'emañ ket e douar ar re vev.

¹⁴ N'emañ ket ennon, eme an donder; n'emañ ket ganin, eme ar mor.

¹⁵ Ne vez ket roet evit aour glan, ne vez ket prenet o pouezañ arc'hant.

¹⁶ Ne vez ket pouezet gant aour Ofir, na gant oniks prizius, na gant safir.

¹⁷ Ne vez ket heñvelaet gant an aour nag ar gwer. Ne vez ket troket evit ul lestr aour glan.

¹⁸ Ne gomzer ket eus ar c'houral, nag eus ar strink, priziusoc'h eo ar furnez eget perlez.

¹⁹ Topaz Etiopia ne c'hell ket bezañ kevatal outi, ne vez ket pouezet gant aour glan.

²⁰ Met a-belec'h e teu ar furnez? Pelec'h emañ ar poell o chom?

²¹ Mouchet eo dirak daoulagad an holl re vev, kuzhet eo dirak laboused an neñvoù.

²² Ar poull hag ar marv a lavar: Klevet hon eus komz diouti gant hon divskouarn.

²³ Doue a anavez e hent, eñ a oar pelec'h emañ o chom.

²⁴ Rak sellout a ra betek harzoù ar bed, gwelout a ra dindan an holl neñvoù.

²⁵ Pa roe d'an avel e bouez, pa vuzulie an doureier dre gementadoù,

²⁶ pa rae ur reolenn evit ar glav, pa drese un hent evit luc'hed ar c'hurun,

²⁷ neuze e welas anezhi, he disklêrias, he diazezas, ha zoken he furchas.

²⁸ Hag e lavaras d'an den: Setu, doujañs an Aotrou eo ar furnez, distreiñ diouzh an droug eo ar poell.