Levr Job 19 - Bibl Koad 21: Ar Bibl e Brezhoneg evit ar Vretoned

Pennad 19 Pempvet respont Job

¹ Job a gomzas o lavarout:

² Betek pegoulz e c'hlac'harot va ene, hag am bec'hiot a gomzoù?

³ Dek wech dija hoc'h eus graet dismegañs din. Ha n'hoc'h eus ket mezh da'm gwallgas?

⁴ E gwirionez mar em eus faziet, va fazi a chom ganin.

⁵ E gwirionez mar en em savit a-enep din, mar rebechit din an dismegañs m'en em gavan enni,

⁶ anavezit eta eo Doue a ziskar ac'hanon, hag en deus astennet e roued en-dro din.

⁷ Setu e krian d'an taerder, ha den ne respont. Hag e huchan, ha n'eus reizhder ebet.

⁸ Serret en deus va hent, ha ne c'hellan ket tremen. Lakaet en deus teñvalijenn war va gwenodennoù.

⁹ Diwisket en deus ac'hanon eus va gloar, lamet en deus ar gurunenn diwar va fenn.

¹⁰ Va distrujet en deus a bep tu hag ez an kuit, diframmet en deus va esperañs evel ur wezenn.

¹¹ Entanet en deus e gounnar a-enep din, va sellet en deus evel unan eus e enebourien.

¹² E strolladoù a zo deuet a-gevret, digoret o deus o hent betek ennon, kampet o deus en-dro da'm zeltenn.

¹³ Pellaet en deus diouzhin va breudeur, ar re am anaveze a zo aet kuit.

¹⁴ Va c'herent-nes o deus va dilezet, va anaoudeien o deus va ankounac'haet.

¹⁵ Tud va zi ha va mitizhien o deus va c'hontet estrañjour, deuet on da vezañ un diavaeziad evito.

¹⁶ Galvet em eus va servijer ha n'en deus ket respontet, gant va genoù em eus e bedet en aner.

¹⁷ Va anal a zo kasaet gant va gwreg, pedet em eus mibien va c'hof.

¹⁸ Ar vugaligoù zoken a zispriz ac'hanon, mar savan e komzont em enep.

¹⁹ Holl re va c'huzul o deus euzh ac'hanon, ar re a garen a zo troet em enep.

²⁰ Va eskern a zo staget ouzh va c'hroc'hen hag ouzh va c'hig, tec'het on kuit gant kroc'hen va dent.

²¹ Ho pet truez ouzhin! Ho pet truez ouzhin, va mignoned! Rak skoet on bet gant dorn Doue.

²² Perak e redit war va lerc'h evel Doue? Ha n'hoc'h eus ket bet ho kwalc'h eus va c'hig?

²³ Me a garfe e vefe skrivet va c'homzoù bremañ. Me a garfe e vefent engravet en ul levr.

²⁴ Me a garfe e vefent kizellet war ur roc'h gant ur gizell houarn ha gant plom, evit biken.

²⁵ Gouzout a ran-me ez eo bev va dasprener, ha d'an diwezh e savo war an douar,

²⁶ ha goude ma vo distrujet ar c'hroc'hen-mañ, er-maez eus va c'hig e welin Doue;

²⁷ me a welo anezhañ, va daoulagad en gwelo, ha nann unan all. Va lounezhi a bulluc'h em c'hreizon.

²⁸ Ret e vefe deoc'h lavarout kentoc'h: Perak e heskinomp anezhañ? Daoust hag e kavimp ennañ abeg e walleur?

²⁹ Doujit ar c'hleze evidoc'h hoc'h-unan, rak ar fulor a zo kastizet dre ar c'hleze. Ha gouezit ez eus ur varn.