Levr Job 12 - Bibl Koad 21: Ar Bibl e Brezhoneg evit ar Vretoned

Pennad 12 Trede respont Job

¹ Job a gomzas o lavarout:

² E gwirionez ez oc'h ur bobl a-bezh, ganeoc'h e varvo ar furnez.

³ Skiant am eus eveldoc'h, n'on ket izeloc'h egedoc'h; piv ne oar ket an traoù-se?

⁴ Ur c'hoapadenn evit e vignoned ez on-me, un den a c'halv Doue hag e respont dezhañ... Ur c'hoapadenn hoc'h eus graet eus un den reizh hag eeun!

⁵ Dispriz d'ar gwalleur! evel-se emañ soñj ar re eürus. An dispriz a zo lakaet a-du evit ar re a vrañsell o zroad.

⁶ E peoc'h emañ teltennoù al laeron, ar surentez a zo evit ar re a hegas Doue, ar re a ra un doue eus o daouarn.

⁷ Goulenn eta digant al loened, da gelenn a raint, digant laboused an neñv, disklêriañ a raint dit;

⁸ komz ouzh an douar, da gelenn a raio, pesked ar mor a lavaro dit.

⁹ Piv ne oar, e-touez an holl re-se, ez eo dorn an AOTROU en deus graet-se?

¹⁰ Derc'hel a ra en e zorn ene an holl re vev ha spered pep kig den.

¹¹ Ar skouarn, ha ne verz ket ar gerioù evel ma c'hell ar staoñ tañva ar boued?

¹² Ar furnez a zo gant ar re gozh, ar meiz eo frouezh an deizioù hir.

¹³ Gantañ emañ ar furnez hag an nerzh, dezhañ eo ar c'huzul hag ar meiz.

¹⁴ Setu e tiskar ha n'adsaver ket, ha pa brenn war unan bennak, ne zigorer ket.

¹⁵ Setu e harz ouzh an doureier hag e tisec'hont, ha ma laosk anezho ec'h eilpennont an douar.

¹⁶ Gantañ emañ ar galloud hag ar furnez, dezhañ eo an hini touellet hag an toueller.

¹⁷ Ober a ra d'ar guzulierien kerzhout diarc'hen, hag e laka ar varnerien da vezañ diskiant.

¹⁸ Diliammañ a ra gouriz ar rouaned, hag ec'h ere o divgroazell gant ar gordenn.

¹⁹ Ober a ra d'an aberzhourien kerzhout diarc'hen, hag e tiskar ar c'halloudeien.

²⁰ Lemel a ra ar gomz digant ar re disaouzan, hag e tiberc'henn ar re gozh diouzh o skiant.

²¹ Skuilhañ a ra an dispriz war ar briñsed, hag e tiere gouriz ar c'halloudeien.

²² Lakaat a ra war wel an donderioù kuzhet en deñvalijenn, hag e tegas d'ar sklaerder skeud ar marv.

²³ Kreskiñ a ra ar broadoù hag e koll anezho, astenn a ra ar broadoù hag o degas en-dro e-barzh o harzoù.

²⁴ Lemel a ra kalon digant pennoù pobloù an douar, hag o laka da gantreal en ur gouelec'h hep hent.

²⁵ Mont a reont a-dastorn en deñvalijenn hep gouloù, hag o laka da horjellañ evel tud mezv.