Levr Job 26 - Bibl Koad 21: Ar Bibl e Brezhoneg evit ar Vretoned

Pennad 26 Eizhvet respont Job

¹ Job a gomzas o lavarout:

² Skoazellet ec'h eus an hini dinerzh, saveteet ec'h eus ar vrec'h dic'halloud,

³ kelennet ec'h eus an hini hep furnez, roet ec'h eus da welout ul leunded a furnez.

⁴ Da biv ec'h eus disklêriet da gomzoù? Spered piv a zeu diganit?

⁵ Traoù hep buhez a zo stummet dindan an doureier ha dindan ar re a zo o chom enno.

⁶ Lec'h ar marv a zo en noazh dirazañ, n'eus ket a ouel war an donder.

⁷ Astenn a ra an hanternoz war ar goullo, hag ec'h istribilh an douar war an netra.

⁸ Dastum a ra an doureier er c'houmoul, hag ar goabrenn n'eo ket roget dindan o fouez.

⁹ Goleiñ a ra dremm e dron, hag ec'h astenn e goumoul a-us dezhañ.

¹⁰ Merket en deus ur c'helc'h war an doureier, evel bevenn etre sklêrijenn ha teñvalijenn.

¹¹ Peulioù an neñvoù a zo brañsellet ha souezhet pa c'hourdrouz.

¹² Dre e nerzh e sav ar mor, dre e veiz e vruzun al lorc'h.

¹³ Dre e Spered e fich an neñvoù, e zorn a dreuz an naer tec'had.

¹⁴ Setu aze kostezioù e hentoù, ha pegen bihan eo al lodenn a anavezomp! Piv a c'hello kompren kurun e c'halloud?