Levr Job 16 - Bibl Koad 21: Ar Bibl e Brezhoneg evit ar Vretoned

Pennad 16 Pevare respont Job

¹ Job a gomzas o lavarout:

² Alies em eus klevet traoù evel-se. Frealzerien fall ez oc'h holl.

³ Hag e vo un diwezh d'ar c'homzoù aner-se? Petra a zegas ac'hanout da respont evel-se?

⁴ Hag e komzfen eveldoc'h, ma vefec'h em lec'h? Ha berniañ a rafen komzoù a-enep deoc'h? Hag hejañ a rafen va fenn warnoc'h?

⁵ Ho nerzhañ a rafen gant va genoù, ha fiñvadenn va muzelloù ho tinec'hfe.

⁶ Mar komzan, va foan ne baouezo ket, ha mar tavan, ne vo ket nebeutaet.

⁷ Bremañ en deus va disec'het. Gwastet ec'h eus va holl dud,

⁸ va c'hrizennoù a ro testeni em enep, va zreuter a sav a-enep din, va zamall a ra em dremm.

⁹ E gounnar he deus va roget en ur stourm ouzhin, grigoñsat a ra e zent warnon, va enebour a lemm a-enep din e zaoulagad.

¹⁰ Warnon o deus digoret o genoù, skoet o deus war va divjod evit va dismegañsiñ, en em zastum a reont holl a-gevret em enep.

¹¹ Doue en deus va lakaet etre daouarn an dud direizh, va zaolet etre daouarn ar re zrouk.

¹² En diskuizh e oan hag en deus va bruzunet, kroget en deus em gouzoug ha brevet ac'hanon, va lakaet da wenn evit e viroù.

¹³ E waregerien a zo en-dro din, toullañ a reont va lounezhi ha n'espernont ket ac'hanon, teurel a ra va bestl d'an douar.

¹⁴ Va freuzañ a ra gant freuz war freuz, redek a ra warnon evel ur brezelour.

¹⁵ Gwriet em eus ur sac'h war va c'hroc'hen, lakaet em eus va fenn er poultr.

¹⁶ Va dremm a zo koeñvet gant an daeroù, emañ skeud ar marv war va malvennoù,

¹⁷ ha koulskoude n'eus torfed ebet em daouarn, ha glan eo va fedenn.

¹⁸ O douar, na c'holo ket va gwad! Ra ne vo lec'h ebet evit derc'hel va c'hriadenn.

¹⁹ Ha bremañ, setu, va zest a zo en neñv, va diwaller el lec'hioù uhelañ.

²⁰ Va mignoned a ra goap ouzhin, etrezek Doue eo e tro va daoulagad en ur ouelañ.

²¹ Ra vreutaio unan bennak evit an den e-kichen Doue, evel ma vreuta un den evit e amezeg.

²² Rak ar bloavezhioù a zo niveret din hag e tec'hont; mont a ran war an hent hep distro.