Leviegezh 6 - Bibl Koad 21: Ar Bibl e Brezhoneg evit ar Vretoned

Pennad 6

¹ An AOTROU a gomzas da Voizez o lavarout:

² Mar en deus pec’het unan bennak ha graet un difealded e-keñver an AOTROU, en ur lavarout gevier d’e nesañ diwar-benn ur fiziad, un dra da eveshaat warni, un dra laeret pe dilamet dre douell digant e nesañ,

³ mar en deus kavet un dra gollet hag en nac’h hag e tou e gaou, mar en deus touellet e nesañ,

⁴ mar en deus pec’het evel-se, e vo kablus, hag e rento an dra laeret gantañ, pe ar pezh en deus kemeret dre douell, pe ar pezh a zo bet fiziet ennañ, pe an dra gollet en deus kavet,

⁵ pe pep tra all en deus touet e gaou diwar he fenn. Rentañ a raio an dra en he fezh hag e lakaio ouzhpenn ar bempvedenn, hag e roio kement-se d’e berc’henn da zeiz e aberzh a gablusted.

⁶ Kinnig a raio d’an aberzhour evit e gablusted dirak an AOTROU un tourz disi, kemeret e-touez al loened bihan hervez da brizadur, evel aberzh a gablusted;

⁷ an aberzhour a raio an dic’haou evitañ dirak an AOTROU, hag an dra en deus graet evit bezañ kablus a vo pardonet dezhañ.

Gourc’hemennoù ha lezennoù a bep seurt

⁸ An AOTROU a gomzas da Voizez o lavarout:

⁹ Ro an urzh-mañ da Aaron ha d’e vibien o lavarout: Setu lezenn al loskaberzh: Al loskaberzh a chomo war oaled an aoter e-pad an noz betek ar beure hag an tan a vo dalc’het enaouet enni.

¹⁰ An aberzhour a wisko e doneg lin, a lakaio brageier lin war e gig, a lamo al ludu o tont eus an tan en devo kuzumet al loskaberzh war an aoter hag o lakaio e-kichen an aoter.

¹¹ Neuze e tiwisko e wiskamantoù hag e wisko reoù all, hag e kaso al ludu er-maez eus ar c’hamp d’ul lec’h glan.

¹² An tan war an aoter a vo dalc’het enaouet enni, ne varvo ket. An aberzhour a enaouo enni koad bep beure, a renko al loskaberzh war an tan hag a lakaio da vogediñ lard an aberzhoù a drugarekadennoù.

¹³ An tan war an aoter a vo dalc’het enaouet dibaouez, ne varvo ket.

¹⁴ Setu lezenn an donezon: Mibien Aaron e ginnigo dirak an AOTROU, a-dal d’an aoter.

¹⁵ An aberzhour a gemero un dornad flour bleud gant eoul ha gant an holl ezañs a zo war an donezon, hag e lakaio kement-se da vogediñ war an aoter, ur c’hwezh dudius, un eñvor d’an AOTROU.

¹⁶ Aaron hag e vibien a zebro ar pezh a vo manet; e zebriñ a raint hep goell, el lec’h santel; war leurenn teltenn an engalv e tebrint.

¹⁷ Ne vo ket poazhet gant goell. O lodenn eo, an hini am eus roet dezho diwar va frofoù graet dre an tan. Un dra santel-meurbet eo, evel an aberzh-dic’haouiñ hag evel an aberzh a gablusted.

¹⁸ Pep paotr e-touez mibien Aaron a zebro dioutañ. Ur reolenn beurbadus eo a rummadoù da rummadoù diwar-benn ar profoù graet dre an tan d’an AOTROU. Piv bennak a stoko outo a vo santelaet.

¹⁹ An AOTROU a gomzas da Voizez o lavarout:

²⁰ Setu ar prof a ginnigo Aaron hag e vibien d’an AOTROU d’an deiz ma vint olevet: un dekvedenn efa (1/10 efa   3 l) flour bleud evel donezon beurbadus, un hanter diouzh ar beure hag un hanter diouzh an abardaez.

²¹ Aozet e vo war ar baelon gant eoul, hag e tegasi anezhañ kemmesket; an donezon-mañ a ginnigi a dammoù poazhet evel ur c’hwezh dudius d’an AOTROU.

²² An aberzhour e-touez mibien Aaron a vo olevet war e lerc’h a ginnigo ar prof-mañ. Ur reolenn beurbadus eo dirak an AOTROU, devet e vo en e bezh.

²³ Pep donezon eus un aberzhour a vo devet en he fezh; ne vo ket debret.

²⁴ An AOTROU a gomzas da Voizez o lavarout:

²⁵ Komz da Aaron ha d’e vibien ha lavar: Setu lezenn an aberzh-dic’haouiñ: El lec’h ma vez lazhet al loskaberzh, e vo lazhet an aberzh-dic’haouiñ dirak an AOTROU. Un dra santel-meurbet eo.

²⁶ An aberzhour hag a ginnigo an aberzh-dic’haouiñ a zebro anezhañ; debret e vo el lec’h santel, war leurenn teltenn an engalv

²⁷ Piv bennak a stoko ouzh e gig a vo santelaet. Mar strink gwad war un dilhad bennak, e walc’hi el lec’h santel an dilhad a zo bet strinket gwad warnañ.

²⁸ Al lestr-pri ma vo poazhet e-barzh a vo torret; mar d-eo poazhet en ur pod arem, e vo puret ha gwalc’het en dour.

²⁹ Pep den e-touez an aberzhourien a zebro dioutañ. Un dra santel-meurbet eo.

³⁰ Met aberzh-dic’haouiñ ebet, a vo kaset gwad diouto e-barzh teltenn an engalv evit ober dic’haou el lec’h santel, ne vo debret; devet e vo en tan.