Levr Job 11 - Bibl Koad 21: Ar Bibl e Brezhoneg evit ar Vretoned

Pennad 11 Prezegenn gentañ Zofar

¹ Neuze, Zofar eus Naama a gomzas o lavarout:

² Ha ne vo ket respontet da gement a gomzoù? Hag a-walc'h eo bezañ ur c'homzer kaer evit ma vefe ar gwir ganit?

³ Da gomzoù aner, hag e raint d'an dud tevel? Ha goap a ri hep ma vo den a raio mezh dit?

⁴ Lavaret ec'h eus: Va c'helennadurezh a zo glan, ha dinamm on dirak da zaoulagad.

⁵ Met me a garfe e komzfe Doue, hag e tigorfe e c'henoù evit respont dit,

⁶ hag e tiskouezfe dit traoù kuzhet e furnez, a zo doubl en anaoudegezh; hag e c'houfes ec'h ankounac'ha Doue ul lod eus da zireizhder.

⁷ Hag e kavi foñs soñjoù Doue? Hag ec'h anavezi penn-da-benn an Holl-C'halloudeg?

⁸ Uhelder an neñvoù eo, petra a ri? Donoc'h eget lec'h ar marv eo, penaos ec'h anavezi?

⁹ E vuzul a zo hiroc'h eget an douar, ledanoc'h eget ar mor.

¹⁰ Mar tremen, mar krog, mar dastum, piv a harzo outañ?

¹¹ Rak eñ a anavez an dud gwidreüs; ha pa wel an droug, ha ne raio ket van?

¹² Met an den gollo a boell a zeu da vezañ skiantek, petra bennak ma oa evel ebeul un azenez p'eo bet ganet.

¹³ Mar lakaez prest da galon, mar astennez da zaouarn etrezek ennañ,

¹⁴ mar pellaez an direizhder a zo ez taouarn, ma ne lez ket an drougiezh da chom ez teltenn,

¹⁵ neuze a-dra-sur e savi da zremm dinamm, startaet e vi ha na'z po ket aon,

¹⁶ disoñjal a ri da boanioù, soñj az po anezho evel eus dour tremenet.

¹⁷ Da vuhez a savo lugernusoc'h eget ar c'hreisteiz, da zeñvalijenn zoken a vo evel ar beure.

¹⁸ Hag e vi leun a fiziañs rak e vo esperañs; klask a ri en-dro dit hag ez i da c'hourvez e surentez.

¹⁹ En em astenn a ri ez aes, den ne sponto ac'hanout, kalz a dud a raio al lez dit.

²⁰ Met daoulagad ar re zrouk a vo kuzumet, pep tec'h a vo kollet evito, rentañ o ene a vo o esperañs.