Leviegezh 7 - Bibl Koad 21: Ar Bibl e Brezhoneg evit ar Vretoned

Pennad 7 Gourc’hemennoù diwar-benn an aberzhoù

¹ Setu lezenn an aberzh a gablusted. Un dra santel-meurbet eo.

² El lec’h ma vez lazhet al loskaberzh, e vo lazhet an aberzh a gablusted. Skuilhet e vo ar gwad war an aoter hag en-dro dezhi.

³ Kinniget e vo an holl lard, al lost, al lard a c’holo ar bouzelloù,

⁴ an div lounezhenn, al lard a zo en-dro dezho hag a c’holo an divgroazell, hag ar flipezenn a zo war an avu gant an div lounezhenn a vo lamet.

⁵ An aberzhour o lakaio da vogediñ war an aoter evel ur prof graet dre an tan dirak an AOTROU. Un aberzh a gablusted e vo.

⁶ Pep den e-touez an aberzhourien a zebro dioutañ; debret e vo el lec’h santel. Un dra santel-meurbet eo.

⁷ Bez’ emañ eus an aberzh a gablusted evel eus an aberzh-dic’haouiñ, an hevelep lezenn o deus: ar prof a vo d’an aberzhour a raio an dic’haou.

⁸ Pa ginnig un aberzhour ul loskaberzh evit un den, an aberzhour en devo kroc’hen al loskaberzh en deus kinniget.

⁹ Pep donezon poazhet er forn, aozet er billig pe war ar baelon, a vo evit an aberzhour en deus he c’hinniget.

¹⁰ Pep donezon mezet gant eoul pe sec’h a vo evit holl vibien Aaron, unan evel egile.

¹¹ Setu lezenn an aberzh a drugarekadennoù a vo kinniget d’an AOTROU.

¹² Mar kinnig unan bennak anezhañ evit trugarekaat, e kinnigo gant an aberzh gwestell hep goell mezet gant eoul, bignez hep goell strinket gant eoul ha gwestell flour bleud kemmesket mezet gant eoul.

¹³ Ouzhpenn ar gwestell e kinnigo ur prof bara goet gant e aberzh evit trugarekaat pe aberzh a drugarekadennoù.

¹⁴ Kinniget e vo ul lodenn eus ar prof evel prof savet d’an AOTROU, hag e vo kement-se evit an aberzhour en devo skuilhet gwad an aberzh a drugarekadennoù.

¹⁵ Kig an aberzh a drugarekadennoù evit trugarekaat a vo debret en deiz ma vo kinniget; ne vo lezet mann dioutañ betek ar beure.

¹⁶ Mar d-eo aberzh unan bennak ur prof evit ur gouestl pe ur prof a youl vat, debret e vo en deiz ma kinnigo e aberzh, hag an nemorant a vo debret betek an deiz war-lerc’h.

¹⁷ An nemorant eus kig an aberzh a vo devet en tan d’an trede deiz.

¹⁸ Mar vefe debret kig an aberzh a drugarekadennoù d’an trede deiz, ne vefe ket degemeret ha ne vefe ket kontet d’an hini en deus kinniget an aberzh; un dra euzhus e vefe, ha piv bennak a zebrfe dioutañ a zougfe e zireizhder.

¹⁹ Ar c’hig en devo stoket ouzh un dra bennak dic’hlan ne vo ket debret, devet e vo en tan. Diwar-benn ar c’hig, pep den glan a c’hello debriñ dioutañ,

²⁰ met un den dic’hlan hag a zebro eus kig an aberzh a drugarekadennoù a zo d’an AOTROU, a vo lamet eus e bobl.

²¹ An hini a stoko ouzh un dra bennak dic’hlan, ouzh dic’hlander un den, ouzh ul loen dic’hlan pe ouzh un euzhenn bennak dic’hlan, hag a zebro eus kig an aberzh a drugarekadennoù a zo d’an AOTROU, a vo lamet eus e bobl.

²² An AOTROU a gomzas da Voizez o lavarout:

²³ Komz da vibien Israel ha lavar: Ne zebrot lard ejen, na oan, na gavr ebet.

²⁴ Lard ul loen marv pe lard ul loen diframmet a c’hello servijañ da implijoù a bep seurt, met n’en debrot ket.

²⁵ An hini a zebro lard al loened a zo kinniget evel profoù graet dre an tan d’an AOTROU, an den-se a vo lamet eus e bobl.

²⁶ En holl lec’hioù ma viot o chom, ne zebrot gwad ebet, nag eus ul labous, nag eus ul loen all.

²⁷ An den a zebro gwad bennak, an den-se a vo lamet eus e bobl.

²⁸ An AOTROU a gomzas da Voizez o lavarout:

²⁹ Komz da vibien Israel ha lavar: An hini a ginnigo d’an AOTROU e aberzh a drugarekadennoù, a zegaso d’an AOTROU e brof diwar e aberzh a drugarekadennoù.

³⁰ E zaouarn a zegaso ar prof graet dre an tan d’an AOTROU, degas a raio al lard gant ar bruched, evit hejañ ar bruched evel ur prof dirak an AOTROU.

³¹ An aberzhour a lakaio al lard da vogediñ war an aoter, ar bruched a vo evit Aaron hag e vibien.

³² Ar skoaz dehou a roiot d’an aberzhour, evel prof savet, diwar hoc’h aberzh a drugarekadennoù.

³³ An hini eus mibien Aaron a ginnigo gwad ha lard an aberzh a drugarekadennoù, en devo ar skoaz dehou evel lodenn,

³⁴ rak ar bruched hejet hag ar skoaz savet a gemerin diwar aberzhoù a drugarekadennoù mibien Israel, hag e roin anezho d’an aberzhour Aaron ha d’e vibien hervez ur reolenn beurbadus a-berzh mibien Israel.

³⁵ Hennezh eo al lodenn a roio an oleviadur da Aaron hag an oleviadur d’e vibien diwar ar profoù graet dre an tan dirak an AOTROU, adalek an deiz ma vint gouestlet da’m servij evel aberzhourien.

³⁶ Kement-se eo ar pezh en deus gourc’hemennet an AOTROU da vibien Israel da reiñ dezho adalek deiz o oleviadur. Ur reolenn beurbadus eo a rummadoù da rummadoù.

³⁷ Hounnezh eo lezenn al loskaberzh, an donezon, an aberzh-dic’haouiñ, an aberzh a gablusted, ar gouestladur hag an aberzh a drugarekadennoù,

³⁸ a voe gourc’hemennet da Voizez gant an AOTROU war Venez Sinai, an deiz ma c’hourc’hemennas da vibien Israel kinnig o frofoù e lec’h distro Sinai.