Levr Job 10 - Bibl Koad 21: Ar Bibl e Brezhoneg evit ar Vretoned

Pennad 10

¹ Aet eo skuizh va ene gant ar vuhez, lezel a rin va c'hlemm da vont, komz a rin e c'hwervoni va ene.

² Lavarout a rin da Zoue: Na'm c'hondaon ket, ro din da c'houzout perak ez out em enep.

³ Daoust hag e plij dit gwaskañ, o tisprizañ labour da zaouarn hag o splannañ mennad ar re zrouk?

⁴ Hag ec'h eus daoulagad kig? Hag e welez evel ma wel un den?

⁵ Da zeizioù, hag ez int evel deizioù an den? Da vloazioù, hag ez int evel deizioù an den,

⁶ evit ma rafes furchadenn war va direizhder hag enklask war va fec'hed?

⁷ Gouzout a rez n'on ket kablus, ha den ne c'hell va lemel eus da zorn.

⁸ Da zaouarn o deus va graet, va stummet a-grenn... Hag em distrujfes!

⁹ Az pez soñj ec'h eus va stummet evel pri; hag em lakafes da vont en-dro d'ar poultr?

¹⁰ Ha ne'c'h eus ket va linket evel laezh, va c'haouledet evel fourmaj?

¹¹ Va goloet ec'h eus a groc'hen hag a gig, va gwiadet gant eskern ha nervennoù.

¹² Roet ec'h eus din buhez ha trugarez, ha da brederioù o deus diwallet va spered.

¹³ Ha setu amañ an traoù a vires din ez kalon! Gouzout a ran e oant ganit.

¹⁴ Mar pec'han, e welez, ha ne bardonez ket din va direizhder.

¹⁵ Mard on drouk, gwalleur din! Mard on reizh, ne savan ket va fenn, leuniet a vezh ha prederek em enkrezioù.

¹⁶ Hag ez eont war-gresk! Va chaseal a rez evel ul leon, hag adarre e kreskes da vurzhudoù em enep.

¹⁷ Nevesaat a rez da destoù a-enep din, ha liesaat da fulor em c'heñver. Bagadoù nevez a zeu a-enep din.

¹⁸ Perak ec'h eus va zennet eus ar mammog? Marvet e vijen, lagad ebet n'en dije va gwelet!

¹⁹ Bez' e vijen evel na vijen ket bet, douget e vijen bet eus ar mammog d'ar bez!

²⁰ Va deizioù, ha n'int ket berr? Ehan ha va lez, ma vin frealzet un nebeud,

²¹ a-raok ma'z in kuit hep distreiñ, da vro an deñvalijenn ha skeud ar marv,

²² douar teñval evel an noz, e-lec'h m'emañ skeud ar marv hep urzh ebet, hag e-lec'h m'eo ar sklêrijenn evel an noz.