Levr Job 13 - Bibl Koad 21: Ar Bibl e Brezhoneg evit ar Vretoned

Pennad 13

¹ Setu, va lagad en deus gwelet kement-se holl, va skouarn he deus henn klevet ha komprenet.

² C'hwi a oar, ha me a oar ivez. N'on ket izeloc'h egedoc'h.

³ Met e komzin ouzh an Holl-C'halloudeg, hag e fell din breutaat dirak Doue.

⁴ C'hwi a liv gevier, hag ez oc'h holl medisined didalvoud.

⁵ Ra chomot sioul! Ra vo-se ho furnez.

⁶ Selaouit eta va rebechoù, bezit evezhiek ouzh respont va muzelloù.

⁷ Daoust hag e lavarot komzoù direizh e-keñver Doue, hag e rannot gerioù touellus en e geñver?

⁸ Daoust hag e savit anezhañ, hag e vreutait evit Doue?

⁹ Ha mat ez afe ganeoc'h ma furchfe ac'hanoc'h? Evel ma toueller un den, hag e touellfec'h anezhañ?

¹⁰ A-dra-sur e tamallo ac'hanoc'h, ha pa savit anezhañ e-kuzh.

¹¹ E veurded, ha n'ho spourono ket? E spont, ha ne gouezho ket warnoc'h?

¹² Ho menegoù a zo gerioù ludu, ho tifennoù a zo difennoù pri.

¹³ Chomit peoc'h dirazon, ma komzin! Ra c'hoarvezo ganin ar pezh a c'hoarvezo.

¹⁴ Perak e kemerfen va c'hig etre va dent hag e lakafen va ene etre va daouarn?

¹⁵ Ha pa lazhfe ac'hanon, ennañ em befe esperañs, hag e talc'hfen va hentoù dirazañ.

¹⁶ Ha kement-se a drofe e silvidigezh din, met un den dizoue ne zeuio ket dirazañ.

¹⁷ Selaouit, selaouit va c'homzoù, roit ho skouarn d'ar pezh a zisklêrian deoc'h.

¹⁸ Setu em eus urzhiet va c'haoz, hag ec'h ouzon e vin reishaet.

¹⁹ Piv a vreutaio em enep? Mar tavan e varvin.

²⁰ Ro daou dra din hepken, ha ne guzhin ket dirazout:

²¹ Pella da zorn diwarnon, ha na spouron ket ac'hanon gant da spont.

²² Neuze, galv hag e respontin, pe e komzin hag e responti.

²³ Pegement a zireizhderioù hag a bec'hedoù am eus graet? Ro din da anavezout va drougoberoù ha va fec'hed.

²⁴ Perak e kuzhez da zremm, hag e kontez ac'hanon evel da enebour?

²⁵ Daoust hag e fell dit spontañ un delienn kaset gant an avel, redek war-lerc'h ur blouzenn sec'h?

²⁶ Rak e skrivez em enep traoù c'hwerv, va lakaez da zougen pec'hedoù va yaouankiz,

²⁷ en hualoù e lakaez va zreid, ouzh va holl hentoù ec'h eveshaez, un harz a verkez en-dro da seulioù va zreid.

²⁸ Emañ o kouezhañ an hini a zistrujez evel koad brein, evel ur vantell debret gant an tagn.