Leviegezh 26 - Bibl Koad 21: Ar Bibl e Brezhoneg evit ar Vretoned

Pennad 26 Bennozhioù ha mallozhioù

¹ Ne reot deoc’h idol ebet, ne savot na skeudenn kizellet na delwenn, ne lakaiot ket a vaen gant tresadennoù livet en ho pro, evit en em stouiñ dirazo. Me eo an AOTROU ho Toue.

² Mirout a reot va sabadoù hag ec’h enorot va santual. Me eo an AOTROU.

³ Mar kerzhit hervez va reolennoù ha mar mirit va gourc’hemennoù ha grit hervezo,

⁴ me a roio deoc’h ar glav en amzer dereat, an douar a roio e genderc’h ha gwez ar parkeier a roio o frouezh,

⁵ dornerezh ar greun a bado ganeoc’h betek ar vendem, hag ar vendem betek an here; debriñ a reot bara d’ho kwalc’h hag e chomot e surentez en ho pro;

⁶ me a lakaio peoc’h er vro hag e kouskot hep bezañ spouronet, kas a rin kuit al loened fall eus ar vro hag ar c’hleze ne dremeno ket en ho pro;

⁷ redek a reot war-lerc’h hoc’h enebourien hag e kouezhint dirazoc’h dre ar c’hleze,

⁸ pemp ac’hanoc’h a redo war-lerc’h kant ha kant ac’hanoc’h a redo war-lerc’h dek mil, hoc’h enebourien a gouezho dirazoc’h dre ar c’hleze;

⁹ me a sello ouzhoc’h, me a raio deoc’h frouezhus hag a lakaio ac’hanoc’h da greskiñ, hag e virin va emglev ganeoc’h;

¹⁰ debriñ a reot eus an eostoù kozh, hag e kasot er-maez ar re gozh evit ober lec’h d’ar re nevez;

¹¹ hag e lakain va chomlec’h en ho touez, ha va ene n’en devo ket euzh ouzhoc’h;

¹² kerzhout a rin en ho touez; bez’ e vin ho Toue hag e viot va fobl.

¹³ Me eo an AOTROU ho Toue, en deus tennet ac’hanoc’h eus bro Ejipt evit ne vefec’h ken er sklaverezh; torret em eus liammoù ho yev hag ho lakaet da gerzhout sonn.

¹⁴ Met ma ne selaouit ket ac’hanon ha ma ne rit ket hervez an holl c’hourc’hemennoù-mañ,

¹⁵ mar disprizit va reolennoù, mar en deus hoc’h ene euzh ouzh va barnedigezhioù, evit tremen hep heuliañ va gourc’hemennoù hag evit terriñ va emglev,

¹⁶ setu amañ neuze ar pezh a rin deoc’h: Lakaat a rin ar spont da zont warnoc’h, an diviañs hag an derzhienn, hag e kuzumint ho taoulagad hag e skuizhint hoc’h ene; hadañ a reot en aner ho had rak hoc’h enebourien en debro;

¹⁷ me a lakaio va dremm a-enep deoc’h, pilet e viot gant hoc’h enebourien, ar re a gasa ac’hanoc’h ho mestronio hag e tec’hot hep den o redek war ho lerc’h.

¹⁸ Ma ne’m selaouit ket en desped da-se, e kastizin ac’hanoc’h seizh gwech mui abalamour d’ho pec’hedoù,

¹⁹ hag e frikin ourgouilh ho kalloud. Lakaat a rin ho neñv evel houarn hag ho touar evel arem.

²⁰ Ho nerzh a faezho en aner, an douar ne roio ket e genderc’h ha gwez ar parkeier ne roio ket o frouezh.

²¹ Mar kerzhit a-enep din ha ma ne fell ket deoc’h va selaou, e kastizin ac’hanoc’h seizh gwech muioc’h hervez ho pec’hedoù,

²² kas a rin a-enep deoc’h al loened gouez a skrapo ho pugale, a zistrujo ho chatal, a nebeutaio ac’hanoc’h, hag e vo didud ho hentoù.

²³ Ma ne zifaziit ket ha ma kerzhit c’hoazh a-enep din,

²⁴ e kerzhin ivez a-enep deoc’h hag e skoin warnoc’h seizh gwech mui abalamour d’ho pec’hedoù.

²⁵ Hag e kasin warnoc’h ar c’hleze a veñjo va emglev; pa en em zastumot en ho kêrioù, e kasin ar vosenn en ho touez hag e viot roet etre daouarn an enebour.

²⁶ Pa dorrin deoc’h bazh ar bara, dek gwreg a boazho bara en ur forn hepken hag a roio deoc’h ho para dre bouez, hag e tebrot ha n’ho po ket ho kwalc’h.

²⁷ Ma ne’m selaouit ket en desped da-se ha ma kerzhit c’hoazh a-enep din,

²⁸ e kerzhin ivez a-enep deoc’h hag e kastizin ac’hanoc’h seizh gwech mui abalamour d’ho pec’hedoù.

²⁹ Debriñ a reot kig ho mibien ha debriñ a reot kig ho merc’hed,

³⁰ me a zistrujo hoc’h uhellec’hioù hag e tiskarin ho peulioù, hag e lakain ho korfoù marv war gorfoù marv hoc’h idoloù, ha va ene en devo euzh ouzhoc’h.

³¹ Lakaat a rin ho kêrioù didud, distrujañ a rin ho santualioù ha ne ruflin ken c’hwezh hoc’h ezañs,

³² dismantrañ a rin ar vro, kement ken e vo souezhet hoc’h enebourien a chomo enni,

³³ hag ho stlabezin e-touez ar broadoù hag e tennin ar c’hleze war ho lerc’h. Ho pro a vo dismantret hag ho kêrioù didud.

³⁴ Neuze an douar en em akuito eus e zeizioù sabad e-pad ma vo gwastet hag e-pad ma viot e bro hoc’h enebourien; neuze an douar a ziskuizho hag en em akuito eus e zeizioù sabad.

³⁵ Keit ha ma vo gwastet, e tiskuizho, abalamour ma n’en doa ket diskuizhet e-pad ho teizioù sabad, pa oac’h o chom warnañ.

³⁶ Ar re ac’hanoc’h a chomo bev, e tiekain o c’halonoù e broioù o enebourien; trouz un delienn hejet o argaso, tec’hout a raint evel ma tec’her dirak ar c’hleze hag e kouezhint hep den o redek war o lerc’h;

³⁷ kouezhañ a raint an eil war egile evel dirak ar c’hleze, hep den o redek war o lerc’h. Ne c’hellot ket kenderc’hel dirak hoc’h enebourien,

³⁸ mont a reot da goll e-touez ar broadoù ha bro hoc’h enebourien a lonko ac’hanoc’h.

³⁹ Ar re ac’hanoc’h a chomo bev a zizerio en abeg d’o direizhder e broioù o enebourien, hag e tizeriint ivez en abeg da zireizhder o zadoù.

⁴⁰ Neuze ec’h anzavint o direizhder ha direizhder o zadoù, ha penaos o devo disentet ouzhin ha kerzhet a-enep din.

⁴¹ Me ivez a enebo outo hag e kasin anezho e bro o enebourien, ha neuze o c’halonoù diamdroc’h a blego hag ec’h anzavint o direizhder.

⁴² Neuze em bo soñj eus va emglev gant Jakob, eus va emglev gant Izaak, eus va emglev gant Abraham em bo soñj, hag em bo soñj ivez eus ar vro-mañ.

⁴³ Ar vro a vo dilezet ganto hag en em akuito eus he deizioù sabad e-pad ma vo gwastet pell diouto; anzav a raint o direizhder, rak disprizet o devo va barnedigezhioù hag o eneoù o devo bet euzh ouzh va reolennoù.

⁴⁴ En desped da-se, pa vint e bro o enebourien, ne daolin ket kuit anezho ha ne’m bo ket euzh outo evit kas anezho holl da get hag evit terriñ va emglev ganto. Me eo an AOTROU o Doue.

⁴⁵ Soñj am bo eus va emglev gant o hendadoù, pa em eus tennet anezho eus bro Ejipt dirak daoulagad ar broadoù, evit bezañ o Doue. Me eo an AOTROU.

⁴⁶ Setu ar reolennoù, ar barnedigezhioù hag al lezennoù en deus lakaet an AOTROU etre eñ ha mibien Israel war Venez Sinai, dre Voizez.