Levr Job 24 - Bibl Koad 21: Ar Bibl e Brezhoneg evit ar Vretoned

Pennad 24

¹ Perak na laka ket an Holl-C'halloudeg amzerioù a-du? Perak ar re a anavez anezhañ ne welont ket e zeizioù?

² Dilec'hiet eo ar bonnoù, laeret eo an tropelloù evit o lakaat da beuriñ,

³ kaset eo azen an emzivaded, lakaet eo e gouestl ejen an intañvez,

⁴ pellaet eo ar beorien diwar an hent, ret eo d'an ezhommeien en em guzhat.

⁵ Setu, evel ezen gouez er gouelec'h ez eont er-maez d'o labour, o sevel abred evit ur preizh. Ar gouelec'h a ro dezho bara evit o re vihan.

⁶ Mediñ a reont er parkeier, hag e raspaont gwinienn an den drouk.

⁷ Lakaat a reont ar re ziwisket da dremen an noz hep dilhad, ne roont ket ur ballenn dezho pa'z eo yen,

⁸ pa'z int glebiet gant glav ar menezioù hag e vriataont ar roc'h hep bodenn.

⁹ Diframmañ a reont an emzivad diouzh ar vronn, hag e kemeront gouestl war ar paour.

¹⁰ Dezhañ e reont kerzhout en noazh, hep dilhad, hag e tennont o feskennoù a-zirak an naoneien.

¹¹ Etre o mogerioù e gwaskont an eoul, hag e jaodront er beolioù, hag o deus sec'hed.

¹² Eus kêr e vez klevet tud o hirvoudiñ, ene ar re c'hloazet a glemm, ha Doue ne ra ket van outo.

¹³ Setu amañ ar re en em sav a-enep ar sklêrijenn, n'anavezont ket e hentoù, ne chomont ket war e wenodennoù.

¹⁴ Ar muntrer a sav da c'houloù-deiz, hag e lazh ar paour hag an ezhommeg; e-pad an noz eo ul laer.

¹⁵ Lagad an avoultrer a zo war spi da serr an noz, o lavarout: Lagad ebet ne'm gwelo; ha kuzhat a ra e zremm.

¹⁶ En deñvalijenn e toullont an tiez o doa merket war an deiz. N'anavezont ket ar sklêrijenn.

¹⁷ Ar mintin a zo dezho evel skeud ar marv, spontet int evel gant skeud ar marv pa'z int anavezet gant unan bennak.

¹⁸ Mont a reont kuit evel un dra skañv war-c'horre an dour, o lodenn a zo milliget war an douar, ne gemeront ket hent ar gwini.

¹⁹ Ar sec’her hag an tommder a guzum doureier an erc'h, evel-se lec'h ar marv a guzum ar bec'herien.

²⁰ Ar c'hof en ankounac’haio, ar preñv en debro c'hwek, den n'en devo soñj anezhañ, an den direizh a vo drailhet evel ur wezenn.

²¹ Gwallgas a ra ar sec'henn n'he deus ket a vugale, ne ra mat ebet d'an intañvez,

²² dre e nerzh e sach ar re c'halloudek, pa sav nikun n'eo sur eus e vuhez.

²³ Eñ eo a ro surentez dezho, hag en em harpont war gement-se. Koulskoude e zaoulagad a zo war o hentoù.

²⁴ Savet o deus un nebeudig, ha n'emaint ken. Plegañ a reont hag int kaset kuit evel ar re all, troc'het int evel penn un dañvouezenn.

²⁵ Ma n'eo ket evel-se, gant piv e vin prouet gaouiad? Piv a lakaio da netra va c'homzoù?